2 ካታቱዋ 13
13
እስራኤልያ ካትያ ዮአካዛ
1አካዝያሳ ናአይ፥ ይሁዳ ካቲ እዮኣስ ካተቴዳ ላታማነ ሄዘን ላይን፥ ኢዩ ናአይ እዮአካዝ ሳማርያ ካታማን እስራኤልያ ቦላ ካተቴዳ፤ እ ታማነ ላፑን ላይ ካተቴዳ። 2ናባጻ ናአይ እዮርባም እስራኤልያ አሳ ኦስሴዳ ናጋራ ካሊደ፥ እዮአካዝ መና ጎዳ ስንን ኢታባ ኦዳ፤ እ ሄ ናጋራ ኦያዋ አግቤና። 3ሄዋ ድራዉ፥ መና ጎዳ ሀንቁ እስራኤልያ ቦላ ፐንቴዳ፤ መና ጎዳይ ኡንቱንቱ ዳሮ ዎድያዉ ሶርያ ካትያ ሀዛኤላዉነ አ ናኣ በንሀዳዳዉ ዛር ዛሪደ አ እሜዳ።
4ሄዋፐ ጉይያን፥ እዮአካዝ መና ጎዳ ዎሴዳ። መና ጎዳይ አዉ ስሴዳ፤ አያዉ ጎፐ፥ ሶርያ ካቲ እስራኤልያ አያ ማላ ኢታ ኡቁና ኡቁኔደንቶ መና ጎዳይ በኤዳ። 5መና ጎዳይ እስራኤልያ አሳ አሽያዋ እሜዳ፤ ኡንቱንቱ ሶርያ አሳቱዋ ኩሽያፐ ከስ አኬድኖ። ያቲደ እስራኤልያ አሳይ ካሰዋዳንካ ባረ ሶን ሳሩዋን ደኤዳ። 6ግዶፐካ እስራኤልያ አሳይ እዮርባማ ሶይ አሳይ ኦስሴዳ ናጋራፐ ስምቤና፤ ኡንቱንቱ ሄ ናጋራ ኦያዋ አግበይክኖ። ቃይ አሼሮ ግያ ጾሳቱ ምስሊ ሳማርያን ኤቆ ሳኣን አቴዳ። 7እዮአካዛዉ እሻታሙ ፓራ አሳቱዋፐ ታሙ ጋረቱዋፐነ፥ ታሙ ሻአ ገድያ ኦላንቻቱዋፐ አትና፥ ሀራ ኦላንቻይ አትቤና። አያዉ ጎፐ፥ ሶርያ ካቲ ኡንቱንታ ይሴዳ፤ እ ኡንቱንታ ኡዱማን ደእያ ሱላዳን ኦዳ።
8እዮአካዝ ሀኔዳ ሀራባይ፥ እ ኦዳባይ ኡባይነ አ ምኖተ እስራኤልያ ካተቱዋ ታርክያ ማጻፋን ጻፈት ኡቴዳ። 9እዮአካዝ ሀይቂደ፥ ባረ ማይዛን ጋከቴዳ፤ አ ሳኣን አ ናአይ እዮኣስ ካተቴዳ።
እስራኤልያ ካትያ እዮኣሳ
10ይሁዳ ካቲ እዮኣስ ካተቴዳ ሀታማነ ላፑን ላይን፥ እዮሳካዛ ናአይ እዮኣስ ሳማርያን እስራኤልያ ቦላ ካተቴዳ፤ እ ታማነ ኡሱፑን ላይ ካተቴዳ። 11እዮኣስ መና ጎዳ ስንን ኢታባ ኦዳ። ናባጻ ናአይ እዮርባም እስራኤልያ አሳ ኦስሴዳ ናጋራፐ እቱዋነ አሸናን ኦዳ፤ እ ሄ ናጋራ ኦያዋ አግቤና።
12እዮኣስ ሀኔዳ ሀራባይ፥ እ ኦዳባይ ኡባይነ ይሁዳ ካትያ አመስያሳና ኦለቴዳ ምኖተ እስራኤልያ ካተቱዋ ታርክያ ማጻፋን ጻፈት ኡቴዳ። 13እዮኣስ ሀይቂደ፥ ባረ ማይዛን ጋከቴዳ፤ ሳማርያን እስራኤልያ ካተቱዋና ሞገቴዳ። አ ሳኣን አ ናአይ እዮርባም ካተቴዳ።
ኤልሳአ ሀይቁዋ
14ኤልሳእ ባረና ዎያ ሀርግያ ሀርግያ ዎደ፥ እስራኤልያ ካቲ እዮኣስ አ በአናዉ ቢደ፥ “ታ አዎ፤ ታ አዎ! ኔን እስራኤልያ አሳዉ ዎልቃነ ጎንዳለ!” ያጊደ ዬኬዳ።#2 ካታ. 2:12
15ኤልሳእ፥ “ዎንዳፍያነ ፖቱዋ አካ ያ” ያጌዳ፤ አስ አሄዳ።
16ሄዋፐ ጉይያን፥ ኤልሳእ እስራኤልያ ካትያ፥ “ዎንዳፍያ ጊግሳ ኦይቃ” ያጌዳ፤ ዎንዳፍያን እ ጊግስ ኦይቂ ደእሽን፥ ኤልሳእ ባረ ኩሽያ ካትያ ኩሽያ ቦላ ዎዳ።
17“አዋይ ዶልያ ባጋ ማስኮትያ ዶያ” ያግና ዶዬዳ። ኤልሳእ፥ “ፖ ዎንዳፍያን ዱካ” ያጌዳ፤ እካ ዱኬዳ። ኤልሳእ፥ “ሀዌ መና ጎዳ ፖ! ሀዌ ሶርያ አሳቱዋ ጾንያ ፖ! ኔን ሶርያ አሳቱዋ አፌቃ ካታማን ጾናና ጋካናዉ ኦላና” ያጌዳ።
18ሄዋፐ ጉይያን ኤልሳእ ካትያ፥ “ፖቱዋ አካ” ያግና አኬዳ። ኤልሳእ፥ “ኡንቱንቱን ቢታ ጫዳ” ያጌዳ። ሄዙ ገደ ቢታ ጫዲደ አግ ባሼዳ። 19ያትና ጾሳ አሳይ ካትያ ሀንቀቲደ፥ “እቼሹ ገደ ዎይ ኡሱፑን ገደ ቢታ ጫዴዳዋ ግድንቶ፥ ኔን ሶርያ አሳቱዋ ጾናደ ኡባ ባይዛናዋ ሽን! ኔን ሀእ ኡንቱንታ ሄዙ ገደ ጻላላ ጾናና” ያጌዳ።
20ኤልሳእ ሀይቂና አሃዉ ጊጌዳ ጎንጎሉዋን ዎዳ።
ሞኣበ ጋድያፐ ኦላንቻቱ እስራኤልያ ቢታ ቦላ ላይን ላይን ዶዲኖ። 21እት ጋላስ አማሬዳ እስራኤልያ አሳቱ እት ብታንያ አሃ ሞጊደ፥ ሞኣበ ቢታ ጭታ በኤድኖ። ብታንያ አሃ ኤልሳአ ሞጉዋ ጎንጎሉዋ ግዶ ኦሊደ ባቃቴድኖ። ያትና አሃይ ኤልሳአ መቀ ቦላ ዎዳ፤ ሄ ማንእያን ፓጽነ ደንድ ኤቄዳ።
እስራኤላነ ሶርያ ግዶን ደንዴዳ ኦላ
22እዮአካዝ ካተቴዳ ላይን ኡባን ሶርያ ካቲ አዛኤል እስራኤልያ ኡቁኔዳ። 23ሽን መና ጎዳይ አብራሃመና፥ ይሳቃናነ ያቆባና ጫቀቴዳ ቃላ ጫቁዋ ድራዉ፥ ኡንቱንቶ ኬኬዳ፥ ቃረቴዳነ ቆፔዳ። ሀቼ ጋካናዉካ እ ኡንቱንታ ይስቤና ዎይ ባረ ስንፐ ድግቤና።
24ሶርያ ካቲ አዛኤል ሀይቂና፥ አ ሳኣን አ ናአይ በንሀዳድ ካተቴዳ። 25ሄዋፐ ጉይያን፥ አዛኤል አ አዉዋ እዮአካዘፐ ኦላን ኦይቄዳ ካታማቱዋ ዮአካዛ ናአይ ዮኣስ አዛኤላ ናኣ በንሀዳዳፐ ዎ አኬዳ። እዮኣስ አ ሄዙ ገደ ጾኒደ፥ እስራኤልያ ካታማቱዋ ዛሬዳ።
Currently Selected:
2 ካታቱዋ 13: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
