2 ኦዱዋ 7
7
ጌሻ ጎልያ አንጅሱዋ
(1 ካታ. 8:62-66)
1ሶሎሞነ ዎሳ በዳ ዎደ፥ ሳሉዋፐ ታማይ ዎደ፥ ጹግያ ያርሹዋነ ሀራ ያርሹዋ ሜዳ። ያትና፥ መና ጎዳ ቦንቹ ጌሻ ጎልያ ኩሜዳ።#ዎጋ 9:23-24 2መና ጎዳ ቦንቹ ጌሻ ጎልያ ኩሜዳ ድራዉ፥ ቄሳቱ መና ጎዳ ጌሻ ጎልያ ገላናዉ ዳንዳይበይክኖ። 3እስራኤልያ አሳይ ኡባይ ታማይ ሳሉዋፐ ዎሺናነ መና ጎዳ ቦንቹ ጌሻ ጎልያ ኩምሽና በኤዳ ዎደ፥ ባረንቱ ዴሙዋ ቢታ ጋ ጉፋኒደ ጎይኔድኖ፤ “መና ጎዳይ ሎአ!
አገና አ ሲቁ መናዋ”
ያጊደ ጾሳ ጋላቴድኖ።#1 ኦዱዋ 16:34፤ 2 ኦዱዋ 5:13፤ እዝራ 3:11፤ ማዝ. 100:5፤ 106:1፤ 107:1፤ 118:1፤ 136:1፤ ኤር. 33:11
4ሄዋፐ ጉይያን፥ ካቲነ አሳይ ኡባይ መና ጎዳ ስንን ያርሹዋ ያርሼድኖ። 5ካቲ ሶሎሞነ ላታማነ ላኡ ሻአ ኮሩማቱዋነ ጼታነ ላታሙ ሻአ ዶርሳቱዋ ያርሼዳ። ሄዋዳን ኦደ፥ ካቲነ አሳይ ኡባይ መና ጎዳ ጌሻ ጎልያ አንጅሴድኖ። 6ቄሳቱ ባረንቶ ጊጌዳ ሳኣን ኤቂና፥ ሌዋቱ ቃይ ካቲ ዳዊተ መና ጎዳ ሳባናዉ ካሰ ኦዳ፥ ማዝሙርያ የጽያ ሚሻ ኦይቂደ፥ ኡንቱንቱ ስንን ኤቂደ፥ “አገና አ ሲቁ መናዋ” ያጊደ የጺደ፥ መና ጎዳ ጋላቴድኖ። ቄሳቱ ሌዋቱ ስንን ኤቂደ፥ ጹሩምባቱዋ ፑኔድኖ፤ ፑንሽን እስራኤልያ አሳይ ኡባይ ኤቄዳ።
7ሶሎሞነ መና ጎዳ ጌሻ ጎልያ ስንን ደእያ ግዶ ዳባባ ዱማዬዳ። ሄ ሳኣን ጹግያ ያርሹዋነ እትፐተ ያርሹዋፐ ሞዋ ያርሼዳ። እ ሄዋ ኦዳዌ ጾሳ ስንን ደእያ፥ ናሃስያ ጌተትያ ብራታፐ ኦሰቴዳ ያርሽያ ሳአይ ጹግያ ያርሹዋ፥ ካ ያርሹዋነ እትፐተ ያርሹዋፐ ሞዋ ያርሻናዉ ጉጼዳ ድራሳ።
8ሄ ዎደ ሶሎሞንነ እስራኤልያ አሳይ ኡባይ ዳስያ ባላ ላፑን ጋላሳዉ ቦንቼድኖ፤ እስራኤልያ ዛዋን ሀማታ ፕኑዋፐ ቢደ፥ ግብጼ ሻፋ ጋካናዉ ደእያ ጮራ አሳይ ሄ ሳኣ ሺቄዳ። 9አሳይ ያርሽያ ሳኣ አንጅስያ ባላ ላፑን ጋላሳ፥ ቃይ ዳስያ ባላ ሀራ ላፑን ጋላሳ ቦንቼዳ። ሆስፑን ጋላሳን ጌሻ ያአዉ አሳይ ሺቄዳ። 10ሄዋፐ ጉይያን፥ ሶሎሞነ ላፑን አግናን፥ ላታማነ ሄዘን ጋላስ አሳ ሞይዜዳ፤ መና ጎዳይ ዳዊታዉ፥ ሶሎሞነዉነ ባረ አሳ እስራኤልያዉ ኦዳ ኬካተን አሳይ ናሸቲደነ ዎዛናፐ ፓሽኪደ፥ ባረ ሶ ባረ ሶ ቤዳ።
ጾሳይ ሶሎሞናዉ ዛር ቆንጬዳ
11ሶሎሞነ መና ጎዳ ጌሻ ጎልያነ ካትያ ጎልያ ኬጺደ ዉርሴዳ፤ ሶሎሞነ መና ጎዳ ጌሻ ጎልያንነ ባረ ካትያ ጎለን ኦናዉ ባረ ዎዛናን ቆፔዳዋ ኡባ ፖሌዳ። 12መና ጎዳይ ሶሎሞናዉ ቃማ ቤቲደ፥ ሀዋዳን ያጌዳ፤ “ታን ነ ዎሳ ስሳድ፤ ታን ሀ ሳኣ ታዉ ያርሹ ያርሸትያ ጌሻ ጎልያ ግዳናዳን ዶራድ። 13ታን እራይ ቡከናዳን ሳሉዋ ጎርድና፥ ዎይ ሳኣ ካ ማናዳን ቦልያ አዛዝና፥ ዎይ ታ አሳ ግዶን ኢታ ሀርግያ የድና፥ 14ታ ሱንን ጼሰቴዳ ታ አሳቱ ባረንቱ አሳተ ካዉሺደ ዎሶፐ፥ ኡንቱንቱ ታና ኮዮፐነ ባረንቱ ኢታ ኦግያፐ ስሞፐ፥ ታን ሳሉዋን ኡንቱንቱ ዎሳ ስሳና። ኡንቱንቱ ናጋራ አቶ ጋና፤ ኡንቱንቱ ቢታካ ፓና። 15ሀእካ ሀ ሳኣን ዎሰትያ ዎሳ ታ አይፊ ጼላና፤ ታ ሀይይካ ስሳና። 16ሀእካ ሀ ጌሻ ጎሊ መናዉ ታ ሱንይ አን ደአና ማላ ኦደ ታን ዶራድ፤ ዶራደካ ጌሻድ። ታ አይፊነ ታ ዎዛናይ ኡባ ዎደ ሀ ጌሻ ጎልያን ደአና።
17“ኔና ግዶፐ፥ ኔን ነ አዉ ዳዊተ ሀመቴዳዋዳን ታ ስንን ሀመቶፐ፥ ታን አዛዜዳዋ ኡባ ኦፐነ ታ ዎጋነ ታ ህግያ ናጎፐ፥ 18ታን ነ አዉዋ ዳዊታና፥ ‘እስራኤልያ ሞድያ አሳ ኔን ኡባካ ያካ’ ያጋደ ጫቀቴዳዋዳን፥ ነ ካዉተ አራታ ምንሳ ኤሳና።#1 ካታ. 2:4
19“ሽን ህንተንቱ እስራኤልያ አሳቱ ዎራ ስሞፐ፥ ታን ህንተንታ አዛዜዳ ታ አዛዙዋነ ታ ዎጋ አግ ባሾፐነ ሀራ ጾሳቶ ኦናዉነ ጎይናናዉ ቦፐ፥ 20ያቶፐ፥ ታን ካሰ ህንተንቶ እሜዳ ጋድያፐ ህንተንታ ቆላና፤ ታን ታ ሱንዉ ጌሼዳ ሀ ጌሻ ጎልያካ አጋና። ታን ሀ ጌሻ ጎልያ አሳ ኡባ ግዶን ቶስያባነ ቅሊጭያባ ኦና። 21ሀእ ሎይ ቦንቼቴዳ ሀ ጌሻ ጎልያ ማታና መንያ አሳይ ኡባይ ዳጋሚደ፥ ‘መና ጎዳይ ሀ ጋድያነ ሀ ጌሻ ጎልያ አያዉ ሀዋዳን ኦዴ?’ ያጋና። 22አሳይ፥ ኡንቱንታ ማይዛ አዎቱዋ ግብጼፐ ከሴዳ መና ጎዳ ባረንቱ ጾሳ ኡንቱንቱ አጊደ፥ ሀራ ጾሳቱዋ ካሌዳ ድራዉነ ኡንቱንቶ ኦደ ጎይኔዳ ድራዉ፥ ጾሳይ ኡንቱንቱ ቦላ ሀ ኢታባ ኡባ አሄዳ ያጊደ ዛራና” ያጌዳ።
Currently Selected:
2 ኦዱዋ 7: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
