1 ሳሜላ 30

ዳዊተ አማሌቃቱዋና ኦለቴዳ

1ዳዊተነ አ አሳቱ ሄዘን ጋላስ ጽቅላጋ ካታማ ጋኬድኖ። አማሌቃ አሳቱ ኔጌባ ባዙዋነ ጽቅላጋ ካታማ ማዬድኖ፤ ጽቅላጋ ካታማ ታማን ጹጌድኖ። 2ጽቅላጋ ካታማን ደእያ ማቻቱዋነ ናናቱዋፐ ጭማ ጋካናዉ ደእያ ኡባቱዋ ኦሞዴድኖ፤ ኡንቱንታ ኡባ አኪደ አፌድኖፐ አትና፥ እት አሳነ ዎበይክኖ።

3ዳዊተነ አ አሳቱ ጽቅላጋ ካታማ ጋክያ ዎደ፥ ካታማይ ታማን ጹገትክቼዳዋነ ቃይ ኡንቱንቱ ማጫ አሳቱ፥ ኡንቱንቱ አቱማ ናናይነ ኡንቱንቱ ማጫ ናናይ ኦሞደትክቼዳዋ በኤድኖ። 4ያትና፥ ዳዊተነ አናና እትፐ ደእያ አሳይ ባረንቱ ዎልቃይ እጻና ጋካናዉ ዋሲደ ዬኬድኖ። 5ዳዊታ ማጫ አሳቱ ላአቱ፥ እዝራኤልያ አህኖኣሞነ ቃርመሎስያ ናባላ አምአት አብጋላ ኦሞደቴድኖ።#1 ሳሜላ 25:42-43

6አሳይ ዳዊታ ሹቻን ጫዳናዉ ሃሳዬዳ ድራዉ፥ ዳዊተ ሎይ ቱጋቴዳ፤ አያዉ ጎፐ፥ አ አሳይ ኡባይ ባረ አቱማዋ ናናይነ ማጫ ናናቱዋ ድራዉ፥ ሎይ ይሎቴዳ፤ ሽን ዳዊተ መና ጎዳን ባረ ጾሳን ምነቴዳ።

7ዳዊተ አብመሌካ ናኣ ቄስያ አብያታራ፥ “ኤፉድያ ሃ አካደ ያ” ያጌዳ፤ አብያታረ ኤፉድያ ዳዊታዉ አሄዳ።#1 ሳሜላ 22:20-23 8ዳዊተ መና ጎዳ፥ “ታን ሀ ማዬዳዋንቱ ጌዱዋ ካላደ ቦ? ቦፐ ታን ኡንቱንታ ጋካኔ?” ያጊደ ኦቼዳ።

ጾሳይ፥ “ኤ፤ ኡንቱንታ ካላደ ባ፤ ኡንቱንታ ኔን ጋካናሳ፤ ኦሞደቴዳዋንታካ ዛራና” ያጌዳ።

9ዳዊተነ አናና ደእያ ኡሱፑን ጼቱ አሳቱ ደንዲደ ብሶራ ሻፋ ጋክና፥ አሳፐ አማሬዳዋንቱ ያን አቴድኖ። 10አያዉ ጎፐ፥ ላኡ ጼቱ አሳቱ ሻፋ ፕናናዉ ሎይ ዳቡሬድኖ። ሽን ዳዊተነ ኦይዱ ጼቱ አሳቱ ፓና ካሌድኖ።

11ሄዋፐ ጉይያን፥ አሳቱ እት ግብጻዊያ ደምባን ደሚደ፥ ዳዊታኮ አሄድኖ፤ አዉ ኡሻናዉ ሃ፥ ማናዉካ ቁማ እምና ሜዳ። 12ቃይ ባላስያ አይፍያ መላፐ ባካነ ላኡ ዉርጮ ዎይንያ ቴራ አዉ እሜድኖ፤ እ ሚደ ምኔዳ፤ አያዉ ጎፐ፥ እ ሄዙ ጋላስነ ሄዙ ቃማ ቁማ ምቤና ሃካ ኡሽቤና። 13ዳዊተ ሄ ብታንያ፥ “ኔን ኦሴ? ሀቃፐ ያድ?” ያጊደ ኦቼዳ።

ሽን ብታኒ፥ “ታን አማሌቃ ብታንያዉ አይለቴዳ ግብጼ አሳ፤ ሄዙ ጋላሳፐ ካሰ ታን ሳከቴዳ ድራዉ፥ ታ ጎዳይ ታና የግ ባሼዳ። 14ኑን ይሁዳ አሳቱዋ ቦላ፥ ካሪታ አሳቱዋ ቦላነ ካሌባ ያራቱዋ ቦላ ኔጌባ ዎራን ሺቄዶ፤ ጽቅላጋ ካታማካ ታማን ጹጌዳ” ያጌዳ።

15ዳዊተ፥ “ኔን ታና ሄ ሺቄዳ ጭታኮ ካለና ዳንዳያይ?” ያጊደ ኦቼዳ።

እ፥ “ኔን ታና ዎናዳንነ ታ ጎዳዉ አደ እመናዳን ታዉ ጾሳን ጫቃ፤ ያቶፐ፥ ታን ኔና ኡንቱንቱኮ ዱገ ካለና” ያጌዳ።

16ሄዋፐ ጉይያን፥ ብታኒ ዳዊታ ኡንቱንቱኮ ካለደ ጋዳ። ኡንቱንቱ ፕልስጼመ ቢታፐነ ይሁዳ ጋድያፐ ኦሞዴዳባይ ሎይ ዳሮ ግዴዳ ድራዉ፥ ናሸቲደ ሚድነ ኡሺደ ቢታ ኡባን ላለት ኡቴድኖ። 17ሄ ጋላስ ኦማርሳፐ ቢደ ዎንተ ጋላሳ ኦማርሳይ ጋካናዉ፥ ዳዊተ ኡንቱንታ ሾጬዳ፤ ጋሉዋ ቶጊደ ባቃቴዳ ኦይዱ ጼቱ ያላጋቱዋፐ አትና፥ ሀራይ እት አሳይነ አቲደ ብቤና። 18አማሌቃ አሳቱ አፌዳ ኡባባ፥ ባረ ላኡ ማጫ አሳቱዋናካ ጉጂደ፥ ዳዊተ ዎ አኬዳ። 19አሳቱ ኦሞድ አፌዳዋፐ አያይነ ፓጭቤና፤ ናናይ ዎይ ጭማይ፥ አቱማ ናናይ ዎይ ማጫ ናናይ፥ ኡንቱንቱ ኦሞድ አፌዳ ሀራባይ ኡባባይካ ፓጨናን ደኤ፤ ዳዊተ ኡባካ ዛሬዳ። 20ቃይ ዳዊተ ዶርሳነ ምያ ዉድያ ኡባ ኦሞዴዳ፤ ዳዊታ አሳይ እ ኦሞዴዳ ዉድያ ህንኮ መህያፐ ስንና ላጊደ፥ “ሀዌ ዳዊታ ኦሞዱዋ” ያጌዳ።

21ሄዋፐ ጉይያን፥ ዳዊተ ባረና ካላናዉ ዳቡሪደ፥ ብሶራ ሻፋ ማታን አቴዳ ላኡ ጼቱ አሳቱዋኮ ዬዳ። ኡንቱንቱ ዳዊታነ አናና እትፐ ደእያ አሳቱዋ ሞካናዉ ከሴድኖ፤ ዳዊተነ አ አሳይ ኡንቱንቱኮ ሺቅና፥ ዳዊተ ኡንቱንታ ሳሮቴዳ። 22ሽን ዳዊታና ቤዳዋንቱ ግዶፐ እት እት ፓና ኢታ አሳቱ፥ “ኡንቱንቱ ኑናና ብቤና ድራዉ፥ ኑን ዛሪደ አሄዳዋፐ አያነ ኡንቱንቱና ሻኮኮ፤ ኡንቱንቱ ባረንቱ ናናነ ባረንቱ ማቻቱዋ አኪደ ቢኖ” ያጌድኖ።

23ዳዊተ ኡንቱንታ፥ “ቱይት፤ ታ እሻቶ! መና ጎዳይ ኑዉ እሜዳባን ህንተንቱ ሀዋዳን ኦናዉ በሰና። እ ኑና ናጊደ፥ ኑ ቦላ ሺቄዳ ጭታ ኑዉ አደ እሜዳ። 24ህንተንቱ ግያዋ ኦንነ ማየና። ኦለታናዉ ቤዳዋንቱነ ኑባ ናጊደ ሀዋን ጋምኤዳዋንቱ እት ላገ ሻካና፤ ኡባዌካ እት ማላ ግዳና” ያጌዳ። 25ሄ ጋላሳፐ ዶሚደ፥ ሀቼ ጋካናዉ፥ ዳዊተ እስራኤልያ ቢታዉ ሄዋ ዎጋነ አዋዩዋ ኦደ ዎዳ።

26ዳዊተ ጽቅላጋ ካታማ ጋኬዳ ዎደ፥ ባረ ዳቦ ይሁዳ ጭማቱዋ፥ “መና ጎዳ ሞርከቱዋፐ ኦሞደቴዳዋፐ ታን ህንተንቶ እምያዋ ሄይተ” ያጊደ ኦሞዱዋፐ አማሬዳዋ የዴዳ። 27እ ሄዋ ቤቴለ፥ ኔጌባን ደእያ ራሞታነ ያትራ ካታማቱዋን ደእያዋንቶ፥ 28አሮኤራ፥ ስፍሞታ፥ ኤሽታሞአነ 29ራካላ ካታማቱዋን ደእያዋንቶ፥ ይራህማኤላ ካታማቱዋን ደእያዋንቶ፥ ቄና ካታማቱዋን ደእያዋንቶነ፥ 30ሆርማ፥ ቦርአሻና፥ አታካነ 31ከብሮና ካታማቱዋን ደእያዋንቶ የዴዳ፤ እነ አ አሳቱ ዩዬዳ ሳአቱ ኡባዉ የዴዳ።

Currently Selected:

1 ሳሜላ 30: DFBE

Highlight

Copy

Compare