1 ሳሜላ 3
3
ጾሳይ ሳመላ ጼሴዳ
1ናአይ ሳመል ኤልያፐ ጋርሳና መና ጎዳዉ ኦ፤ መና ጎዳ ቃላይ ሄ ዎደ ሎይ አልአ፤ ሳጻይነ ዳረና። 2አይፊ ጼላናዉ ለፕና፥ ዋየት ጼልያ ኤል እት ጋላስ ቃማ ባረ ሳኣን ግሴዳ። 3ሄ ዎደ ጾሳ ጾምፒ ብሮ ቶእቤና፤ ቃይ ጾሳ ታቦታይ ደእያ መና ጎዳ ጎለን ሳመል ገምእሼ። 4መና ጎዳይ ሳመላ ጼሴዳ፤ ሳሜል፥ “አቤ!” ጊደ ኮዬዳ። 5ኤልያኮ ዎጽ ቢደ፥ “ኔን ጼስና ሄኮ ያድ” ያጌዳ።
ሽን ኤል፥ “ታን ኔና ጼሳበይከ፤ ባደ ግሳ” ያጌዳ፤ ሳመል ቢደ ግሴዳ።
6ቃይካ መና ጎዳይ፥ “ሳመላ” ያጊደ ላኤንዋ ጼሴዳ፤ ሳሜል ደንዲደ፥ ኤልያኮ ቢደ፥ “ኔን ጼስና ሄኮ ያድ” ያጌዳ።
ሽን ኤል፥ “ታ ናአዉ፥ ታን ኔና ጼሳበይከ፤ ባደ ግሳ” ያጌዳ።
7ሳመል ሄዌ መና ጎዳ ግድያዋ ኤርቤና፤ አያዉ ጎፐ፥ መና ጎዳ ቃላይ ብሮ አዉ ቆንጭቤና። 8መና ጎዳይ ሳመላ ሄዘንዋ ጼስና ደንዲደ፥ ኤልያኮ ቢደ፥ “ኔን ጼስና ሄኮ ያድ” ያጌዳ።
ሄዋን መና ጎዳይ ናኣ ጼስያዋ ኤል አኬኬዳ፤ 9“ባደ ግሳ፤ እ ኔና ጼስያዋ ግዶፐ፥ መና ጎዳዉ፥ ኦዳ፤ ታን ነ ቆማይ ስሳይ ያጋ” ያጊደ ኦዴዳ፤ ሳመል ባረ ሳኣ ቢደ ግሴዳ።
10ሄዋፐ ጉይያን፥ መና ጎዳይ ዪደ ሄዋን ኤቂደ ካሰዋዳን፥ “ሳመላ፥ ሳመላ” ያጊደ ጼሴዳ።
ሳመል፥ “ኦዳ፤ ታን ነ ቆማይ ስሳይ” ያጌዳ።
11መና ጎዳይ ሳመላ፥ “በአ! ስስያ አሳ ኡባዉ ሀይዉ ኢትያ እትባ እስራኤልያ ቦላ ታን ኦና ሀናይ። 12ታን ኤልያ ሶይ አሳ ቦላ ሃሳዬዳ ኡባባ ሄ ጋላሳን ኮይሩዋፐ ዉርሰ ጋካናዉ ኤልያ ቦላ አሀና። 13ኤል ኤሬዳ ናጋራ ድራዉ፥ ታን አ ሶይ አሳ ቦላ መናዉ ፕርዳናዋ አዉ ኦዳ ዎድ፤ አያዉ ጎፐ፥ አ ናናይ ሸቅስያባ ኦያ ዎደ፥ እ ኡንቱንታ ሴርቤና። 14ሄዋ ድራዉ፥ ‘ኤልያ ሶይ አሳ ናጋራይ ያርሹዋንነ እሙዋን ኡባካ አቶ ጌተቶፖ’ ያጋደ ታን አ ሶይ አሳዉ ጫቃድ” ያጌዳ።
15ሳመል ሳአይ ዎንታና ጋካናዉ ግሴዳ፤ ዎንትና ደንዲደ፥ መና ጎዳ ጎልያ ፐንግያ ዶዬዳ። ሳመል ሳጻባ ኤልያዉ ኦዳናዉ ያዬዳ። 16ኤል ሳመላ፥ “ታ ናአዉ ሳሜላ” ያጊደ ጼሴዳ።
ሳመል፥ “አቤ” ጊደ ኮዬዳ።
17ኤል ሀዋዳን ያጊደ ሳመላ ኦቼዳ፤ “ጾሳይ ነዉ ኦዴዳዌ አዬ? ታፐ አይነ ቆሶፓ፤ ኔን ጾሳይ ነዉ ኦዴዳዋፐ እትባነ ታፐ ቆሶፐ፥ ጾሳይ ሄዋዳን ነ ቦላ ኦ” ያጌዳ። 18ሄዋፐ ጉየ ሳመል አይነ ቆሰናን ኡባባ ኤልያዉ ኦዴዳ። ኤል፥ “እ መና ጎዳይ፤ እ ባረና ሎኦዋ ኦ” ያጌዳ።
19ሳመል ድጭያ ዎደ መና ጎዳይ አናና ደኤ፤ ሳመል ሃሳዬዳባፐ እት ቃላይነ ሳኣን ዎቤና። 20እስራኤልያ ዛዋን ዳናፐ ቢደ በርሳበሀ ጋካናዉ፥ ሳመል መና ጎዳዉ ቱሙ ትምቢትያ ኦድያዋ ግድያዋ እስራኤልያ አሳይ ኡባይ ኤሬዳ። 21መና ጎዳይ ሴሎን ቆንጬ፤ ያን ባረ ቃላን ባረናተ ሳመላዉ ቆንጭሴዳ። ሳመል ሃሳዬዳ ቃላይ እስራኤልያ ኡባ ጋኬዳ።
Currently Selected:
1 ሳሜላ 3: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
