1 ካታቱዋ 9
9
ዉርሰ ላይቱዋ
(9:1—11:43)
1ሶሎሞነ መና ጎዳ ጌሻ ጎልያነ ካትያ ጎልያ ኬጺደ ማኬዳዋፐነ ኦናዉ አሞቴዳ አሙዋ ኡባ ፖሌዳዋፐ ጉይያን፥ 2ጋባኦና ካታማን ካሰ ቆንጬዳዋዳን፥ መና ጎዳይ ላኤንዋ አዉ ቆንጬዳ።#1 ካታ. 3:5፤ 2 ኦዱዋ 1:7 3መና ጎዳይ አ ሀዋዳን ያጌዳ፤ “ኔን ታ ስንን ዎሴዳ ዎሳነ ዋትዋቴዳ ዋትዋቱዋ ታን ስሳድ። ኔን ኬጼዳ ጌሻ ጎሊ መናዉ ታ ሱንይ አን ጼሰታና ማላ ኡዳደ ታን ጌሻድ፤ ታ አይፊነ ታ ዎዛናይ ኡባ ዎደ ሀ ጌሻ ጎልያን ደአናዋ።
4“ኔና ግዶፐ፥ ኔን ነ አዉ ዳዊተ ሀመቴዳዋዳን ቦርስያባይ ባይናን ሱረተን ታ ስንን ሀመቶፐ፥ ታን አዛዜዳዋ ኡባ ኦፐነ ታ ዎጋነ ታ ህግያ ናጎፐ፥ 5ታን ነ አዉዋ ዳዊታዉ፥ ‘እስራኤልያ ካዉተ አራታን ኡትያ አሳ ኔን ኡባካ ያካ’ ጌዳዋዳን፥ ነ ካዉተ አራታ እስራኤልያ ቦላ መናዉ ምንሳደ ኤሳና።#1 ካታ. 2:4
6“ሽን ኔን ዎይ ነ ናናይ ታና ካልያዋ አጊደ ዎራ ስሞፐ፥ ታን ህንተንታ አዛዜዳ ታ አዛዙዋነ ታ ዎጋ ናገናን ዮፐነ ሀራ ጾሳቶ ኦናዉነ ጎይናናዉ ቦፐ፥ 7ያቶፐ፥ እስራኤልያ አሳ ታን ካሰ ኡንቱንቶ እሜዳ ቢታፐ ቆላና፤ ታን ታ ሱንዉ ጌሼዳ ሀ ጌሻ ጎልያካ አጋ አጋና። እስራኤላቱ አሳ ኡባ ግዶን ቶሳዉነ ቅሊጮ ግዳናዋንታ። 8ሀ ጌሻ ጎሊ ኮለቴዳባይ ኬለቴዳ ሳኣ ግዳናዋ፤ ማታና አያ አሳይ ኡባይ ዳጋሚድነ ‘ፖራ!’ ጊደ፥ ‘መና ጎዳይ ሀ ጋድያነ ሀ ጌሻ ጎልያ አያዉ ሀዋዳን ኦዴ?’ ያጋና።#2 ካታ. 25:9፤ 2 ኦዱዋ 36:19 9አሳይ፥ ኡንቱንቱ ማይዛ አዎቱዋ ግብጼፐ ከሴዳ መና ጎዳ ባረንቱ ጾሳ ኡንቱንቱ አጊደ፥ ሀራ ጾሳቱዋ ካሌዳ ድራስነ ኡንቱንቱዋ ኦደ ጎይኔዳ ድራስ፥ መና ጎዳይ ኡንቱንቱ ቦላ ሀ ኢታባ ኡባ አሄዳ ያጊደ ዛራና” ያጌዳ።
ሶሎሞነ ኦዳ ሀራ ኦሶቱዋ
(2 ኦዱዋ 8:1-18)
10ሶሎሞነ ሀ ላኡ ጎልያ፥ መና ጎዳ ጌሻ ጎልያነ ካትያ ጎልያ ኬጼዳ ላታማን ላይ ዉርሰን፥ 11ጺሮሳ ካቲ ኪራም እ ኮይያ ጺዳ፥ ዝጋነ ዎርቃ ኡባ እሜዳ ድራዉ፥ ጋሊላን ደእያ ላታሙ ካታማቱዋ ሶሎሞነ አዉ እሜዳ። 12ሽን ኪራም ጺሮሳ ካታማፐ ከሲደ፥ ሶሎሞነ አዉ እሜዳ ካታማቱዋ በአናዉ ቤዳ ዎደ፥ ካታማቱ አ ናሸችበይክኖ። 13ያትና፥ ኪራም ሶሎሞና፥ “ታ እሻዉ፥ ሀዋንቱ ኔን ታዉ እሜዳዋንቱ አያ ካታማቴ?” ያጌዳ። ሄዋ ድራዉ፥ እ ሄ ካታማቱዋ፥ “ፓና ቢታ” ያጊደ ሱንዳ። ሄ ሄራይ ሀቼ ጋካናዉካ ሄ ሱንን ጼሰቴ። 14ኪራም ኦይዱ ሻአ ኪሎ ግራመ ዴጽያ ዎርቃ ካትያ ሶሎሞናዉ የድ ዎዳ።
15መና ጎዳ ጌሻ ጎልያ፥ ባረ ጎልያ፥ ሚሎ፥ የሩሳላመ ካታማ ግምቢያነ ሀጾራ፥ ማግዶነ ገዜራ ካታማቱዋ ግምባናዉ ካትያ ሶሎሞናዉ ጋባራቱ ደኢኖ። 16ግብጼ ቢታ ካቲ ካሰ ገዜራ ካታማ ኦይቂደ ካታማ ታማን ጹጌዳ። ካታማን ደእያ ካናነ አሳቱዋካ ዎዳ፤ ያቲደ ሶሎሞነ አኬዳ ባረ ናትዉ ዎይታ ኦደ እሜዳ፤ 17ሶሎሞነ ገዜራ ካታማ ዎ ኬጼዳ።
ሄዋዳንካ ቃይ፥ ሶሎሞነ ህርክ ቤት-ሆሮና፥ 18ባእላታ፥ ይሁዳ ዎራን ደእያ ታማራ ካታማ፥ 19ሚሻ ምንጅያ ካታማቱዋ ኡባ፥ ባረ ፓራቱዋነ ፓራ ጋረቱዋ ዎያ ካታማቱዋነ የሩሳላመን፥ ልባኖሳንነ ባረ ሞድያ ቢታን ኡባን ኬጻናዉ አሞቴዳ ኡባ ኬጼዳ።
20አሞራቱፐ፥ ሂተቱፐ፥ ፓርዘቱዋፐ፥ ሂዌቱዋፐነ ያቡሳቱዋፐ አቴዳ አሳቱ ኡባይ እስራኤልያ አሳ ግድክኖ፤ 21ኡንቱንቱ እስራኤልያ አሳቱ ቢታፐ ዉርስ ይሳናዉ ዳንዳየናን አግና፥ ሄ ቢታን አቴዳ አሳቱዋፐ ዘረቱዋ። ሶሎሞነ ኡንቱንታ ጋባረተ ኦስሴዳ፤ ኡንቱንቱ ሀቼ ጋካናዉካ ጋባረተን ኦኖ። 22ሽን ሶሎሞነ እስራኤልያ አሳቱዋፐ ኦናነ አይለይቤና፤ ኡንቱንቱ አዉ ኦሳንቻቱዋ፥ ኦላንቻቱዋ፥ ኦላንቻቱ ካፓቱዋነ ጋዳዋቱዋ፥ ፓራ ጋረቱዋ ላግያዋንቱ ካፓቱዋነ ፓራ አሳቱዋ ግዲደ ኦድኖ። 23ሄዋዳንካ ቃይ፥ ኡንቱንቱ ሶሎሞና ኪታ ኪተትያዋንቱ ካፓቱዋ፤ ኡንቱንቱፐ እቼሹ ጼታነ እሻታማቱ ኦሱዋ ኦያ ጎሻንቻቱዋ ጼሊደ ኦስሲኖ።
24ግብጼ ካትያ ናታ ዳዊታ ካታማፐ ሶሎሞነ እዝዉ ኬጽሴዳ ጎልያ ፑደ ቤዳዋፐ ጉይያን፥ እ ሚሎ ግምቤዳ።
25ሶሎሞነ መና ጎዳዉ ግምቤዳ ያርሹዋ ሳኣን ጹግያ ያርሹዋነ እትፐተ ያርሹዋ ላይን ሄዙ ገደ ያርሼ፤ መና ጎዳ ስንን እጻናካ ጩዋዬ። ያቲደ ጌሻ ጎልያ ፖሌዳ።#ከሳ 23:17፤ 34:23፤ ዛረ. 16:16
26ሄዋፐ ጉይያን ካቲ ሶሎሞነ ኤዶማ ቢታን ዞኦ አባ ዶናን፥ ኤላታ ጌተትያ ካታማ ማታን ደእያ ኤጽዮን-ጋብራን ማርካባቱዋ መዳ። 27ካቲ ኪራም ሶሎሞነ አሳቱዋና ኦና ማላ ማርካብያ ላጉዋ ሎሄዳ ባረ አሳቱዋ ኪቴዳ። 28ኡንቱንቱ ኦፍራ ጋድያ ቤድኖ፤ ያፐ ታማነ ኦይዱ ሻአ ኪሎ ግራምያፐ ዳርያ ዎርቃ ካትያ ሶሎሞናዉ አኪደ ዬድኖ።
Currently Selected:
1 ካታቱዋ 9: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
