1 ካታቱዋ 7
7
ሶሎሞነ ባረዉ ካዉተ ጎልያ ኬጼዳ
1ሶሎሞነ ባረ ጎልያ ታማነ ሄዙ ላይን ኬጺደ ዉርሴዳ። 2ሊባኖሳ ዎራ ጎልያ ጌተትያ ጎልያ ሶሎሞነ ኬጼዳ፤ ሄ ጎልያ አዱሳተይ ጼቱ ዋ፤ ጎምፓይ እሻታሙ ዋ፤ ጌሳይ ሀታሙ ዋ። ዝጋ ቱቀቱ ኦይዱ ማራን ኤቄድኖ፤ ቃይ ማሰቴዳ ዝጋ ሙደቱ ኡንቱንቱ ቦላ ዎድኖ፤ 3ሙደቱ ሄዙ ማራን፥ እት እት ማራን ታማነ እቼሹ ሙደቱ ደኢኖ፤ ኡንቱንቱ ኡባና ኦይታማነ እቼሻ። 4ሄ ጎልያዉ ማስኮተቱ ሄዙ ማራን ደኢኖ፤ ኡንቱንቱ እቱ እቶ ስን ባጋን ደኢኖ። 5ፐንገቱነ ማስኮተቱ ኦይዱ ዞዝያና ደኢኖ፤ ማስኮተቱ ሄዙ ማራን ግዲደ፥ እቱ እቶ ስን ባጋን ደኢኖ።
6ሶሎሞነ ቱቀቱ ጎልያ ጌተትያ ጎልያካ ኬጼዳ፤ ሄ ጎልያ ኣዱሳተይ እሻታሙ ዋ፤ ጎምፓይ ሀታሙ ዋ። ሄ ጎልያ ስንን ዳሮ ቱቅያን ዘምፔዳነ ቦላና ካራን ካመቴዳ ባራንዳይ ደኤ። 7ቃይ እ ፕርዳዉ ካዉተ አራታይ ደእያ ፕርዳ ጎልያካ ኬጼዳ፤ ሄ ኬይ ዉይግያፐ ቢደ ካራ ጋካናዉ ዝጋን ካመት ኡቴዳ። 8ፕርዳ ጎልያፐ ጉየን ደእያ ሀራ ዳባባን ባረዉ ደአናዉ ካትያ ጎልያ የንኮ ጎለቱዋዳን ኦደ ኬጼዳ፤ ባረ ማቻትዉ፥ ግብጼ ካትያ ናትዉካ ሄ ጎልያ ማላ ጎልያ ኬጼዳ።#1 ካታ. 3:1
9ሀ ጎለቱ ኡባይ፥ ካረፐ ዶሚደ ቢደ ድርሳፐ ሶና ደእያ ዎልቃማ ጉታራ ጋካናዉ፥ ባሱዋፐ ዶሚደ ካራ ጋካናዉ፥ ልኪደ ማሴዳነ ሶናነ ካረና ሶፊደ ጊግሴዳ አልኦ ሹቻፐ ኦሰቴድኖ። 10ግምቢ ሂጸቴዳዌ ታሙ ዋ ዎይ ሆስፑን ዋ ግድያ ሎአ ማሰቴዳ ዎልቃማ ሹቻና። 11ሄዋፐ ቦላ ባጋና ልከቲደ ማሰቴዳ አልኦ ሹቻይነ ዝጋ ሙደይ ደኤ። 12ዎልቃማ ዳባባ ዩሹዋን ደእያ ግምቢ መና ጎዳ ጌሻ ጎልያዳንነ ባራንዳዳን ማሰቴዳ ሹቻ ሄዛቱዋ፥ እቱዋ እቱዋ ቦላ ዎደ፥ እት ዝጋ ማሰ ኡንቱንቱ ቦላ ዎደ ግምቤዳዋ።
ሁራማ ኦሱዋ
13ካቲ ሶሎሞነ ኪቲደ፥ ሁራማ ግያ ብታንያ ቂሮሳ ካታማፐ አሂሴዳ። 14ሁራማ አታ አምኤ፤ አ ንፍታሌማ ዛረ አሳ። አ አዉ ቂሮሳ አሳ። ሁራም ናሃስያ ግያ ብራታ መያ ሂላይ ደእያ አሳ፤ እ ናሃስያፐ ቆጺደ ከስያዋን ኡባን ሎይ ሎሄዳ አሳ፤ ሶሎሞነኮ እ ዪደ፥ አ ኦሱዋ ኡባ ኦዳ።
ላኡ ናሃስያ ቱሳቱዋ
(2 ኦዱዋ 3:15-17)
15ሁራም እቱዋ እቱዋ ጌሳይ ታማነ ሆስፑን ዋ አዱቂደ፥ ዩሹ ታማነ ላኡ ዋ አኬዳ ላኡ ቱሳቱዋ ናሃስያ ሲልሲደ ትጊደ ከሴዳ። ቱሳቶ ግዱ ኮፋ። 16ሄዋዳንካ፥ ቱሳቱዋ ሁጲያን ዎናዉ ላኡ ጉምቦቱዋ ናሃስያፐ ሲልሲደ፥ መዳ፤ እት እት ጉምቡ እቼሹ ዋ አዱቄ። 17-18ቱሳ ሁጲያን ደእያ እት እት ጉምቦቱዋ ግትያዳን ኦዳ ላፑን ሳንሳላታ ቃጽቃሎቱዋንነ ላኡ ማራና ሮማነ ግያ ቴራ ምስለቱዋን አሌቂስ ዎዳ። 19ባራንዳን ኤቄዳ ቱሳቱዋ ቦላ ደእያ ጉምቦቱ ጪሻ ማላን መቴድኖ፤ ኡንቱንቱ ጌሳይ ኦይዱ ዋ። 20ላኡ ቱቀቱ ሁጲያን ደእያ ጉምቦቱዋን ሙሉሙቀቱ ኡቴዳ ሳፐ ቦላ ባጋና፥ ሳንሳላታ ቃጽቃሉዋፐ ካሊደ፥ ላኡ ጼቱ ሮማነ ቴራ ምስለቱ ላኡ ማራን ዩይ አደ ደኢኖ። 21ሁራም ሄ ላኡ ቱሳቱዋ ጌሻ ጎልያ ባራንዳ ማታን ኤሴዳ። ኡሸቻ ባጋና ኤቄዳ ቱሳ ያኪና ሱንዳ፤ ሀድርሳ ባጋና ኤቄዳ ቱሳ ቃይ ቦኤዛ ሱንዳ። 22ቱሳቱ ሁጲያን ደእያ ጉምቦቱ ጪሻ ማላቲደ መቴድኖ። ሄዋዳን ሀኒደ ቱሳቱዋ ኪታይ ፖለቴዳ።
ናሃስያፐ መዳ ዎንግርያ
(2 ኦዱዋ 4:2-5)
23ሁራም አባ ሳኒያ ግያ እት ሎይ ዎልቃማ ዎንግርያ ናሃስያ ብራታፐ ሲልሲደ ትግ መዳ። ሄ አባ ዎንግርያ ዶናይ ሀ ጋጻፐ ያ ጋጻ ጋካናዉ ታሙ ዋ፤ ጌሳይ እቼሹ ዋ፤ ዩሹ ቃይ ሀታሙ ዋ። 24አባ ዎንግርያ ዶናን ካረ ባጋና ዝቂ ጊደ፥ አናና ኦይቀቲደ መቴዳ ጎሰቱዋ ምስለቱ ደኢኖ፤ ሄ ጎሰቱዋ ምስለቱ ላኡ ማራን፥ እት እት ዋን ታሙ ታሙ ዩይ አደ ሹሸቴድኖ።
25ሄ አባ ሳኒ ናሃስያ ብራታፐ መቴዳ ታማነ ላኡ ቦራቱዋ ምስለቱ ዞክያን ኡቴዳ። ቦራቱዋ ምስለቱዋፐ ሄዛቱ ሁጲሳ ባጋ፥ ሄዛቱ አዋይ ዉልያ ባጋ፥ ሄዛቱ ገድሳ ባጋ፥ ሄዛቱ ቃይ አዋይ ዶልያ ባጋ ስሚደ ጼልያዋ ማላቲኖ። አባ ሳኒ ኡንቱንቱ ቦላ ኡቴዳ፤ ኡንቱንቶ ጉየ ባጋይ ግዱዋኮ ስም ኡቴዳ። 26አባ ሳኒ እት ታካ ኬሻ ኦርዱዋ፤ አ ዶናይ ዋንጫ ዶና ማላ፤ ቃይ ጪሻይ ጪሼዳዋካ ማላቴ። ሄ አባ ሳኒ ኦይታሙ ሻአ ሊትሮ ግድያ ሃ ኦይቂያዋ።
ናሃስያ ጋረቱዋ
27ሁራም ቃይ ታሙ ጋረቱዋ ናሃስያ ብራታፐ መዳ። ሄ ጋረቱ እቱ እቱ ኦይዱ ዋ አዱሳ፤ ኦይዱ ዋ አኮነ ሄዙ ዋ ቃ። 28ሄ ጋረቱ ሀዋዳን ኦሰቴድኖ፤ ፑደ ኤቄዳ ኦይዱ ብራታቱዋ ቦላ ፕድ ጊደ ሎቻ ናሃስያ ብራታቱ ኦይቀት ኡቴድኖ። 29ሄ ብራታቱዋ ቦላ ጋሞቱዋ፥ ቦራቱዋነ ክሩበላ ማላትሲደ መዳ ምስለቱ ደኢኖ፤ ጋሞቱዋነ ቦራቱዋ ምስለቱዋፐ ሁጲሳናነ ህርክ ባጋና ደእያ ብራታቱዋ ቦላ ቃይ ቆጺደ መዳ ጪሻ ኤንጩርሳ ምስለቱ ደኢኖ። 30እት እት ጋርያዉ ናሃስያፐ ኦዳ ኦይዱ ይንግርያዋንቱነ ይንግርያዋንታ ጋ ዋጽያ ናሃስያ ካሶቱ ደኢኖ። ሄዋዳንካ፥ ኦይዱ ዞዘቱን ከርያ ዘምፕስያባቱ ደኢኖ። ሄ ዘምፕስያባቱ ጪሻ ኤንጩርሳ ማላትያ ምስለቱዋን አሌቀት ኡቴድኖ። 31ጋርያ ዘምፕስያባቱ ሁጲያን ይንግርያዋንቱ ኡቴዳ ሻሺ ደኤ፤ ሄ ሻሺ ጋርያ ጼራፐ ፑደ እት ዋ ግድያዋ ቁ ጊደ፥ ዱገ ባጋ ዋ ግድያዋ ዝቂ ጊደ መቴ። ሄ ሻሽያዉ ዶናይ ዩይ አደ ምስልያን አሌቀት ኡቴዳ። 32ይንግርያዋንቱ ጌሳይ እት ዋነ ባጋ፤ ይንግርያዋንቱ ሎቻ ናሃስያ ብራታቶ ጋርሳ ባጋና ደኢኖ። እርዝዞቱ ኦይቀት ኡቴዳ ካሶቱ ጋርያና ኦይቀት ኡቴድኖ። 33ይንግርያዋንቱ ኦላ ፓራ ጋርያ ይንግርያዋንቱዳን መቴድኖ፤ ይንግርያዋንታ ጋደ ኦይቂያ ካሶቱ፥ ቻርከቱነ ቅንቂረተቱ ኡባይካ ናሃስያፐ ትገቲደ ኦሰቴድኖ። 34ሄ ጋረቱዋ ኡባ ዞዘቶካ ኡንቱንቱ ህርክ ባጋና ህርክባጋና ኡንቱንቱና እቱዋ ግድ ኦይቀቲደ፥ ናሃስያፐ መቴዳ ዘምፖቱ ደኢኖ። 35እት እት ጋርያ ሁጲያ ዩሹዋን እት ዋዉ ባጋ አዱቂያ ሻሺ ደኤ፤ ዘምፖቱነ ሎቻ ናሃሰቱ ጋርያና ኦይቀቲደ፥ እቱዋ ግዲደ ኦሰቴድኖ። 36ሀ ዘምፖቱዋፐነ ሎቻ ናሃሰቱዋፐ ግዱዋን ደእያ ካሎ ሳአቱ ኡባይ ክሩበቱዋ፥ ጋሞቱዋነ ዛምባቱዋ ምስለቱዋን አሌቀት ኡቴድኖ፤ ቃይ ኡንቱንቱ ዩሹ ጪሻ ኤንጩርሳ ምስልያን አሌቀት ኡቴዳ። 37ስም ታሙ ጋረቱካ ሀዋዳን ኦሰቴድኖ፤ ሲልሲደ ኡንቱንቱ ትጌዳ ሚሻይ እቱዋ ግድያ ድራዉ፥ ኡንቱንቱ ጌሳይካ ኡንቱንቱ ያራይካ እት ማላ።
38ሁራም ሜጨትያ ታሙ ከረቱዋ ናሃስያፐ መዳ፤ እት እት ከርያ ጎምፓይ ኦይዱ ዋ አኮ ግዲደ፥ ሆስፑን ጼቱ ሊትሮ ሃ ኦይቄ፤ ታሙ ጋረቶ ሁጲያን ሁጲያን እት እት ሜጨትያ ከሪ ደኤ።#ከሳ 30:17-21 39ሁራም ጋረቱዋ እቼሻቱዋ ጌሻ ጎልያዉ ሁጲሳ ባጋና፥ እቼሻቱዋ ቃይ ጌሻ ጎልያዉ ገድሳ ባጋና ዎዳ፤ ቃይ ናሃስያፐ ኦሰቴዳ አባ ሳኒያ ጌሻ ጎልያፐ ገድሳ አዋይ ዶልያ ባጋ ዛሪደ ኤሴዳ።
ጌሻ ጎልያ ሚሻቱዋ
(2 ኦዱዋ 4:11—5:1)
40ቃይ ሁራም ከረቱዋ፥ አካፋቱዋነ ኩይጻሮቱዋ መዳ፤ ያቲደ ካትያ ሶሎሞናዉ መና ጎዳ ጌሻ ጎልያ ኪታ ኦደ ፖሌዳ።
41እ ኦዳ ኦሶቱካ:
ላኡ ቱሳቱ፥
ቱሳቱዋ ሁጲያን ዎያ ሳይነ ማላ ላኡ ጉምቦቱዋ፥
ቱሳቱዋ ቦላ ደእያ ላኡ ጉምቦቱዋ አሌቂስያ ላኡ ግተ ማላ ሳንሳላታቱዋ፥
42እት እት ጉምቡዋ ቦላ ላኡ ማራን ናሃስያፐ፥
መቴዳ እት እት ጼቱ ሮማነ ቴራ ምስለቱዋ፥
ኡባና ኦይዱ ጼቱ ሮማነ ቴራ ምስለቱዋ፥
43ታሙ ጋረቱዋ፥ ጋረቱዋ ቦላን ዎያ፥
ሜጨትያ ታሙ ከረቱዋ፥
44አባ ሳኒያነ አፐ ጋርሳን ደእያ፥
ታማነ ላኡ ቦራቱዋ ምስለቱዋ፥
45ከረቱዋ፥ አካፋቱዋነ ኩይጻሮቱዋ።
ሁራም ካትያ ሶሎሞናዉ መና ጎዳ ጌሻ ጎልያ ኦሶ መዳ ሀ ሚሻቱዋ ኡባ ቁጨቴዳ ናሃስያፐ መዳ። 46ካቲ ሶሎሞነ ሱኮታፐነ ጻርታናፐ ግዱዋን፥ ዮርዳኖሳ ደምባን ደእያ፥ ናሃስያ ብራታ ሲልስያ ሳኣን ሀዋንታ ኡባ ኦስሴዳ። 47ናሃስያ ብራታፐ መቴዳ ሀ ሚሻ ኡባይ ሎይ ዳራ ግዴዳ ድራዉ፥ ሶሎሞነ አ ማዛንስቤና፤ ሄዋ ድራዉ፥ ዎይሳ ዴጽንቶ ልኪ ኤረትቤና።
48ቃይካ ሶሎሞነ መና ጎዳ ጌሻ ጎልያ ግዶን ደእያ ሚሻቱዋ ኡባ ዎርቃፐ መሴዳ። ሄዋንቱካ:
ዎርቃፐ ኦዳ ያርሽያ ሳኣ፥
ስንን ዎያ ኡክይ ኡትያ ጻርጴዛ፥#ከሳ 25:23-30፤ 30:1-3
49ኡባፐ አያ ጌሻ ሳኣፐ፥
ስንን ኡሸቻ ባጋናነ ሀድርሳ ባጋና ኤቄዳ፥
እቼሹ እቼሹ ጾምፕያ ዎያ ባላቱዋ፥
ጪሻቱዋ፥ ጾምፕያ ቶይስያ ቃጲያ፥#ከሳ 25:31-40
50ጹአቱዋ፥ ጾምፕያ ቶይስያዋንታ፥
ኩይጻሮቱዋ፥ እጻና ጩዋይያባቱዋ፥
ታማ አክያ ሚሻቱዋነ፥
ኡባፐ አያ ጌሻ ሳኣ ጌተትያ ቆልኡዋ ፐንገቱዋነ፥
ጌሻ ጎልያዉ ካረ ባጋ ፐንገቱዋ ኦይቄዳ ማጻፋቱዋ።
ሀ ሚሻቱ ኡባይ ዎርቃፐ ኦሰቴድኖ።
51ካቲ ሶሎሞነ መና ጎዳ ጌሻ ጎልያ ኪታ ኡባ ፖሌዳዋፐ ጉይያን፥ አ አዉ ዳዊተ መና ጎዳዉ ዱማዪደ ዎዳ ብራ፥ ዎርቃነ ሀራ ሚሻቱዋካ ኡባ አሂደ፥ ጌሻ ጎልያ ሚሻ ምንጅያሳን ዎዳ።#2 ሳሜላ 8:11፤ 1 ኦዱዋ 18:11
Currently Selected:
1 ካታቱዋ 7: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
