1 ኦዱዋ 28

ዳዊተ ጌሻ ጎልያ ዎት ኬጻነንቶ ኦዴዳ

1እስራኤልያ ካፓቱ ኡባይ የሩሳላመን ሺቃናዳን ካቲ ዳዊተ አዛዜዳ፤ ሄዋ ድራዉ፥ ዛራቱዋ ካፖቱ፥ ካትያ ኦሳንቻቱ ካፓቱ፥ ሻአ ካፓቱ፥ ጼቱዋ ካፓቱ፥ ካትያዉ ካትያ ናናዉ ደእያ አቆነ መህያዉ አዎትያዋንቱ፥ ካትያ ጎለን ኦያ ካፓቱ፥ ኤረቴዳ ምኖ አሳቱነ ዎልቃማ አሳቱ ኡባይ የሩሳላመን ሺቄድኖ።

2ካቲ ዳዊተ ደንድ ኤቂደ፥ ሀዋዳን ያጌዳ፤ “ታ እሻቶ፥ ታ አሳቶ፥ ስስተ! መና ጎዳ ቃላ ጫቁዋ ታቦታ ዎያነ ኑ ጾሳ ገዲ ሸምፕያ ጌሻ ጎልያ ኬጻናዉ ታ ዎዛናን ቆፓድ፤ ኬጻናዉ ኮሽያዋንታካ ጊግሳድ።#2 ሳሜላ 7:1-16፤ 1 ኦዱዋ 17:1-14 3ሽን ጾሳይ ታና፥ ‘ኔን ኦላንቻነ ሱ ጉሴዳ አሳ ግድያ ድራዉ፥ ታ ሱንዉ ጎልያ ኬጻካ’ ያጌዳ። 4ታን እስራኤልያ ቦላ መናዉ ካተታናዳን፥ መና ጎዳይ እስራኤልያ ጾሳይ ታ አዉዋ ጎልያ አሳ ኡባፐ ታና ዶሬዳ። ካለናዳን ኮይሮ ይሁዳ ዛርያ ዶሬዳ፤ ይሁዳ ዛርያፐ ታ አዉዋ ሶይ አሳ ዶሬዳ፤ ታ አዉዋ ናና ግዶፐ ታና ዶሪደ፥ እስራኤልያ ኡባ ቦላ ካተያናዉ ናሸቴዳ። 5መና ጎዳይ ታዉ ጮራ ናና እሜዳ፤ ታ ናና ኡባፐ መና ጎዳ ካዉተ አራታን ኡቲደ፥ እስራኤልያ ቦላ ካተታናዳን ታ ናኣ ሶሎሞና ዶሬዳ።

6“ጾሳይ ታና፥ ‘ታ ጌሻ ጎልያነ ታ ዳባባ ኬጻናዌ ነ ናኣ ሶሎሞና። አያዉ ጎፐ፥ እ ታዉ ናኣ ግዳናዳን ታን አ ዶራድ፤ ታንካ አዉ አዉዋ ግዳናዋ። 7እ ሀእ ኦያዋዳን ስንፐካ ታ አዛዙዋነ ታ ህግያ ምኒደ ናጎፐ፥ ታን አ ካዉተ መናዉ ምንና’ ያጌዳ። 8ሄዋ ድራዉ፥ ሀእካ መና ጎዳ ያአይ፥ እስራኤልያ አሳይ ኡባይ በእሺናነ ኑ ጾሳይ ስስሽን፥ መና ጎዳ ህንተንቱ ጾሳ አዛዙዋ ኡባ ህንተንቱ ምንሲደ ናጋና ማላ፥ ታን ህንተንቶ ኦዳይ። ያቶፐ፥ ህንተንቱ ሀ ሎኦ ቢታ ላታናነ ህንተንቱ ናናካ መናዉ ላትሳናዋ።

9“ሶሎሞና፥ ታ ናአዉ፥ ነ አዉዋ ጾሳ ኤራ። ነ ኩመን ዎዛናንነ ነ ኤኖ ግያ ቆፋን አዉ ኪተታ። አያዉ ጎፐ፥ መና ጎዳይ ዎዛና ኡባ ቆሬ፤ ቆፋን ደእያ ሀልቹዋ ኡባካ ኤሬዳ። ኔን አ ኮዮፐ፥ እ ነዉ ቤታና፤ ሽን ኔን አ አጎፐ፥ እ ኔና መናዉ አግ ባሻና። 10ሀእካ ጌሻ ጎልያ ኬጻናዉ መና ጎዳይ ኔና ዶሬዳዋ ዶጎፓ። ምናደ ኪታ ኪተታ” ያጌዳ።

11ሄዋፐ ጉይያን፥ ዳዊተ ባረ ናኣ ሶሎሞናዉ ጌሻ ጎልያ ኬጽያ ሀልቹዋ እሜዳ፤ ባራንዳ ሀልቹዋ፥ ሚሻ ምንጅያ ሳኣ ሀልቹዋ፥ ቦላ ክፍልያነ ግዶ ክፍልያ ሀልቹዋነ ናጋራይ አቶ ጌተትያ ሳኣ ቁምእያ ዎያ ክፍልያ ሀልቹዋ እሜዳ። 12ቃይካ ዳዊተ አዉ መና ጎዳ ጌሻ ጎልያ ዳባባ ኬጻናዉ ባረ ቆፋን ደእያ ሀልቹዋ፥ አ ዩሹዋን ደእያ ኡባ ክፍለቱ ሀልቹዋነ ጾሳ ጌሻ ጎልያ ሚሻ ምንጅያ ሳአቱነ ጾሳዉ ዱማይ ዎዳ እሞታ ምንጅያ ሳአቱ ሀልቹዋ እሜዳ።

13ሄዋዳንካ ዳዊተ ቄሳቱ ነ ሌዋቱ ጩጎቱ ባረንቱ ኪታ ኦና ማራ፥ መና ጎዳ ጌሻ ጎልያ ኪታ ኦና ማራነ ጌሻ ጎልያ ሚሻቱዋ ናግያ ማራ ኦድያ ሀልቹዋ አዉ እሜዳ።

14ቃይካ ዳዊተ ሀዋፐ ካሊደ ጻፈቴዳ ዱማ ዱማ ሚሻቱዋ መናዉ ዎይሳ ኬሻ ዴጽያ ዎርቃነ ዎይሳ ኬሻ ዴጽያ ብራ ኮሽንቶ ጻፊደ፥ ሶሎሞናዉ እሜዳ። 15ሄዋንቱካ፥ ዎርቃ ጾምፐቱዋ ዎያ ባላነ ዎርቃ ጾምፐቱዋ፥ ብራ ጾምፐቱዋ ዎያ ባላነ ብራ ጾምፐቱዋ፥ 16ጾሳ ስንን ኡክ ዎያ ዎርቃ ጻርጴዛቱዋ፥ ብራ ጻርጴዛቱዋ፥ 17ዎርቃ ኦይቂያዋ፥ ዎርቃ ከረቱዋ፥ ዎርቃ ዋንጫቱዋ፥ ዎርቃ ኩይጻሮቱዋ፥ ብራ ኩይጻሮቱዋነ 18እጻና ጩዋይያ ጌሻ ዎርቃ ሳጽንያ። መና ጎዳ ቃላ ጫቁዋ ታቦታ ቦላ ባረንቱ ቀፍያ ምጪደ ካምያ፥ ክሩበላ ዎያ ዎርቃ ጋርያ ጊግስያ ሀልቹዋካ አዉ እሜዳ። 19ዳዊተ፥ “መና ጎዳይ ባረ ኩሽያ ታ ቦላ ዎደ፥ ሀ ጻፈቴዳ ሀልቹዋ ኡባ ታና ኤርሴዳ” ያጌዳ።

20ሄዋፐ ጉይያን፥ ዳዊተ ባረ ናኣ ሶሎሞና፥ “አይነ ባዋ፤ ምና! ኦሱዋ ኦ! መና ጎዳይ ጾሳይ፥ ታ ጾሳይ ኔናና ደእያ ድራዉ፥ ያዮፓ፤ ዳጋሞፓ! መና ጎዳ ጌሻ ጎልያ ኪታይ ፖለታና ጋካናዉ፥ ጾሳይ ኔና የገናነ አገና። 21ጾሳ ጌሻ ጎልያን ደእያ ኦሱዋ ኡባዉ ቄሳቱ ነ ሌዋቱ ሱንት ኡቴድኖ። ኩሽያ ሂላ ኤራይ ደእያ አሳይ ኡባይ ኔና ኦሱዋ ኡባን ማዳና። ካፓቱነ አሳይ ኡባይ ነዉ ኡባባንካ አዛዘታና” ያጌዳ።

Currently Selected:

1 ኦዱዋ 28: DFBE

Highlight

Copy

Compare