1 ኦዱዋ 11

ዳዊተ ካተቱሳነ የሩሳላመ ኦይቁሳ

(11:1-9)

ዳዊተ እስራኤልያንነ ይሁዳን ካተቴዳ

(2 ሳሜላ 5:1-10)

1ሄዋፐ ጉይያን፥ እስራኤልያ አሳይ ኡባይ እትፐ ከብሮናን ደእያ ዳዊታኮ ሺቂደ፥ “ኑን ነ ሱነ ነ አሹዋ። 2ካሰ ሳኦል ካትያ ግዲደ ደእያ ዎደካ፥ እስራኤልያ አሳ ኦላዉ ካለዳዌ ኔና። መና ጎዳይ ነ ጾሳይ ኔና፥ ‘ታ አሳ እስራኤልያ ኔን ሄማና፤ ኡንቱንቱ ቦላካ ኔን ካተታና’ ያጌዳ” ያጌዳ። 3ሄዋ ድራዉ፥ እስራኤልያ ጭማቱ ኡባይ ካትያ ዳዊታኮ ከብሮነ ካታማ ዬድኖ፤ እ ኡንቱንቱና ከብሮናን መና ጎዳ ስንን ቃላ ጫቁዋ ጫቀቴዳ። መና ጎዳይ ሳመላ ባጋና ሃሳዬዳ ቃላዳን፥ ዳዊተ እስራኤልያ ቦላ ካተታናዳን ኡንቱንቱ አ ኦኬድኖ።

4ዳዊተነ እስራኤልያ አሳይ ኡባይ የሩሳላመ ካታማ ቤድኖ። ሄ ዎደ ያቡሳ አሳቱ ሄ ሳኣን ደእያ ድራዉ፥ ሄ ካታማይ ያቡሳ ጌተቴ።#ኢያሳ 15:63፤ ዳና. 1:21 5ያቡሳ አሳቱ ዳዊታ፥ “ኔን ሀ ካታማ ገላናዉ ኡባካ ዳንዳያካ” ያጌድኖ። ግዶፐነ፥ ዳዊተ ጽዮነን ደእያ ኡንቱንቱ ጌሳቱዋ ኦይቄዳ፤ ጽዮነ ዳዊታ ካታማ ጌተቴዳ። 6ዳዊተ ባረ ኦላንቻቱዋ፥ “ያቡሳ አሳቱ ካሰት ኦልያ ኦንነ ኦላ ጋዳዋ ግዳናዋ” ያጌዳ። ጻሩይ ናአይ ዮኣበ ካሰት ቢደ ኦሌዳ፤ ያቲደ ጋዳዋ ግዴዳ። 7ዳዊተ ሄ ጌሱዋን ደኤዳ፤ ሄዋ ድራዉ፥ ሄ ካታማይ ዳዊታ ካታማ ጌተቴዳ።

8ዳዊተ ሚሎፐ ዶሚደ፥ ሄ ካታማ ዛረደ ኬጼዳ፤ አቴዳ ካታማ ቃይ ዮኣበ ዛረደ ኬጼዳ። 9ኡባፐ ዎልቃማ መና ጎዳይ አናና ደእያ ድራዉ፥ ዳዊተ ምን ምኒደ ቤዳ።

ዋርያና ደእያ ዳዊታ ዎታዳራቱዋ

(11:10—12:40)

ዳዊታ አሳቱዋ ምኖታ

(2 ሳሜላ 23:8-39)

10ዳዊታ አሳቱ ምኖቱ ሀዋፐ ካሊደ ጻፈቴድኖ። መና ጎዳይ እስራኤልያባ ሃሳዬዳዋዳን፥ ዳዊተ ካተታና ማላ፥ ሀ አሳቱ እስራኤልያ አሳና ግዲደ፥ ሎይ ማዴድኖ። ቃይ አ ካዉተካ ምንሴድኖ።

11ዳዊታ አሳቱ ምኖቱ ሀዋፐ ካሊደ ጻፈቴዳዋንታ። ኡንቱንቱፐ ሄዛቱ ሎይ ኤረቴዳዋንታ። ሄዛቱዋፐ ኮይሩ ሀክሞናፐ ዬዳ ያሾብኣማ፤ ያሾብኣም እት ገደ ኦላን ሄዙ ጼቱ አሳ ባረ ቶራን ዎዳ። 12ሄዙ ምኖ አሳቱዋ ግዶን አ ካሊደ ደእያዌ አሆህያ ዶዶ ናኣ ኤልኣዛራ። 13-14ፕልስጼማ አሳቱ ኦለታናዉ ፓስዳምማ ግያ ሳኣ ሺቄዳ ዎደ፥ ኤልኣዛረ ዳዊታና እትፐ ደኤ። እስራኤልያ ኦላንቻቱ ፕልስጼማ አሳቱዋ ስንፐ ባቃትያ ዎደ፥ ኤልኣዛረ ባንጋ ሾይቃን ደኤ። እነ ዳዊተነ ሾይቃ ግዱዋን ኤቂደ፥ ፕልስጼማ አሳቱዋና ኦለቴድኖ። መና ጎዳይ ዎልቃማ ጾኑዋ እሚደ፥ ኡንቱንቱ አሼዳ።

15ፕልስጼማ ኦላንቻቱ ራፋይማ ዎምባን ዱንካኔዳ ዎደ፥ ሀታሙ ካፓቱዋፐ ሄዛቱ ዳዊተ ደእያ አዱላማ ጎንጎሉዋን ደእያ ዛላኮ ዬድኖ። 16ሄ ዎደ ዳዊተ ጌሱዋ ግዶን ደኤ፤ ፕልስጼማ ኦላንቻቱ ጩጉ ቤታልሄመን ደኤ። 17ዳዊተ ሃ ኡሻናዉ አሞቲደ፥ “ቤተሌመ ካታማ ፐንግያ ምይያን ደእያ ፑልቱዋ ሃፐ ታና ኦን ኡሻንዴሻ!” ያጌዳ። 18ሄዙ ምኖ አሳቱ ፕልስጼማ አሳቱ ዱንካኔዳ ሳኣ ፕን ቢደ፥ ቤተሌመ ካታማ ፐንግያን ደእያ ፑልቱዋፐ ሃ ዱቂደ፥ ዳዊታዉ አሄድኖ። ሽን ዳዊተ ኡሸናን እጼዳ፤ እ ሄ ሃ መና ጎዳ ስንን ትጌዳ። 19“ሀዋ ኡሻናዌ ታፐ ሃኮ! ባረንቱ ሸምፑዋ ኦለቲደ ቤዳ ሀ አሳቱዋ ሱ ታን ኡሾ? አያዉ ጎፐ፥ ኡንቱንቱ ባረንቱ ሸምፑዋ አ እሚደ፥ ሃ አሄድኖ” ያጌዳ። ሄዋ ድራዉ፥ ዳዊተ ሄ ሃ ኡሽቤና። ሄ ሄዙ ምኖ አሳቱ ሄዋ ኦድኖ።

20ዮኣባ እሻይ አብሻይ ሄዛቶ ካፑዋ። እ ባረ ቶራን ሄዙ ጼቱ አሳቱዋ ኦለቲደ ዎዳ። ያቲደ እካ ሀራ ሄዛቱዋዳን ኤረቴዳ። 21እ ላኤን ሄዛቱዋፐ አ ቦንቼቴዳ አሳ፤ እ ኡንቱንቶ ካፖ ግዴዳ። ሽን እ ሄ ኮይሮ ሄዛቱዋና ቃራ ግደና።

22ቃብጽኤላፐ ዬዳ ዮዳሄ ናአይ ባናይ ምኖ አሳ፤ ምኖ ኦሳቱዋ ኦዳ። እ ላኡ ኤረቴዳ ሞኣበ ጋድያ አሳቱ ዎዳ። ቃይ ሻቻይ ዳሬዳ እት ጋላስ ኦላ ግዶ ገሊደ፥ ጋሙዋ ዎዳ። 23ባናይ ጌሳይ እቼሹ ዋ ጋክያ ግብጼ ጋደ ብታንያ አዱሳ ዎዳ። ግብጼ ብታንያ ኩሽያን ሸማይንያ ዎንዳራሽያ ኬሻ ቶራይ ደኤ፤ ሽን ባናይ ጋትማ ኦይቂደ፥ ብታንያኮ ቤዳ። ሄ ብታንያ ኩሽያፐ ቶራ ወ አኪደ፥ አ ቶራን አ ዎዳ። 24ዮዳሄ ናአይ ባናይ ሀዋንታ ኦዳ። አ ሱንይካ ሄ ሄዛቱዋዳን ኤረቴዳ። 25እ ሀታማቱዋ ግዶን ዳሮ ቦንቼቴዳ፤ ሽን እ ሄዛቱዋና ጉጀተና። ዳዊተ አ ባረና ናግያ ኦላንቻቶ ካፑዋ ከሴዳ።

26ምኖ አሳቱ ዮኣባ እሻ አሳሄላ፥ ቤተሌመፐ ዬዳ ዶዶ ናኣ ኤልሀናና፥ 27ሀሮዳፐ ዬዳ ሻሞታ፥ ፕሎናፐ ዬዳ ሄሌጻ፥ 28ታቆአፐ ዬዳ እቄሻ ናኣ እራ፥ አናቶታፐ ዬዳ አብኤዘራ፥ 29ሁሻፐ ዬዳ ስባካያ፥ አሆህያ እላያ፥ 30ናጾፋፐ ዬዳ ማህራያ፥ ናጾፋፐ ዬዳ ባኣና ናኣ ሄሌዳ፥ 31ቢንያማ ጋድያን ደእያ ግብኣ ካታማፐ ዬዳ ርባያ ናኣ እታያ፥ ፕርኣቶናፐ ዬዳ ባናያ፥ 32ጋኣሻ ዛንጋራ ማታፐ ዬዳ ሁራያ፥ አራባፐ ዬዳ አቢኤላ፥ 33ባህሩማፐ ዬዳ አዝማዌታ፥ ሻአልቦናፐ ዬዳ ኤልያህባ፥ 34ጊዞናፐ ዬዳ ሀሼማ፥ ሃራራፐ ዬዳ ሻገ ናኣ ዮናታና፥ 35ሃራራፐ ዬዳ ሳካራ ናኣ አህኣማ፥ ኡራ ናኣ ኤልፋላ፥ 36ማኬራፐ ዬዳ ሄፌራ፥ ፕሎናፐ ዬዳ አኪያ፥ 37ቃርመሎሳፐ ዬዳ ሄጽራ፥ ኤዝባያ ናኣ ናእራያ፥ 38ናታና እሻ ዩኤላ፥ ሃግራ ናኣ ምብሃራ፥ 39አሞናፐ ዬዳ ጸለቃ፥ ጻሩይ ናኣ ዮኣባ ኦላ ሚሻ ቶክያ ባኤሮታፐ ዬዳ ናህራያ፥ 40ያትራ ያራ ግድያ እራ፥ ያትራ ያራ ግድያ ጋሬባ፥ 41ሂትያ ኡርዮና፥ አህላያ ናኣ ዛባዳነ 42ሮቤላ ዛርያ ግድያ ሺዛ ናኣ አዲና። እ ሮቤላ ዛራቱዋ ካፑዋ፤ አናና እትፐ ሀታሙ አሳቱ ደኢኖ። 43ሀራ ምኖ አሳቱ ቃይ ማእካ ናኣ ሀናና፥ ምታናፐ ዬዳ ዮሻፋጻ፥ 44አሽታራፐ ዬዳ ኦዝያና፥ አሮኤራፐ ዬዳ ሆታማ ናና ሻማአነ ይእኤላ፥ 45ሺምራ ናኣ ይድኤላነ አ እሻ ቲጻፐ ዬዳ ዮሀ፥ 46ማሃዋፐ ዬዳ ኤልኤላ፥ ኤልናኣማ ናና ይሪባያነ ዮሻውያ፥ ሞኣበ ጋድያፐ ዬዳ ይትማ፥ 47ጾባ ካታማፐ ዬዳ ኤልኤላ፥ ዮቤዳነ ያእስኤላ።

Currently Selected:

1 ኦዱዋ 11: DFBE

Highlight

Copy

Compare