Roome 3

Ayihuudikokki abddiwaatti

1Hayya Ayihuudi laanokkotti laɂo metta? Hamas'issamano me laɂo aba? 2Maamisikki raadiinna Ayihuudi laano laɂo tammooggantta, dubbaankko t'aye haafura kawaa hadaraa kakkonsisamera isoonya. 3Ayihuudikko kookkoonna ammano gowaayigireen ammano waattikkiso abddamano kawaa laɂo kallayikki yelara? 4Duuddo lakkoyello! Ibaaddo dubba t'araameessa golleenna, Waa goɂameen karrummiya;

«Haafurakaakko kakkeey karrummii laatta;

Diinakkaanna firddaa awodinatta» amame goggos'aafamerooya.

5Meellanetaani k'ullumma tawaa aaloo tatusatto golleete me amin daanddaanna? Waa noo gutii enggetatteessa keenano rummi kafirddaro lakkoyo amanoya? Yaada kaɂibaaddo aani ayeesara amanoya. 6Ogiraan haa liin lakkodaanddaaro; hikkamalee lii girewa Waa alamii gutii misii firddin daanddaara?

7«Ani t'araameessa laano Waakkotti rummi katusarona, kabaja kaɂadaro gollee, c'ubbaaleessa amame gidda gin misi firddaamara?» 8«Idane goggoɂemeettoon meellane felnna amaraan amaa ibaaddo kookkoo goggoɂayeesareeyya;» hinɂa ibaaddojja gutii kaginnara firdda likkiiya.

Maayyona k'ulluukki lakkogiro

9Goortta me aminanna noo isokko rooranna? Duuddo lakkorooranno; Ayihuudina leereen Ayizaab, c'ubbo orroo girano t'ayine addeesinsse seginenna. 10Haa amame goggos'aafameroo,

«Koonna duuddo k'ulluukki lakkogiro;

11Kashaadara laagiro,

Waa kadootara koonna laagiro.

12Dubbana shirmeraan

Raattoo laɂo kallayinɂi leeraan,

Taɂidan kafelara maayona duuddo laagiro.»

13Hiɂittisona kameellan ayees ayeesin kabbaaname gumbbi kak'amal aanitittitta;

Errebkisona sobaanje jiinaatara,

Hiɂitisookko kabeyaara ayees marzzii tahabeessa aankkikkiya;

14Hiɂittiso k'anggoonna kaɂokokootaro ayeesii taɂammaganttetta;

15Luk'k'aɂoottiso ibaaddo lagadin ojjeeraranyan;

16Kakkoseetaraan raakkisoo dubbaa baanowunna rakkoowun aalanttiyaan.

17Kanogoddaa raanna lakkokasaan.

18«Waa abissatano suure isoo dollee lakkomutaro.»

19Kaseera ajaja kakkondootisara seera hegelii obaraarawun laano kanssowa; hitta aalanttii ibaaddo kaɂaalaro waatere c'alɂi amara; alami dubba firdda kawaayi kabbaasero linnara. 20Haanssun seera kamuse ooratanooyi maayona Waayi horee k'ulluukkiya amamiin lakkodaanddaaro; seera ibaaddo dubba c'ubbaaleessa laano tusara.

Ammanoo tahelamatto k'ullumma

21Gidda goɂameen Waa ibaaddo kakkok'ullooyisara seera kamusekko kalekki raayi laano tusara; hikki Museyinna kahegerooyi atotaamera. 22Hitti tawaa k'ullumma assaabnjje kallayi Yesuusa Kiristoosaa ammananooyi tahelamatto k'ullummatta. 23Aalanttina ibaaddo dubba c'ubbo felera, isona kabaja tawaa waateraan. 24Yesuusa Kiristoosaa talleete wodooyi adda sinotteessayi k'ulloyeeran, 25Waa Yesuusa Kiristoosa jaarsso yele kakkoonkeenera usuu kaɂammanara dubba, iigikkeessaa c'ubbokko haheso amamano goggohelaronya; Waa hikka yelano obssitteessayi kat't'awwoo c'ubbokkisoo kaginnon aani yelere kakkeessa firdda tusinya. 26Hikka geesii Waa metekkeessawun k'ulluukki laano katusara Yesuusayi kaɂammanaro dubba k'ulloyisanoyiya.

27Hayya no kakkodhaadanna meya kagira? Maamesinna lakkodhaadatanno! Goggodhaadannon aalantti metta tagitta? Seera kamuse mankkoɂooratanno maaranya? Lakkoyo; ayesuun goɂameen nonna kakkodhaadatanna ammanoyiyya. 28Haanssun Waa ibaaddo kakkok'ulloyisara, ibaaddo seera ooratano anlleennon giraan ammano laano kanssowa. 29Waa kaɂayihuudi Hedo kaalaalya? La kaɂayizaab Hedoneeyolla? Ii Ayizaabwunna Hedoya. 30Aalanttina kahamas'iisamenna kahamas'iisamoon giro ammanoo kak'ullooyisara Waa koo kaalaalya. 31Hayya haa gollee ammanokko kakkeeyi seera laɂo kallayikki yelin daanddaanna? Ijjii lakkodaanddaanno, suurewa seera ataayisiin kuwaarre.

Currently Selected:

Roome 3: BayNT

Highlight

Copy