रोमियो 6
6
पाप के ताँई मौत मगर मसी मै जिन्दगी
1तौ फिर हम का कैंऐ? का हम पाप करते रैहऐ, ताकि परमेसर की किरपा बढ़ती रैह? 2बिलकुल ना। हम जो पाप के ताँई मर चुके हैं, तौ पाप मैई कैसे जींगे 3का तुम लोग जौ ना जानौ हौ कै जो हम सबनै ईसु मसी के नाम सै जल संस्कार लेओ है बौ उसकी मौत को जल संस्कार है। 4#कुलु 2:12इसताँई उसकी मौत को जल संस्कार पानै सै हम उसके संग दफनाए गए हैं, ताकि जैसे परम पिता की महिमा के दुआरा मरे भएऔं मैसै ईसु मसी जिन्दो करो गओ, बैसेई हम बी एक नई जिन्दगी पांऐ।
5अगर हम उसकी मौत मै उसके संग रैहऐ तौ उसके जैसे फिर सै जी उठनै मै बी उसके संग जरूर हौंगे। 6हमकै कबी जौ ना भूलनो चँईऐ कै हमरो पुरानो सौभाब ईसु के संग कुरूस मै चढ़ा दओ गओ है, जिस्सै पाप को सरीर मर जाऐ और हम फिर सै पाप के दास ना बन पांऐ। 7कैसेकै जो मर गओ है, बौ पाप की गुलामी सै आजाद हो गओ है।
8और अगर हम मसी के संग मर गए, तौ हमरो जौ बिसवास है, कै हम उसके संग जींगे बी। 9कैसेकै हम जौ जानै हैं, कै मसी मरे भएऔं मै सै जी उठनै के बाद फिर कबी ना मरैगो। अब मौत को उसके ऊपर कोई हक ना है। 10कैसेकै जो मर गओ तौ बौ पाप के ताँई एकई बार मरो, पर जो जी रओ है, बौ परमेसर के ताँई जी रओ है। 11तुम बी ऐंसेई अपने ताँई सोचे करौ, कै तुम पाप के ताँई मर चुके हौ, पर ईसु मसी मै परमेसर के ताँई जिन्दे हौ।
12इसताँई तुमरे मरनै बारे सरीर के ऊपर पाप को राज ना होन देईओ। जिस्सै कै तुम सरीर की गलत इच्छाऔं के ऊपर कबी ना चलौ। 13तुम अपने सरीर के अंगौ कै अधरम के औजारौं जैसे पाप के हवाले मत करौ, बलकन मरे भएऔं मै सै जी उठनै बारौं के जैसे परमेसर के हवाले कर दो। और अपने सरीर के अंगौ कै धरम के औजारौं के रूप मै परमेसर के हवाले कर दो। 14तुम लोगौ के ऊपर पाप को कोई हक ना रैहगो, कैसेकै अब तुम नियम के बस मै ना हौ बलकन परमेसर की किरपा के बस मै हौ।
धारमिकता के गुलाम
15तौ हम का करैं? हम नियम के बस मै ना हैं पर परमेसर की किरपा के बस मै हैं, इसको मतलब जौ तौ ना है कै हम पाप करते रैंह? बिलकुल ना। 16का तुम जौ ना जानौ हौ कै जब तुम किसी की आगियाँ माननै के ताँई अपने आपकै दासौं के हाँई सौंप देवौ हौ। तौ तुम उसई के दास हौ। फिर चाँहे तुम पाप के दास बनौ, जो तुमकै मौत की ओर ले जागो। चाँहे परमेसर की आगियाँ माननै बारे दास बनौ, जो तुमकै धारमिकता की ओर ले जागी। 17पर परमेसर को धन्नबाद हो, कै तुम जो पाप के दास हे, तौबी तुम मन सै उस सिक्छा मै चलल लगे, जो तुमकै देई गई हैं। 18तुम पाप सै आजाद करे गए हौ और धारमिकता के दास बन गए हौ। 19मैंनै तुमकै जौ उदाहरन इसताँई दओ कैसेकै जौ बात समजनी तुमरे ताँई मुसकल है। जैसे तुमनै बुराई के ताँई अपने सरीर के अंगौ कै असुद्द और गलत कामौ को दास बनाओ, बैसेई अब तुम पबित्तर होनै के ताँई अपने सरीर के अंगौ कै धारमिकता को दास बनाओ।
20कैसेकै तुम जब पाप के दास हे तौ धारमिकता की ओर सै आजाद हे। 21और देखौ उस टैम तुमकै उन पुराने करमौ सै का फाएदा भओ? अब उनके कारन तुमकै सरम लगै है, कैसेकै उनको फल मौत है। 22मगर अब तुम पाप सै आजाद होकै परमेसर के दास बन गए हौ। और तुमकै फल मिलैगो बौ तुमकै सुद्द बनागो उसको अन्त को फल हमेसा की जिन्दगी है। 23पाप की डिहाड़ी तौ मौत है, मगर परमेसर को बरदान हमरे परभु ईसु मसी मै हमेसा की जिन्दगी है।
Currently Selected:
रोमियो 6: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
