रोमियो 4
4
इब्राहिम उदाहरन
1तौ अब हम का कैंऐ जो हमरे खानदान को पैलो बुजरग इब्राहिम हो उसकै का मिलो? 2कैसेकै अगर इब्राहिम अपने करमौ के बजै सै धरमी ठैराओ गओ, तौ बौ अपने ऊपर घमंड कर सकै है। मगर बौ परमेसर के सामने ऐंसो ना कर सकै है। 3#गला 3:6कैसेकै पबित्तर सास्तर मै लिखो है, “इब्राहिम नै परमेसर मै बिसवास करो और उस बिसवास सै परमेसर नै उसकै धरमी ठैराओ है।”
4काम कन्नै बारे कै मजदूरी देनी कोई दान ना है, बौ तौ उसको हक है। 5अगर कोई आदमी नियम के कामौ कै कन्नै के बजाए उस परमेसर मै बिसवास करै है, जो लोगौ के पापौं कै मिटा देवै है, तौ उसको बिसवासई उसकै धरमी ठैरागो। 6ऐंसेई दाऊद बी उस आदमी कै धन्न कैबै है, जिसकै परमेसर बिना करमौ केई धरमी ठैराबै है।
7“धन्न हैं बे जिनके अधरम के काम माफ भए,
और जिनके पाप ढक दए।
8धन्न है बौ आदमी जिसके पापौं को
हिसाब परमेसर ना लेबै है।”
9तौ का जौ आसीस खतना बारौ केई ताँई है या उनके ताँई बी है, जिनको खतना ना भओ है? कैसेकै हम कैबै हैं, कै इब्राहिम नै बिसवास करो और बौ धरमी गिनो गओ। 10तौ उसकै धरमी कब ठैराओ? का खतना के पैले? या खतना के बाद? बाद मै ना पर उसकै धरमी खतना के पैलेई सै गिनो गओ हो। 11खतना होनै सै पैलेई इब्राहिम कै बिसवास के दुआरा धरमी ठैराओ गओ। बाकै धारमिकता साबित कन्नै के ताँई छाप मिली। इसताँई बौ उन सबको अब्बा ठैरो, जो बिना खतना के बिसवास करैं हैं जिस्सै कै बे धरमी ठैराए जाँय। 12और बौ उनको बी अब्बा है जिनको खतना भओ है, और जो हमरे अब्बा इब्राहिम के उस बिसवास के रस्ता मै चलैं हैं, जो उनकै खतना सै पैले दिखाओ हो।
बिसवास और परमेसर को बचन
13 #
गला 3:29
इब्राहिम या उसके बंस कै जौ बादो मिलो कै बे दुनिया के हकदार ठैरंगे, जौ नियम सै ना बलकन उस धारमिकता सै, जो बिसवास सै मिलै है। 14#गला 3:18अगर जा नियम कै माननै बारे हकदार हैं, तौ बिसवास को कोई मतलब ना है और बादो बी बेकार है। 15नियम तौ घुस्सा कै लेकै आवै है मगर जहाँ नियमई ना हैं तौ बहाँ नियम कै का तोड़ैं?
16 #
गला 3:7
इसताँई सई बात जौ है कै बादो बिसवास को फल है जो किरपा के हिसाब सै है। ताकि इब्राहिम के सिगरे टब्बर के ताँई पक्को हो, ना सिरप नियम कै माननै बारौ के ताँई पर उन सबई ताँई बी जो इब्राहिम के जैसो बिसवास रक्खै हैं, कैसेकै बौ हम सबको अब्बा है। 17पबित्तर सास्तर मै लिखो है, “मैंनै तेकै भौस्सी जातिऔं को अब्बा ठैराओ है।” उस परमेसर की नजरौ मै जिसके ऊपर इब्राहिम नै बिसवास करो हो, जो मरे भएऔं कै जिन्दो करै है और जो चीज हैई ना, बौ परमेसर के कैनै सैई बन जावै है।
18जहाँ उमीदई ना ही बहाँ इब्राहिम नै उमीद के संग बिसवास करो, कै बौ भौस्सी जातिऔं को अब्बा बन जागो, जैसो पबित्तर सास्तर मै कैओ गओ हो, “तेरो बंस भौत बड़ो होगो।” 19पर इब्राहिम जानै हो कै मेरो सरीर कमजोर है और सौ साल को हो गओ है और सारा कै बी औलाद ना हो सकै ही, फिर बी उसनै अपने बिसवास कै पक्को रक्खो। 20इब्राहिम नै सक ना करो। और परमेसर के बादे मै बिसवास बनाए रक्खो। और बिसवास कै पक्को करते भए परमेसर की बड़ाई करी। 21उसकै पक्को बिसवास हो कै परमेसर नै उसकै जो बादो देर खाओ है, बौ बाकै जरूर पूरो कर सकै है। 22इस बिसवास की बजै सैई परमेसर नै इब्राहिम कै धरमी मानो है। 23जैसो पबित्तर सास्तर मै लिखो है कै, “बिसवास सैई बौ धरमी ठैरो,” जौ बचन सिरप इब्राहिम केई ताँई ना है। 24बलकन हमरे ताँई बी है। जो परमेसर के ऊपर बिसवास करै है, बौ धरमी ठैरै है। परमेसर नै हमरे परभु ईसु कै फिर सै जिन्दो करो। 25परमेसर नै ईसु कै हमरे पापौं के बजै सै मरनै के ताँई दे दओ, बाई नै हमकै धरमी बनानै के ताँई मरे भएऔं मै सै ईसु कै फिर जिन्दो कर दओ।
Currently Selected:
रोमियो 4: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
