रोमियो 13
13
राज कन्नै बारे की आगियाँ मानौ
1हर एक आदमी अधकारिऔं के आधीन रैह, कैसेकै ऐंसो कोई अधकार ना है, जो परमेसर की ओर सै ना होए। और जो अधकारी हैं बे परमेसर की ओर सै बनाऐ गए हैं। 2इसताँई जो अधकार को बिरोद करै है, बौ परमेसर की आगियाँ को बिरोद करै है। और जो परमेसर की आगियाँ को बिरोद करैं हैं, बे सजा पांगे। 3कैसेकै अधकारी अच्छे काम कन्नै बारौ कै ना, पर बुरे काम कन्नै बारौ कै डरावै है। अगर तुम अधकारी सै बिना डरे रैहनो चाँहौ हौ, तौ अच्छे काम करौ और बे तुमरी बड़ाई करंगे।
4कैसेकै बे तुमरी भलाई के ताँई परमेसर के सेवक हैं। पर अगर तुम बुरे काम करौ हौ, तौ उनसै डरौ, कैसेकै बे तरवार कै बेकार मैई ना लेए फिरै हैं। बे परमेसर के सेवक हैं, जो बुरे काम कन्नै बारौ कै परमेसर की ओर सै सजा देवै हैं। 5इसताँई अधकारिऔं के नीचे रैहनो जरूरी है, सजा के बजै सै ना बलकन अपने मन की अबाज सै बी आधीन रैहनो जरूरी है।
6 #
मत्ती 22:21; मरकु 12:17; लूका 20:25 इसताँई तौ तुम लोग लगान बी चुकाबौ हौ कैसेकै अधकारी परमेसर के सेवक हैं, और बे हमेसा इनई कामौ मै लगे रैहबैं हैं। 7और जिसकै जो कुछ देनो है, उसकै चुका दे। जो लगान चुकानी है, उसकै चुकाऔ। जिस्सै तेकै डरनो चँईऐ तू उस्सै डर, जिसकी इज्जत कन्नी चँईऐ उसकी इज्जत कर।
पियार को नियम
8आपसी पियार के अलाबा और किसी बात मै किसी के करजदार ना बनौ कैसेकै जो दूसरौं सै पियार करै है, बौ ऐंसेई नियम कै पूरो करै है। 9“बईयरौं के संग गलत काम मत करौ, खून ना करौ, चोरी मत करौ, लालच मत करौ” कैसेकै इन सब हुकमौ को निचोड़ जौ है कै, “अपने पड़ोसी सै अपने जैसोई पियार रक्खौ।” 10पियार पड़ोसी की बुराई ना करै है, इसताँई पियार रखनो नियम कै पूरो कन्नो है।
11तुम लोग जानौ हौ कै नींद सै जगनै को टैम आ चुको है। जिस टैम हमनै बिसवास करो हो, उस टैम के हिसाब सै बी जादा अब हमरी मुक्ति धौंरे है। 12रात लगभग बीतई चुकी है, दिन लिकर नैई बारो है, इसताँई हम उन कामौ कै छोड़ दैं जो इन्धेरे के हैं। आऔ हम उज्जेरे के औजारौं कै ले लैं। 13हम बैसेई रैहऐ जैसे दिन के टैम मै रैहबैं हैं। और दाबतौं मै खाकै पीकै धुत्त ना होओ, बईयरौं के संग गलत काम ना करौ, भोग-विलास मै ना पड़ौ, लड़ाई, और ना किसी सै जरन रक्खौ। 14बलकन परभु ईसु मसी कै अपने भीतर बसालो, और अपने सरीर की इच्छाऔं कै पूरो कन्नै मै मत लगे रैहऔ।
Currently Selected:
रोमियो 13: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
