इफिसिऔ 1
1
1 #
चेलौ 18:19–21; 19:1 पबित्तर लोगौ और मसी ईसु मै सच्चे बिसवासिऔ के नाम जो इफिसुस सैहर मै रैहबैं हैं, मैं पौलुस जो परमेसर की मरजी सै मसी ईसु को भेजो भओ चेला हौं, जौ चिट्ठी लिख रओ हौं।
2तुमकै हमरे पिता परमेसर और परभु ईसु मसी की ओर सै किरपा और सान्ति मिलती रैह।
मसी मै आत्मिक आसीस
3हमरे परभु ईसु मसी के परमेसर और अब्बा की बड़ाई हो। बानै हमकै मसी मै सुरग के सिगरे आत्मिक बरदान दए हैं। 4-5दुनिया बनानै सै पैलेई परमेसर नै हमकै मसी मै छाँट लओ हो कै, हम बाके सामने पबित्तर और निरदोस बन सकैं। और जो पियार बौ हम सै करै है, बा बजै सै बानै ईसु मसी के दुआरा हमकै पैलेई अपनी औलाद ठैराओ और जौ बाई की मरजी और योजना ही। 6परमेसर की महिमा सै भरी भई किरपा की बड़ाई हो, और बौ किरपा हमकै बाके लौंड़ा के दुआरा मिली है जिस्सै बौ पियार करै है। 7#कुलु 1:14हमकै मसी मै मसी की मौत के दुआरा छुटकारो मतलब पाप की माफी मिली है। जौ परमेसर की भौस्सी किरपा सै मिलो है। 8जौ किरपा बानै सिगरी बुद्धि और समज के संग हमकै खूब दई है। 9अपनी इच्छा को भेद हमकै बानै अपने भले मकसद के अनुसार परकट करो, बा योजना कै मसी मै पूरो कन्नै के ताँई पैलेई फैसला करो हो। 10परमेसर की ठैराई भई योजना जौ ही कै जब सई बखत आगो तौ मसी मै सुरग की और धरती की सिगरी चीजौ कै इखट्टो करैगो।
11सबई कुछ अपने मकसद और इच्छा के अनुसार काम कन्नै बारे परमेसर नै पैलेई तय करो और अपनी योजना के अनुसार मसी मै हमकै बाको लौंड़ा होनै के ताँई छाँटो है। 12जिस्सै कै हम बाकी बड़ाई की बजै बन सकैं। और मसी मै बिसवास कन्नै बारे सबई सै पैले हम हे। 13तुम लोगौ नै सच्चाई को बचन अपनी मुक्ति की अच्छी खबर कै सुन्नै के बाद मसी मै बिसवास करो, और तुमरे ऊपर परमेसर नै मौहर के रूप मै पबित्तर आत्मा दओ जिसको बादो परमेसर नै करो हो। 14जब तक हमरो छुटकारो ना हो जाय तब तक हमरी बिरासत के ताँई जौ पबित्तर आत्मा बियाने के रूप मै देर खाओ है जिस्सै कै परमेसर की महिमा होए।
पौलुस की पिराथना और धन्नबाद
15इसताँई मैंनै बी तुमरे बिसवास के बारे मै जो परभु ईसु मै है, और जो पियार तुम परमेसर के सैरे पबित्तर लोगौ के संग करौ हौ बाके बारे मै सुनकै 16मैं तुमरे ताँई परमेसर को हमेसा धन्नबाद करौ हौं, और अपनी पिराथनाऔ मै याद करौ हौं। 17मैं जौ पिराथना करौ हौं कै हमरे परभु ईसु मसी को परमेसर जो महिमा सै भरो भओ अब्बा है, बौ तुमकै बुद्धि और परमेसर कै परकट कन्नै बारी आत्मा दे, जिस्सै कै तुम बाकै अच्छे सै जान सकौ।
18मेरी जौ बी पिराथना है कै तुमरे मन की आँख खुल जाँय और तुम जौ जान सकौ कै बाके बुलानै सै तुमकै कितनी बड़ी आस मिली है, और जिस बिरासत कै बौ अपने पबित्तर लोगौ कै देगो बौ कितनो महान और महिमा सै भरी भई है। 19और हम बिसवास कन्नै बारौ के भीतर काम कन्नै बारी बाकी महान सकति ऐंसी है जिसकी कोई थाह ना है बाकै बी जान सकैं। 20परमेसर नै मसी मै बौई महान सकति कै दिखाओ जब बानै बाकै मरे भएऔं मै सै फिर सै जिन्दो करकै सुरग मै अपने खाने हात की ओर बिठाओ। 21मसी, सिगरे राजाऔं और अधकारिऔं और सकतिऔं और सिगरे राज कन्नै बारौ और ऊँचे पद बारौ के सबई के ऊपर है, जो सिरप इस युग मै ना पर आनै बारे युग मै बी रैहगो। 22#कुलु 1:18परमेसर नै सबई कुछ मसी के पाँऐऔं के नीचे कर दओ है और सिगरी चीजौ के ऊपर अधकार रखनै बारे मसी कै बिसवासिऔ की मंडली कै दे दओ। 23बिसवासिऔ की मंडली मसी को सरीर है, और जौ बाकी भरपूरी है। और मसी सबई मै सबई कुछ पूरो करै है।
Currently Selected:
इफिसिऔ 1: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
