चेलौ के काम 7
7
सितेफनुस को परचार
1तब बड़े पुजारी नै सितेफनुस सै कैई कै, “का जौ बात सच्ची है?”
2सितेफनुस नै जबाब दओ, “हे भईयौ, और बुजरगौं मेरी बात सुनौ। हमरो अब्बा इब्राहिम हारान देस मै बसनै सै पैले जब मेसोपोटामिया जघै मै रैहबै हो तौ सकतिसाली परमेसर नै बाकै दरसन दओ, 3और कैई, ‘अपने देस और अपने लोगौ कै छोड़कै बा जघै मै चलो जा जिसकै मैं तेकै दिखांगो।’ 4तब बौ कसदियो को देस छोड़कै हारान देस मै जाकै बस गओ। और जब बाको अब्बा मर गओ तौ बाके बाद परमेसर नै बाकै जा देस मै बसा दओ जिसमै तुम अब तक बसे हौ। 5परमेसर नै बाके हक मै पाँऐ रखनै तक की बी जघै ना दई, और बाकी औलाद बी ना ही तब्बी परमेसर नै बाके संग जौ बादो करो कै ‘मैं जा देस कै तेकै और तेरे औलाद के हात मै सौंप दंगो।’ 6परमेसर नै बासै जौ कैई कै, ‘तेरी औलाद दूसरे देस मै परदेसी बनकै रैहंगे और चार सौ साल तक उनकै दास बनाकै रखंगे और उनके संग बुरो बरताब करंगे।’ 7फिर परमेसर नै कैई कै, ‘जिस किसी जाति के दुआरा उन लोगौ कै सताओ जागो मैं उनकै सजा दंगो और जाके बाद बे बा देस सै लिकरकै आंगे और जाई जघै मै मेरी सेवा करंगे।’ 8परमेसर नै इब्राहिम के संग खतना की रसम को बादो करो। तबई बाको लौंड़ा इसहाक पैदा भओ, और आठ दिन मै बाको खतना करो और इसहाक सै याकूब और याकूब सै बारैह गोत बने।
9“याकूब के लौंड़ा अपने भईया यूसप सै जरै हे और उनौनै बाकै मिसर देस मै दास बन्नै के ताँई बेच दओ, पर परमेसर बाके संग हो। 10इसताँई परमेसर नै यूसप कै सिगरे दुखौ सै बचाओ और बुद्धि दई और मिसर के राजा की नजरौ मै बाके ताँई किरपा भरी और राजा नै बाकै अपने देस और राजमहल को अधकारी बना दओ। 11तबई मिसर और कनान देस मै अकाल पड़ो जिसकी बजै सै भौस्सी मुसीबत आँई और हमरे बापदादौं कै खानै के ताँई नाज ना मिलो। 12पर जब याकूब कै जौ पतो चलो कै मिसर मै नाज मिल रओ है तौ बानै अपने बालकौ कै जो हमरे बुजरग हैं बहाँ पैली दफै भेजो। 13जब बे नाज लैनै बहाँ दूसरी दफै गए, तौ यूसप नै अपने भईयौ के सामने आकै अपने बारे मै बोलो कै ‘मैं तुमरो भईया हौं’ जिस्सै कै बहाँ के राजा कै यूसप के टब्बर के बारे मै पतो लग गओ। 14तब यूसप नै अपने अब्बा याकूब और अपने सिगरे टब्बर के लोगौ कै बुलाबो भेजो बे कुल मिलाकै पिचत्तर जनी हे। 15जब याकूब मिसर देस मै बस गओ तौ बौ और हमरे बुजरग बहीं मर गए। 16और बाद मै उनकी लाहसौं कै सेकेम सैहर की बा कबर मै दफनाओ गओ हो जिसकै इब्राहिम नै हमोर के लौंड़ा सै चाँदी के रुपिया देकै मोल लई ही।
17“पर बा बादे को जो परमेसर नै इब्राहिम सै करर खाओ हो बाको पूरो होनै को बखत आओ तौ हमरे लोग मिसर देस मै भौस्से बढ़ते गए। 18तबई मिसर मै एक दूसरे राजा को राज आओ जो यूसप कै ना जानै हो। 19बानै हमरे बापदादौं के संग चालाँकी करी और भौत बुरो बरताब करो और उनकै अपने बालकौ कै मारनै के ताँई मजबूर करो जिस्सै कै बे जिन्दे ना रैंह।
20“बाई बखत मै मूसा पैदा भओ और बौ परमेसर की नजरौ मै भारचो बालक हो और तीन महीना तक बाकै घर मैई पालो। 21जब बाकै बाहार छोड़ दओ तौ तबई फिरौन की लौंड़िया नै बाकै उठा लओ और अपने लौंड़ा के हाँई पालो। 22मूसा कै मिसरिऔ की सिगरी बिद्दिया सिकाई, और बौ बातौं और काम कन्नै मै माहिर हो।
23“जब बौ चालीस साल को हो गओ हो, तौ तबई बानै सोचो कै ‘मैं अपने ईसराइली भईयौ के धौंरे जांऔ।’ 24बानै एक ईसराइली के संग एक मिसरी आदमी कै बुरो बरताब करते भए देखो तबई बानै मिसरी आदमी कै मारो और बाको बदलो लओ। 25मूसा नै जौ सोची कै ‘मेरे ईसराइली भईया समज जांगे कै परमेसर नै मैंकै उनके छुटकारे के ताँई चुनो है,’ पर बे ना समजे। 26दूसरे दिन जब दो ईसराइली लोग आपस मै लड़ रए हे, तौ तबई बौ बहाँ आ गओ, और उनके धौंरे मिलकै रैहनै के ताँई समजाओ और कैई कै, ‘हे लोगौ, तुम तौ आपस मै भईया भईया हौ फिर बी तुम एक दूसरे सै काए लड़ौ हौ?’
27“पर जो लड़ रए हे बामै सै एक नै मूसा कै धक्का देते भए कैई कै, ‘तेकै किसनै हमरो राजा और नियाय कन्नै बारो ठैराओ है? 28तैनै कल जिस तरीका सै मिसरी आदमी कै मारो हो तौ का तू मैंकै बी बैसेई मारनै की सोचै है?’ 29जौ बात सुनकै मूसा बहाँ सै चलो गओ और मिदियान देस मै परदेसी बनकै रैहल लगो। बहाँ बाके दो लौंड़ा भए।
30“फिर जब चालीस साल हो गए हे तौ तबई मूसा कै सिने पहाड़ के बियाबान मै एक पजरती भई झाँड़ी की लपटौं के बीच मै एक सुरगदूत दिखाई दओ। 31जब मूसा नै जौ देखो तौ बाकी आँख चिरी की चिरी रैह गंई और जब बौ और धौंरे गओ तौ तबई बानै परभु की अबाज सुनी कै, 32‘मैं तेरे बापदादौं को परमेसर, इब्राहिम, इसहाक, और याकूब को परमेसर हौं।’ तबई मूसा डर के मारे कप कपानै लगो और नजर ऊपर कन्नै की हिम्मत ना पड़ी।
33“तबई परभु नै बासै कैई कै, ‘अपने पाँऐऔं सै जूता लिकार दे, कैसेकै जिस जघै मै तू खड़ो है बौ पबित्तर है। 34मैंनै मिसर मै अपने लोगौ की बुरी हालत देखी और उनको कैखनो और रोनो सुनो है। इसताँई उनकै छुड़ानै के ताँई मैं नीचे उतरो हौं, अब मैं तेकै मिसर मै भेजंगो।’
35“जौ बौई मूसा है जिसके खिलाप उन्नै बोलो हो कै, ‘तेकै हमरो राजा और नियाय कन्नै बारो किसनै बनाओ?’ जौ बौई मूसा हो जिसकै परमेसर नै बा सुरगदूत दुआरा पजरती भई झाँड़ी मै दरसन दओ और बाकै राजा और छुड़ानैबारो ठैराकै भेजो। 36बौ उनकै मिसर और लाल समन्दर सै लिकार लाओ और बियाबान मै चालीस साल तक चिन्न और चमत्कार के काम दिखाते भए अग्गे बढ़तो गओ।
37“जौ बौई मूसा है जिसनै ईसराइली लोगौ सै कैई ही, ‘परमेसर नै तुमरे ताँई तुम्मै सैई मेरे हाँई एक नबी खड़ो करैगो।’ 38और जौ बौई मूसा है जिस्सै सिने पहाड़ मै सुरगदूत नै बात करी। बौई मूसा हमरे बापदादौं की मंडली के संग बियाबान मै हो और बाई नै हमकै सुनानै के ताँई परमेसर सै जिन्दे बचन पाए।
39“पर हमरे बापदादौं नै बाकी बात ना मानी और बे मूसा कै छोड़कै मिसर जानै के ताँई सोचल लगे। 40और तबई उन्नै हारून सै कैई कै, ‘हमरे ताँई एक ऐंसो देबता बना जो हमकै रस्ता दिखाऐ। कैसेकै जौ मूसा जो हमकै मिसर देस सै लिकारकै लाओ है, हमकै ना पतो है कै बाके संग का भओ है।’ 41उनई दिनौ मै उन्नै एक बछड़ा की मूरती बनाई और बाके अग्गे बलि चढ़ाई और अपने हातौ सै बनाई भई मूरती की खुसी मनाई। 42तबई परमेसर नै उनसै मौह फेर लओ और आसमान की चीजौ कै पूजनै के ताँई छोड़ दओ। जैसो कै नबिऔ की किताब मै लिखो है,
“‘हे ईसराइली लोगौ
का तुमनै चालीस साल तक बियाबान मै बलि
और अन्न को चढ़ाबो मैंकैई ना चढ़ाओ हो?
43तुमनै मोलेक देबता को मन्दर बनाओ
और रिफान देबता के तारे कै अपने संग लओ
मतलब तुमनै उन मूरतिऔं की पूजा कन्नै के ताँई बनाओ।
इसताँई मैं तुमकै बेबिलोन सै बी दूर गुलामी मै भेजंगो।’
44“गभाई को जौ तम्बू बियाबान मै हमरे बापदादौं के संग हो, परमेसर नै मूसा कै जैसो दिखाओ हो बानै बैसोई बनाओ। 45बाई तम्बू कै हमरे बापदादौं नै पैलेई सै पाकै यहोसू के संग हमरे हिंया लियाए, बा बखत उन्नै गैर यहूदी के लोगौ के ऊपर अधकार पाओ, जिनकै परमेसर नै हमरे बापदादौं के सामने सै लिकार दओ हो और जौ तम्बू राजा दाऊद के बखत तक रैहओ। 46दाऊद के ऊपर परमेसर की किरपा ही तबई बानै याकूब के परमेसर सै पूँछो कै, का ‘मैं तेरे ताँई एक मन्दर बनाऔ।’ 47पर परमेसर के ताँई मन्दर बनानै बारो सुलेमान हो।
48“पर परमपरधान परमेसर हात सै बनाए भए मन्दर मै ना रैहबै है। जैसो नबी नै कैओ है। 49‘परभु जौ कैबै है कै,
“सुरग मेरो सिंगासन है
और धरती मेरे पाँऐ की पिड़िया है।
मेरे ताँई तुम कैसो मन्दर बनाऔगे?
मेरे आराम कन्नै की जघै कहाँ होगी?
50का जे सिगरी चीज मेरे हात सै बनाई भई ना हैं?’
51“हे जिद्दी लोगौ, तुम ना तौ सुन्नो और ना समजनो चाँहौ हौ। पर हरदम अपने बापदादौं के हाँई पबित्तर आत्मा को बिरोद करौ हौ। 52का ऐंसो कोई बी नबी बचो है जिनकै तुमरे बापदादौं नै सताओ ना होए? और उनौनैई उनकै बी मार डारो जिनौनै भौत पैलेई बा धरमी के आनै की खबर दई ही, बाई धरमी कै अब तुमनै धोको देकै पकड़बाओ और मरवा दओ। 53तुम बेई हौ जिनकै सुरगदूतौं दुआरा नियम तौ मिले, पर तुमनै उनकै ना मानो।”
सितेफनुस कै मारनो
54सभा नै सितेफनुस की जौ बात सुनकै, बे लोग चिररा गए और दाँत किट किटाल लगे। 55पर बानै पबित्तर आत्मा सै भरकै सुरग की ओर देखो और परमेसर की महिमा कै और ईसु कै परमेसर के खाने हात की ओर खड़े देखो और बानै कैई कै, 56“देखौ, मैं सुरग कै खुलो भओ और आदमी के लौंड़ा कै परमेसर के खाने हात की ओर खड़े भए देखौ हौं।”
57तबई उनौनै बड़ी जोर सै चिल्लाकै और अपने कान बन्द करकै सिगरे जनी सितेफनुस के ऊपर झपटे। 58बे आरोप लगानै बारे सितेफनुस कै खचेड़ते भए ऐरूसलेम सैहर सै बाहार लिआए, और पत्थर मारनै के ताँई उनौनै अपनी ऊपर की फतँईऔ कै लिकारकै साऊल नाम एक जमान बालक के पाँऐऔं मै रख दओ।
59और जब बे सितेफनुस के ऊपर पत्थर मारल लगे, तौ बानै जौ पिराथना करी कै, “हे परभु ईसु मेरी आत्मा कै समार।” 60फिर बानै घूंटे के बल टिक कै जोर सै कैई कै, “हे परभु, जौ पाप उनके ऊपर मत लगईए।” और जौ कैह कै बानै अपने पिरान छोड़ दए। सितेफनुस कै मारनै के ताँई साऊल को बी हात हो।
Currently Selected:
चेलौ के काम 7: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
