चेलौ के काम 18
18
पौलुस कुरिन्थुस मै
1इसके बाद पौलुस एथेन्स सैहर कै छोड़कै कुरिन्थुस सैहर मै आओ। 2बहाँ उनकै अकुला नाम को एक यहूदी आदमी मिलो जिसको जलम पुन्तुस सैहर मै भओ हो। बौ अपनी बईयर पिरसीला के संग कुछ दिनौ पैलेई बहाँ रैहनै आओ हो। बे इटली छोड़कै इसताँई आए हे कै कलोदियुस नै सिगरे यहूदी लोगौ कै रोम सैहर छोड़नै को हुकम देर खाओ हो, और पौलुस उनसै मिलनै गओ। 3पौलुस और बे तम्बू बनानै को काम करै हे, इसताँई बौ उनके संग रुको और काम करल लगो।
4पौलुस आराम कन्नै बारे दिन यहूदी पिराथना घरौं मै जाकै और उनसै बैहसबाजी करकै यहूदी और यूनानी लोगौ कै समजाबै हो। 5जब सीलास और तीमुथियुस मकिदुनिया सै आए, तौ पौलुस हर बखत यहूदी लोगौ कै बचन सुनावै हो और गभाई देवै हो कै ईसुई मसी है। 6पर जब बे बिरोद और बुरो कैललगे तबई पौलुस नै अपने लत्ता झाड़े और कैई, “अपने काम की सजा तुम खुदई भुगतौगे। मैं बेकसूर हौं। अब सै मैं गैर यहूदी लोगौ के बीच मै जांगो।”
7तबई पौलुस यहूदी के पिराथना घर सै चल पड़ो और गैर यहूदी के तीतुस यूसतुस नाम के आदमी के धौंरे गओ जो परमेसर को भक्त हो और जहाँ यहूदी पिराथना करै हे बाके किनारई बाको घर हो। 8तबई किसपुस नै जो यहूदी पिराथना घर को मुखिया हो, बानै अपने सिगरे टब्बर के संग परभु मै बिसवास करो। और उन भौस्से कुरिन्थुस के लोगौ नै जिनौनै पौलुस सै बचन सुनो हो, बिसवास करो और जल संस्कार लओ।
9तबई एक रात परभु नै पौलुस के सपने मै आकै कैई कै, “डर मत, बचन सुनातो रैह और चुप मत रैह। 10मैं तेरे संग हौं, और कोई बी तेरे संग लड़ाई करकै तेकै नुकसान ना पौंचा सकै है कैसेकै जा सैहर मै मेरे भौस्से बिसवासी लोग हैं।” 11पौलुस उनकै परमेसर को बचन सिकातो रैहओ और कुरिन्थुस मै डेड़ साल तक रैहओ।
पौलुस के ऊपर यहूदिऔं को मुकदमा
12जब गललिओ अखाया को राजपाल हो तबई यहूदी लोग एक हो गए और पौलुस को बिरोद करो और बाकै पकड़कै कचैरी मै ले गए। 13और बोले, “जौ आदमी परमेसर की ऐंसी भक्ति कन्नी सिकाबै है, जो हमरे नियम के खिलाप है।”
14जब पौलुस बोलनैई बारो हो तबई राजपाल नै कैई, “हे यहूदी लोगौ, अगर जा आदमी की जौ बात बुरी या अनियाय बारी होती, तौ तबई मैं तुमरी बात सुनतो। 15पर जौ लड़ाई बातौं, नामौं और तुमरे नियम के बारे मै है तौ तुमई निपटौ। मैं ऐंसी बातौं को नियाय कन्नै बारो ना बन्नो चाँहौ हौं।” 16और बानै उनकै कचैरी सै बाहार लिकरबा दओ। 17तबई सिगरे लोग पिराथना घर के मुखिया सोस्थिनेस कै पकड़कै कचैरी के सामने पीटल लगे। पर राजपाल गललिओ नै जा बात की परवा ना करी।
पौलुस को बापस आनो
18पौलुस भौत दिनौ तक कुरन्थ मै रैहओ। फिर बौ बिसवासी भईयौ सै बिदा ले कै किंखिरीया सैहर मै अपने बार इसताँई उतारे, कैसेकै बानै मन्नत माँगी ही। बौ इसके बाद पानी के जिहाज सै सीरिया कै चलो गओ और बाके संग पिरसीला और अकुला बी हे। 19जब बे इफिसुस मै पौंचे तौ पौलुस नै अकुला और बाकी बईयर पिरसीला कै बहीं छोड़कै खुद यहूदी पिराथना घर मै जाकै यहूदी लोगौ सै बैहैस बाजी करल लगो। 20जब बहाँ के लोगौ नै पौलुस सै बिनती करी कै, “हमरे संग कुछ दिन और रुक।” तौ बानै मनैह कर दई।
21पर बानै ऐंसे कैई कै अगर परमेसर चाँहैगो तौ मैं फिर तुमरे धौंरे आंगो और बौ इफिसुस सै पानी के जिहाज सै चले गओ। 22फिर केसरिया मै पौंच कै बौ ऐरूसलेम मै चले गओ और बिसवासिऔ की मंडली के लोगौ सै मिलो। तब इसके बाद बौ अन्ताकिया की ओर चलो गओ। 23अन्ताकिया मै कुछ दिन रैहनै के बाद बौ गलातिया और फिरगिया मुलक मै पौंचो और बहाँ के इलाकेऔ के बिसवासी लोगौ कै पक्को करतो गओ।
इफिसुस मै अपोलुस
24अपोलुस नाम को एक यहूदी आदमी हो, जिसको जलम सिकन्दरिया मै भओ हो और बौ इफिसुस मै आओ। जौ आदमी गियानी और पबित्तर सास्तर कै अच्छे सै जानै हो। 25बाकै परभु की रस्ता को गियान हो, और बौ सच्चे दिल सै ईसु के बारे मै अच्छे तरीका सै सुनावै और सिकाबै हो, पर बौ सिरप यहून्ना के जल संस्कार की बात कै जानै हो। 26बौ बिना डरे यहूदी पिराथना घर मै बोलल लगो, और जब पिरसीला और अकुला बाकी बात सुन रए हे तबई उन्नै अपोलुस कै अगल ले जाकै परमेसर की रस्ता के बारे मै अच्छे सै बताओ।
27जब अपोलुस नै अखाया जानै की सोची तौ तबई इफिसुस के बिसवासी भईयौ नै बाको सुआगत कन्नै के ताँई अखाया के बिसवासी लोगौ कै चिट्ठी लिखी। जब बौ बहाँ पौंचैगो तौ, जिन लोगौ नै परमेसर की किरपा सै बिसवास करो हो उनके ताँई बड़ी सायता कन्नै बारो है। 28और बानै पबित्तर सास्तर की बातौं सै यहूदी लोगौ को मौह बन्द कर दओ, कैसेकै बौ पबित्तर सास्तर सै पढ़कै जौ सबूत देवै हो कै ईसुई मसी है।
Currently Selected:
चेलौ के काम 18: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
