चेलौ के काम 15
15
ऐरूसलेम की बैठक
1तबई कुछ लोग यहूदिया परदेस सै अन्ताकिया मै आकै बिसवासी लोगौ कै सिकाल लगे कै, “अगर तुमरो खतना मूसा के नियम के तरीका सै ना भओ है तौ तुमकै मुक्ति ना मिल सकै है।” 2इन बातौं कै लेकै पौलुस और बरनबास की उनके संग बैहैस बाजी हो गई और जा बात के निपटारे के ताँई पौलुस, बरनबास और कुछ लोगौ कै ऐरूसलेम मै भेजे भए चेलौ और बिसवासिऔ की मंडली के मुखियौं के धौंरे भेजो। 3जब बिसवासिऔ की मंडली के लोगौ नै उनकै बिदा करो तौ बे फिनीकिया और सामरिया सै होते भए गैर यहूदी लोगौ कै पापौं सै मन फिरानै की अच्छी खबर सुनाते भए गए। जा खबर कै सुनकै सिगरे बिसवासी लोग भौत खुस भए। 4जब बे ऐरूसलेम मै पौंचे, तौ तबई बिसवासी लोग और भेजे भए चेलौ और बिसवासिऔ की मंडली के मुखियौं नै खुसी के संग उनको सुआगत करो और उनके दुआरा परमेसर नै जो कुछ करबाओ उन कामौ के बारे मै बताओ।
5तबई जो फरीसी समू के बिसवासी लोग हे उनमै सै कुछ लोगौ नै खड़े होकै कैई कै, “गैर यहूदी लोगौ कै बी खतना कन्नो चँईऐ और उनकै मूसा के नियम कै माननै को बी हुकम दैनो चँईऐ।”
6तबई भेजे भए चेला और बिसवासिऔ की मंडली के मुखिया जा बात के ताँई इखट्टे भए। 7#चेलौ 10:1–43सला कन्नै के बाद पतरस नै खड़े होकै कैई कै, “हे भईयौ, तुम जौ बात जानौ हौ कै कुछ दिनौ पैले परमेसर नै तुम्मै सै मैंकै छाँटो, कैसेकै मेरे मौह सै गैर यहूदी लोगौ नै परमेसर की अच्छी खबर सुनी और बिसवास करो। 8#चेलौ 10:44; 2:4मनौ कै जाँचनै बारे परमेसर नै बैसेई हमरे हाँई उनकै बी पबित्तर आत्मा देकै, उनकी गभाई दई। 9और परमेसर नै उनके बिसवास के दुआरा उनके मनौ कै सुद्द करो और हम्मै और उनके बीच मै कोई फरक ना रक्खो। 10तौ तुम अब परमेसर कै काए परखनै की सोचौ हौ और दूसरे जाति के बिसवासी लोगौ की गरदन मै ऐंसो भारी जुआ काए रक्खो हौ, जिसकै ना तौ हम उठा सकै हैं और नाई हमरे पूरबज? 11पर हमरो बिसवास तौ जौ है कै परभु ईसु मसी के किरपा के दुआरा हमकै मुक्ति मिली है और उनकै बी मिलैगी।”
12बरनबास और पौलुस की बातौं कै सिगरे जनी चुपचाप सुन रए हे कै परमेसर नै उनके दुआरा गैर यहूदी लोगौ मै कैसे बड़े-बड़े चिन्न और ताजुब के काम करे हैं। 13जब उन्नै अपनी बात खतम करी, तबई याकूब नै कैई कै, “हे भईयौ, मेरी बात सुनौ। 14समौन नै बताई ही कै परमेसर नै सुरू सैई गैर यहूदी लोगौ कै अपने नाम के ताँई छाँटकै उनके ऊपर पियार दिखाओ। 15और नबिऔ की किताबौ मै बी ऐंसोई लिखो है,
16“‘जाके बाद मैं फिर आंगो
और दाऊद के गिरे भए डेरा कै फिर खड़ो करंगो
और बाके खन्डरौ कै फिर सै समारंगो
और बाकै खड़ो करंगो।
17जिस्सै कै दुनिया के सिगरे लोग परभु कै पा सकैं
और बे सिगरे
जो गैर यहूदी लोग हैं परभु को नाम लंगे,
और बे मेरे धौंरे आंगे।
18जौ बात कै बौई परभु कैबै है,
जो युगौं-युगौं सै इन बातौं की खबर देतो आओ है।’”
19याकूब नै कैई कै, “मेरी जौ सला है कै गैर यहूदी लोग जो परमेसर कै मानै हैं उनकै हम परेसान ना करैं। 20पर उनकै जौ बात लिखकै भेज देईओ कै बे ना तौ बैबिचार#15:20 बैबिचार, बैबिचार मै सबई सरीर बारे या कोई बी दूसरे बुरे गलत काम जो बी होवै हैं बे बैबिचार मै आवै हैं। करैं, और ना मूरती मै चढ़ाओ भओ चढ़ाबो खाँय, और ना साँस गोट कै मारे भए जनाबर के मांस कै, और ना खून कै खाँय। 21कैसेकै पुराने जमाने मै मूसा के जौ नियम को परचार कन्नै बारे गाम-गाम मै और अपने आराम कन्नै बारे दिन मै पिराथना घरौं मै जाकै पढ़ै करै हे।”
गैर यहूदी बिसवासी लोगौ के नाम चिट्ठी
22तबई सिगरे बिसवासी लोग, और भेजे भए चेलौ और बिसवासिऔ की मंडली के मुखियौं नै जौ ठानो कै हम्मै सै कुछ लोगौ कै पौलुस और बरनबास के संग अन्ताकिया मै भेज दंगे। तबई उन्नै बरसब्बा जिसकै यहूदा बी कैबै हैं बाकै और सीलास कै छाँटो जो सिगरे भईयौ के मुखिया हे उनकै भेजो। 23जो चिट्ठी उनके हातौ सै भेजी ही बामै जौ लिखो हो कै,
अन्ताकिया, सीरिया और किलिकिया के गैर यहूदी भईयौ कै भेजे भए चेलौ और बिसवासिऔ की मंडली के मुखियौं की ओर सै नमस्कार।
24हमनै जौ सुनो है कै हम्मै सै कुछ लोगौ नै हम सै बगैर पूँछे तुमरे बीच मै जाकै अपनी बातौं सै तुमकै दुख पौंचाओ है और तुमरो दिल कै बेचैन करो है। 25इसताँई हम सबई जनी नै जौ सला करी है कै हम्मै सै कुछ लोग छाँटकै अपने पियारे बरनबास और पौलुस के संग तुमरे धौंरे भेज दैं। 26जे ऐंसे लोग हैं जिनौनै हमरे परभु ईसु मसी के नाम के ताँई अपनी जान की फिकर बी ना करी। 27इसताँई हमनै यहूदा और सीलास कै तुमरे धौंरे भेजो कै बे अपने मौह सै बी इन सिगरी बातौं कै बता दैं। 28पबित्तर आत्मा और हमकै जौ अच्छो लगै है कै तुमरे ऊपर इन जरूरी बातौं के अलाबा कोई दूसरी बात को बोज ना डारैं।
29“तुम बैबिचार ना करिओ और ना मूरतिऔं मै चढ़ाए भए चढ़ाबे कै खइओ
और ना साँस गोट कै मारे भए जनाबर के मांस कै और खून कै ना खइओ।
अगर तुम खुद कै इन बातौं सै बचाकै रखौगे तबई तुमरो भलो होगो,
अग्गे अच्छो होए।”
30फिर बे ऐरूसलेम सै बिदा होकै अन्ताकिया मै पौंचे, और बिसवासी लोगौ कै इखट्टे करकै बौ चिट्ठी उनकै दे दई। 31बे बा चिट्ठी की लिखी भई हिम्मत बढ़ानै बारी बातौं कै पढ़कै भौत खुस भए। 32यहूदा और सीलास नै जो खुद बी नबी हे, उनकै भौस्सी बात सिकाकै बिसवासी भईयौ को हौसला बढ़ाओ और उनकै भरोसे मै पक्को करो। 33कुछ दिन रैहनै के बाद बहाँ के भईयौ नै उनकै पियार सै बिदा करो और बे बापस उनके धौंरे चले गए जिनकै उन्नै भेजो हो। 34पर सीलास बहीं रुको। 35पौलुस और बरनबास अन्ताकिया मैई रैह गए और भौस्से लोगौ के संग परभु को बचन सुनाते भए अच्छी खबर को परचार करते रैहए।
पौलुस और बरनबास को अगल होनो
36कुछ दिनौ के बाद पौलुस नै बरनबास सै कैई, “चल उन सैहरौं मै चलैं जिनमै हमनै परभु को बचन को परचार करो हो। बहाँ जाकै बिसवासी भईयौ कै देखलैं कै बे कैसे हैं।”
37पर मरकुस जिसकै यहून्ना बी कैबै हैं बरनबास नै बाकै अपने संग लेजानै की सोची। 38#चेलौ 13:13पर पौलुस नै बाकै अपने संग लेजानो सई ना समजो कैसेकै बानै पैले बी उनको सात पंफूलिया मै छोड़ दओ हो और परभु के काम कै बी आधो छोड़कै चलो गओ हो। 39इस बात की बजै सै दौनौ मै फूट पड़ गई और बे अगल अगल हो गए। बरनबास नै अपने संग मरकुस कै लओ और पानी के जिहाज सै कुपरूस मै चलो गओ।
40पौलुस नै अपने संग सीलास कै ले लओ और बिसवासी भईयौ नै बाकै परभु के किरपा मै सौंप दओ। 41बे सीरिया, किलिकिया के इलाकेऔ सै जाते भए बिसवासिऔ की मंडली के लोगौ कै मजबूत करतो चलो गओ।
Currently Selected:
चेलौ के काम 15: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
