2 तीमुथियुस 3
3
आखरी के दिनौ मै
1पर जौ जानलो कै आखरी के दिनौ मै बेसानी परेसानी आंगी। 2कैसेकै आदमी खुदई के बारे मै सोचनै बारो, लालची, गप्पी, घमंड कन्नै बारो, परमेसर की बुराई कन्नै बारो, अईया-अब्बा को कैहनो ना माननै बारो, दया ना कन्नै बारो, अपबित्तर, 3और जिसमै पियार ना है, जो माफ ना करै है, बुराई कन्नै बारो, सबर ना रखनै बारो, कठोर, अच्छाई को दुसमन। 4धोकेबाज, लापरवा, घमंडी हैं, ऐंसे लोग परमेसर कै चाँहनै बारे ना पर जिन्दगी के मजे लैनै बारे हैं। 5बे परमेसर की भक्ति को ढौंग करै हैं, और बाकी सकति कै ना मानै हैं जो उनकै धरमी बना सकै है। ऐंसे लोगौ सै दूर रैहईओ।
6इनौई मैसै ऐंसे गलत सिक्छा दैनै बारे लोग हैं, जो दूसरौं के घरौं मै घुसकै और जो बईयरैं मूरख हैं, उनकै अपने बस मै कर लेबै हैं, जो बईयरैं अपने पाप के बोज सै दबकै कई तरै की बुरी इच्छाऔं मै फसी हैं। 7ऐंसी बईयरैं सिकनै की कोसिस तौ हमेसा करै हैं, पर पूरी सच्चाई के गियान तक पौंच ना पावै हैं। 8जैसो यूनेस और यम्बरेस नै मूसा को बिरोद करो हो बैसेई जे गलत सिक्छा दैनै बारे बी सच्चाई को बिरोद करै हैं। ऐंसे लोगौ की बुद्धि भरस्ट हो गई है, और इनको बिसवास दिखावे को है। 9जौ सब जादा दिनौ तक ना चलैगो पर एक दिन उन गलत सिक्छा दैनै बारे लोगौ के मूरख बारे काम सामने आंगे, जैसे यूनेस और यम्बरेस के पाप सामने आए हे।
पौलुस को आखरी हुकम
10तीमुथियुस तू जानै है कै, मैंनै का सिकाओ और मैं कैसे जी रओ हौं और मेरे जीनै को मकसद का है। तैनै मेरो बिसवास, पियार, सबर और सबर रखनै की तागत देखर खाई है। 11#चेलौ 13:14–52; चेलौ 14:1–7; चेलौ 14:8–20जो सताब और मुसीबत मेरे ऊपर अन्ताकिया, इकुनिया और लुस्तरा मै भंई उनके बारे मै तू जानै है, मैंनै बौ सताब कै सैहन करो, पर परभु नै मैंकै उस सताब सै बचाओ। 12बे सिगरे लोग जो ईसु मसी मै सच्चाई के संग जिन्दगी जीनी चाँहै हैं, उनकै सताब सैहनोई पड़ैगो। 13पर दुसट और धोको दैनै बारे की जिन्दगी और बेकार होती जागी और बे जो दूसरौं कै ठगै हैं, खुद बी धोको खावै हैं। 14पर तैनै जो बात सीकीं हैं और जो पक्को बिसवास तू करै है, बामै टिको रैह, तू जानै है कै जे बात तैनै किन लोगौ सै सीकीं हैं। 15और मैंकै पतो है कै तू बालक सैई पबित्तर सास्तर कै जानै है, बौ तेकै बा बुद्धि कै दे सकै है जिस्सै ईसु मसी मै बिसवास कन्नै के दुआरा मुक्ति मिलै है। 16सिगरो पबित्तर सास्तर परमेसर की सायता सै लिखो गओ है। जौ बचन लोगौ कै सच्चाई के बारे मै सिकानै के ताँई, समजानै के ताँई, सुदारनै के ताँई, और धारमिकता की बातौं कै सिकानै के ताँई फाएदे बारो है। 17जिस्सै परमेसर को सेवक सिगरे अच्छे काम कन्नै के ताँई पूरे तरै सै तईयार रैह।
Currently Selected:
2 तीमुथियुस 3: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
