2 थिसलुनीकियौ 3
3
हमरे ताँई पिराथना करौ
1ओ भईयौ और बहनौ, अब जौ कै तुम हमरे ताँई पिराथना करौ कै परभु को बचन जल्दीई फैलै और बचन महिमा पाऐ जैसो तुमरे बीच मै भओ है। 2और पिराथना करौ कै हम बुरे और दुसट लोगौ सै बचे रैंह, कैसेकै परभु मै बिसवास सबई लोग ना करै हैं। 3पर हमरो परभु बिसवासजोग है। बौ तुमकै सैतान सै बचागो और तुमकै हिम्मत देगो। 4हमकै परभु मै तुमरे पक्के बने रैहनै मै बिसवास है कै जो जो हुकम हमनै तुमकै देए हैं, तुम उनकै मानौ हौ और मानते बी रैहईओ। 5परभु तुमरे दिल कै परमेसर के पियार और मसी के सबर के संग अग्गे बढ़नै मै सायता करै।
आलस के बिरोद मै चितौनी
6ओ भईयौ और बहनौ, मैं तुमकै परभु ईसु मसी के नाम सै हुकम देवौ हौं कै जो बिसवासी लोग आलस करै हैं, और हमरी देई भई सिक्छा के हिसाब सै ना चलै हैं, उनसै दूर रौह। 7कैसेकै तुम खुदई जानौ हौ कै तुमकै हमरे हाँई जिन्दगी कैसे जीनी है, कैसेकै तुमरे बीच मै रैहते भए हम आलसी ना हे। 8और नाई हमनै किसी के हिंया मुफत मै रोटी खाई। पर हमनै रात-दिन मैहनत करकै और दुख झेल कै काम करो है जिस्सै कै तुम्मै सै किसी के ऊपर बोज ना पड़ै। 9ऐंसी बात ना है कै हमरो तुमसै सायता लैनै को हक ना है। पर इसताँई करो कै तुम हमरे धौंरे सिकैं और हमरे हाँई जिन्दगी जीऐं। 10कैसेकै जब्बी हम तुमरे धौंरे हे तौ तब्बी हम तुमकै जौ हुकम देवै हे कै, “अगर कोई काम ना करै है तौ बाकै खानै को बी हक ना है।”
11हमनै ऐंसो सुनो है कै तुमरे बीच मै कुछ आलसी हैं और कुछ काम बी ना करै हैं पर दूसरौं के काम मै टांग अड़ावै हैं। 12ऐंसे लोगौ कै हम परभु ईसु मसी मै हुकम देकै समजाबै हैं कै, बे चुपचाप अपनो काम करैं और अपनी कमाई की रोटी खाँय। 13ओ भईयौ और बहनौ, जो भलाई को काम है बासै पिच्छे मत हटिओ।
14जो कोई हमरी जा चिट्ठी की बातौं कै ना मानै है, तौ बासै चौकस और दूरई रैहईओ जिस्सै कै बाकै सरम आय। 15और बाकै अपनो दुसमन ना समजिओ पर बिसवासी भईया या बहन समजकै चितौनी देईओ।
आखरी नमस्कार
16अब परभु खुदई जो सान्ति को सोत है, तुमकै हर बखत मै हमेसा सान्ति दै। परभु तुम सबके संग रैह।
17मैं पौलुस अपने हात सै तुमकै नमस्कार लिख रओ हौं। मेरे सिगरे चिट्ठी मै मेरो जौई चिन्न है। मेरो लिखनै को तरीका जौई है।
18हमरे परभु ईसु मसी की किरपा तुम सबई के ऊपर होती रैह।
Currently Selected:
2 थिसलुनीकियौ 3: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
