1 तीमुथियुस 3
3
बिसवासिऔ की देखरेख कन्नै बारो कैसो होए
1जौ बात सच्ची है कै जो कोई बिसवासी लोगौ को अगुबा बननो चाँहै है, तौ बौ नेक काम कन्नै की इच्छा रखतो होए। 2#तीतु 1:6–9पर जो अगुबा है, बामै कोई गलती ना होनी चँईऐ और बाकी एकई बईयर होए, और अपने ऊपर काबू रखनै बारो होनो चँईऐ, और समजदारी सै रैहनै बारो और इज्जतदार होए और पौंहनेऔ की इज्जत कन्नै बारो, और लोगौ कै अच्छे सै सिकानै बारो होए। 3बौ ना तौ दारू पीनै बारो और ना लड़ाई कन्नै बारो होए पर सरीप होनो चँईऐ, और बौ नाई बैहैस कन्नै बारो और ना लालच कन्नै बारो होए। 4बौ अपने टब्बर की अच्छे सै देखभाल कन्नै बारो होए, और बाके सबई बालक बाकी बात माननै बारे हौं, और बाकी पूरी इज्जत कन्नै बारे हौं। 5जो अपने टब्बर की अच्छे सै देखभाल ना कर सकै है, तौ बौ परमेसर के बिसवासिऔ की मंडली की देखभाल कैसे कर सकैगो?
6बौ एक नओ बिसवासी ना होनो चँईऐ कै बाकै घमंड हो जाय और बौ सैतान के हाँई सजा पाय। 7और जो लोग बिसवासी ना हैं उनके बीच मै बी बाको अच्छो नाम होए, पर ऐंसो ना होए कै बौ किसी गलत बातौं मैं पड़कै सैतान के फंदा मै फस जाय।
बिसवासिऔ की मंडली को सेवक कैसो होए
8इसताँई बिसवासिऔ की मंडली के लोगौ की सेवा कन्नै बारो, इज्जतदार होए, दोगलो आदमी ना होए, दारू पीनै बारो ना होए, बुरी कमाई को लालची ना होए। 9पर उनकै बिसवास की गैहरी बातौं कै साप मन सै पकड़ो रैहनो चँईऐ। 10उनकै पैलेई परखनो चँईऐ और अगर उनमै कोई दोस ना लिकरै तौ तबई उनकै बिसवासिऔ की मंडली के लोगौ की सेवा कन्नै के ताँई रखनो चँईऐ।
11और उनकी बईयर बी इज्जतदार होनी चँईऐ, बुरे बोल बोलनै बारी ना होए और अपने ऊपर काबू रखनै बारी होए और सिगरी बातौं मै बिसवास लायक होए। 12सेवा कन्नै बारे की एकई बईयर होनी चँईऐ, और बौ अपने बालकौ और टब्बर की देखभाल कन्नै बारो होए। 13कैसेकै जो बिसवासी लोगौ के बीच मै सेवा को काम अच्छे तरीका सै करैं हैं, तौ बे इज्जत पावै हैं और ईसु मसी मै उनकी हिम्मत और बी जादा बढ़ै है।
हमरे जिन्दगी को राज
14मैं तुमरे धौंरे जल्दीई आनै की आस रखते भए बी जे बात इसताँई लिख रओ हौं। 15अगर मैंकै आनै मै देर होए तौ तुमकै जौ पतो होनो चँईऐ कै परमेसर के टब्बर के लोगौ को बरताब कैसो होनो चँईऐ। जौ टब्बर जिन्दे परमेसर के बिसवासिऔ की मंडली है, और सच्चाई की बुनियाद और खम्मा है। 16और जा बात मै कोई सक ना है कै जो अच्छी खबर हमकै मिली ही, बौ सबसै बड़ी है।
मसी आदमी के सरीर के रूप मै जलम लेकै परकट भओ,
और परमेसर के आत्मा नै बाकै धरमी ठैराओ,
सुरगदूतौं नै बाकै देखो,
दूसरे देस के लोगौ मै बाको परचार भओ।
दुनिया के लोगौ नै बाके ऊपर बिसवास करो,
और महिमा के संग बाकै ऊपर उठा लओ गओ।
Currently Selected:
1 तीमुथियुस 3: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
