1 कुरन्थियों 4
4
मसी को सन्देसो दैनै बारो
1लोगौ कै हमरे बारे मै ऐंसो सोचनो चँईऐ कै हम मसी के सेवक हैं, और परमेसर नै हमकै भेद की बातौं के बारे मै बोलनै को काम सौंपो है। 2अब जिसकै जौ काम सौंपो गओ है बाके ताँई जौ जरूरी है कै बौ बा काम मै ईमानदार होए। 3पर मेरी नजरौ मै जौ भौत छोटी बात है कै तुम या कोई बी अदालत मेरो नियाय करै। पर सच्ची बात तौ जौ है कै मैं अपनो नियाय अपने आप ना करौ हौं। 4कैसेकै मेरो मन मैंकै किसी बात मै दोसी ना ठैराबै है। पर इसको मतलब जौ ना है कै मैं निरदोस हौं, कैसेकै मेरो नियाय कन्नै बारो परभु है। 5इसताँई ठैराए भए बखत सै पैलेई, परभु के आनै तक कोई किसी को नियाय ना करै, कैसेकै बौई तौ इन्धेरे मै छिपी भई बातौं कै सामने लागो, और जो बात आदमी के मन मै है। बाकै बी बौ परकट कर देगो। तब सिगरे लोगौ की बड़ाई परमेसर की ओर सै होगी।
6हे भईयौ और बहनौ, मैंनै अपनी और अपोलुस की बात एक नमूना के रूप मै तुमकै इसताँई सुनाई कै तुम हमरे बारे मै जौ बात सीक सकौ कै, “जो बात लिखी हैं बासै अग्गे ना बढ़िओ।” और तुम हम्मै सै किसी एक के लंग होकै किसी दूसरे की बेजती करकै घमंडी ना बनौ। 7कौन कैबै है कै तू दूसरौं सै जादा अच्छो है? और जो कुछ बी तेरे धौंरे है, बौ सिगरो परमेसर की ओर सै देर खाओ है। जो बी तेकै देर खाओ है तौ तू बाके ऊपर घमंड काए करै है, जैसे कै मानौ तुमकै दओई ना होए? 8तुमकै बे सिगरी चीज मिल गंई, जो तुमकै चँईऐ हीं। तुम सेट हो गए हौ, हमरे बिना तुम राजा बन गए हौ। कितनो अच्छो होतो अगर तुम सच्ची मैई राजा बन जाते तौ हम बी तुमरे संग राज करते। 9हम परमेसर के भेजे भए चेला हैं, और मैंकै ऐंसो लगै है कै परमेसर नै हमकै उन छोटे लोगौ के हाँई ठैराओ है, जिनकै खुल्लम खुल्ला मारनै को हुकम दओ जावै है। कैसेकै हम दुनिया, सुरगदूतौं और लोगौ के ताँई तमासो बन गए हैं। 10हम मसी के ताँई बेबकूफ हैं, पर तुम मसी मै भौत समजदार हौ। हम कमजोर हैं, पर तुम तागत बारे हौ। तुमकै इज्जत मिलै है, पर हमरी बेजती होवै है। 11इस बखत हम भूँके पियासे और फटे भए लत्ता पैहरे भए हैं, और हमरे संग बुरो बरताब करो जावै है, और हम मारे बितारे फिरै हैं। 12#चेलौ 18:3हम अपनेई हातौ सै बेसानी काम करे करैं हैं। और जो लोग हमकै सराप देवै हैं, उनकै हम आसीरबाद देवै हैं। जब लोग हमकै सताबैं हैं, हम सैहन करै हैं। 13बे हमरी बदनामी करै हैं, और हम पियार सै बात करै हैं, लोग अब बी हमरे संग ऐंसो बरताब करैं हैं, मानौ हम धरती के कूड़ा और समाज की खुरची भई खुरचनी हौं।
14मैं जौ बात तुमरी बेजती कन्नै के ताँई ना लिख रओ हौं, पर अपने पियारे बालक समजकै तुमकै चौकस कर रओ हौं। 15अगर तुमकै मसी मै देखभाल कन्नै बारे दस हजार बी होते, तौबी तुमरो अब्बा एकई है। कैसेकै जब मैंनै मसी ईसु की अच्छी खबर के बारे मै तुमकै सिकाओ है तौ तुम मेरे बालक बन गए हौ। 16#1 कुर 11:1; फिलि 3:17इसताँई मैं तुमसै बिनती करौं हौं, जैसी चाल मैं चलौ हौं बैसीई चाल तुम बी चलौ। 17इसताँई मैंनै तीमुथियुस कै जो परभु मै मेरो पियारो और बिसवासजोग लौंड़ा है, तुमरे धौंरे भेजो है। बौ तुमकै बा जिन्दगी के बारे मै याद दिब्बागो जो मैंनै मसी ईसु के संग बिताई ही, ठीक बैसेई जैसी मैंनै जघै-जघै मै जाकै बिसवासिऔ की मंडली के लोगौ कै सिकाओ हो। 18पर कुछ लोग घमंड सै भरकै फूल गए हैं, और मानौ बे ऐंसो सोचै हैं कै अब तौ मैंकै तुमरे हिंया जानोई ना है। 19अगर परभु की मरजी भई तौ मैं तुमरे धौंरे जल्दीई आंगो और उन घमंडी लोगौ की बातौंई को ना पर उनकी सकति को बी पतो लगांगो। 20कैसेकै परमेसर को राज बातौं मै ना, पर सकति को है। 21तुम का चाँहौ हौ? का मैं डन्डा लेकै तुमरे धौंरे आँऔं या पियार और कोमलता की आत्मा के संग आँऔं?
Currently Selected:
1 कुरन्थियों 4: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
