उत्पत्ति 2
2
1और ऐसिये करकै स्वर्ग और पृथ्वी और हर एक चीजन की रचना पूरी भई। 2और परमेस्वर अपनो काम जो बौ करत रहै सातमें दिन खतम करी, और बौ अपने करे भै पूरे काम से सातमें दिन विस्राम करी। 3बौ सातमों दिन कै आसीस दई, बाकै पवित्र और बाकै एक खास दिन ठहराई, काहैकि परमेस्वर बौ दिन पृथ्वी के सब काम से विस्राम करी। 4स्वर्ग और पृथ्वी की रचना को इतिहास जहे है, इंसान की उत्पत्ति को दुसरे वर्ड़न, प्रभु परमेस्वर स्वर्ग और पृथ्वी कै सिरजाई।
अदन की बगिया
5तौ पृथ्वी मैं कोई तराहनी के पेंड़-पौधा ना रहैं, और न कोई बीज जमे रहैं काहैकि प्रभु मेंहें न बरसाई रहै, और जमीन मैं खेती करन बारो भी कोईये इंसान न रहै; 6लेकिन पानी ऊपर जाएकै कोहरा बन कै गिरत रहै तौ पूरी जमीन ओस से छिंछ जात रहै।
7फिर प्रभु परमेस्वर जमीन से थोड़ी मट्टी लई, और बासे एक आदमी बनाई; और बौ बाकी नाक मैं जिंदगी की साँस फूँकी और बौ जिंदो प्राड़ी बन गौ।
8फिर प्रभु परमेस्वर अगार की दिसा मैं अदन मैं एक बगिया लगाई, और हूँना पर बौ इंसान कै रखी जो बौ बाकै बनाई रहै। 9प्रभु हूँना सब तराहनी के सुगड़ पेंड़ जमाईं और उनके फल खान मैं अच्छे रहैं। बगिया के बीच मैं भले-बुरे को ग्यान देन बारो एक पेंड़ भी रहै।#2:9 प्रकासितवाक्य 2:7; 22:14
10अदन मै एक नदिया की धारा बहत रहै जो बगिया कै छींचन के ताहीं बनी रहै; जहे नदिया अदन से अग्गु जाएकै चार नदियन मैं बट जाथै। 11पहली नदिया को नाओं पीसोन है; जौ हवीला देस के चारौ घाँईं बहथै, जहाँ सोना पाओ जाथै। 12बौ देस मैं सुद्ध सोनो और कीमती जवाहरात इत्र, मोती और कीमती पत्थर भी पाए जाथैं। 13दुसरी नदिया गिहोन है; और जौ कूस के सब देसन के चारौ घाँईं बहथै। 14तीसरी नदिया हिद्देकेल है, जो अस्सूर के अगार मै बहथै, और चौथी नदिया फरात है।
15तौ प्रभु परमेस्वर इंसान कै अदन की बगिया मैं खेती करन और बाकी देखरेख करन के ताहीं रखी। 16और परमेस्वर इंसान कै आग्या दई, “तैं बगिया के कोई से भी पेंड़ को फल खाए सकथै; 17लेकिन बौ पेंड़ को फल जो भले-बुरे के ग्यान को है। तैं बौ पेंड़ के फल कै कहुए मत खइये। और अगर ऐसो करैगो तौ तू बहे दिन पक्का मर जागो।”
18फिर प्रभु परमेस्वर कही, “आदमी को अकेलो रहनो अच्छो नाय है। मैं बाके ताहीं एक ऐसो सहायक बनांगो जो बाके ताहीं सई होबै।” 19और प्रभु परमेस्वर जमीन से थोड़ी मट्टी लई और जहे से सब तराहनी के जंगली जानवर और आसमान के पक्छिन कै बनाई। और जे सबन जीव जन्तुन कै इंसान के सामने लाओ गौ और इंसान हर एक को नाओं रखी। 20बौ आदमी सब तरहन के पालतू जानवरन, और आसमान के पक्छिन, और सबै तराहनी के जंगली जानवरन को नाओं रखी; लेकिन इंसान कै उनमैं से कोईये भी अपने ताहीं सहायक नाय मिलो जोसे बौ मेल खाए सकै।
21तौ प्रभु परमेस्वर बौ आदमी कै गहरी नींद मैं सुबाए दई, और जब बौ आदमी सोत रहै, तौ परमेस्वर बौ आदमी की एक पुसरिया निकारी और बाकी जघा मैं बामैं माँस भर दई।#2:21 1 कुरिन्थियों 11:8 22प्रभु परमेस्वर बौ पुसरिया से जो बौ आदमी से निकारी रहै, बासे एक बईय्यर बनाई; और बौ बाके झोने लै आई।#2:22 1 तीमुथियुस 2:13 23फिर बौ आदमी कहथै,
“आखिरकार, जौ मेरिये तराहनी है -
जौ मेरी हड्डी मैं की हड्डी है, और मेरे माँस मैं को माँस है,
और जहे बजे से जाको नाओं ‘बईय्यर’ होगो, काहैकि जाकै लोग मैं से निकारो गौ है।”
24जहे बजह से आदमी अपने अईय्या-दऊवा कै छोड़कै अपनी बईय्यर से मिलो रहेगो, और बे एक तन मैं बने रहेंगे।
25लोग और बईय्यर दोनों नंगे रहैं, लेकिन बे एक दुसरे से सरमात नाय रहैं।
Currently Selected:
उत्पत्ति 2: RTu2025
Highlight
Copy
Compare
Share
Want to have your highlights saved across all your devices? Sign up or sign in
The Rana Tharu Bible ©The Word for the World International and Rana Tharu Translation Samithi, Khatima, UttraKhanda, India. 2025
