प्रेरित 28
28
माल्टा टापूरिंङ पोलुसो स्वागत
1अपेहल ञेंरे रूठे रंङ मुखंङ पिच़ि इलिन, दंङ ञेंहतिंङ पता लेहती कि दि टापू मिन माल्टा शुह।
2दंङ दोहर बंङज़ा दोच़ी ञेंहतु रूठे देखभाल लहरिर; दि बरसेक्पी लेहती दंङ सोई शुहबी लेहकी तोहई, दिऊ थल्जी दोच़ी मेह फरचे ञेंहतु भत्ते तु स्वागत लहरिर।
3अपेहल पोलुसे सिङ ठ्रोहका लेह मेहू टोईच़ी केहरी, दंङ इच्च़ा ओमड्रा च़चे शुहबीरंङ साते दोरच़ी हुंच़ा दोऊ गुहड़रिंङ जिलसा इलि।
4अपेहल दोरकी मीहज़ी ओमड्रा पोलुसो गुहड़रिंङ जिलसी तंङरिर, ता एनातु बिचंङ कुट्री लेहतिर, “हेले दि मीह हत्यारा शुह, छना ला लेह समुन्द्रज़ि ता बचेके इलि, तांला हेंदु न्याय ओ देवी दोबि श्रींङे बंङज़ी माह रेंई।”
5दंङ दोई दुह ओमड्रा मेहरिंङ ठुड़केगी च़रति, दंङ पोलुसा बि छल्ले माह शुई।
6पर दू मीहरे रुमज़ा तोईरे कि दू गगंमोतो या दह्चे ते सिए योतो, पर अपेहल दोरे महस टेम तचेक खंणीर कि दोऊ ता छिल्ला हानि माह शुई, दंङ दोच़ी ऊई ए विचार लेह कुट्री लेहतिर, “दि ता अरिया सद शुह।”
7दू ठाहरीऊ देसी-न्वेसी पुबलियुस मिन्दु दू टापू प्रधानो ज़मीन तोहई: दोई एनोह चुंङ शिल्ज़ी षुमु ध्याड़ा तचेक ञेंहतु पहुनाई लहरी।
8पुबलियुसो बाह तेज बुखार ए शलो टेहची तोहई। दंङ पोलुसे दोऊ कछंङ इलजे दोऊ थल्जी प्रार्थना लहरी, दंङ दोऊ टोईच़ी गुह्ट्र केहच़ी दोबि ठीक लहरी।
9अपेहल झांह शुई, ता दुह टापू ऊई टेहची दोरे ला पोलुसो कछंङ अतिर दंङ ठीक शुहचे इलिर।
10दोच़ी ञेंहतु महस आदर लहरिर, दंङ अपेहल हेनर इबिमी थल्जी तेयार शुई, दंङ छिल्ला समान ञेंहतु थल्जी ज़रूरी तोहई, दू दोच़ी जहाज़ो टोईच़ी केहच़ी च़रतिर।
माल्टा टापू दोरच़ी रोमो हखा
11षुमु लाहो थल ञेंहच़ी सिकंदरिया अंजा जहाज़ंङ यात्रा शुरू लहरिन। सोई ओ वहज़ा ज़ि तेज लन्न तु वहज़ा ज़ि दि टापू रिंङ दि जहाज़ रूहम्ज़ा इलि, दि जहाज़ो तुहई कि हिस्सा रिंङ इच्च़ा जोड़ी सद्तु “झुह्ट सद्तु” मुर्ति बणेषी तोहई।
12सुरकूसा बन्दरगाह तचेक पिचा ञेंरे षुमु ध्याड़ा तचेक बंङज़िनि।
13दोरच़ी तुंखा शुहचे ञेंरे रेगियुम बन्दरगाह पिचे इलांई। दंङ इच्च़ा ध्याड़ो थल लन्न लेहती, दंङ ऊईरग पुतियुली बन्दरगाह अतिरे।
14दोहर ञेंहतिंङ रें विशवासी न्वा रे दोहरिर, दंङ दोतु कुट्री रंङ साते ञेंरे दोतु दोर निह्ज ध्याड़ा तचेक बंङज़िन; दंङ दोऊ थल, ञेंहच़ी धरतीऊ अमो दोरच़ी रोम शहरो हखा हेंदु यात्रा शुरू लाहतंई।
15रोमो रेह विशवासी ज़ि थाह्शातोर कि ञेंरे दोर अपातंई, दिऊ थल्जी दोरे हेंदंङ साते दोईमी थल्जी इच्च़ा लम्हें यात्रा लहज़ा अतिर। रे मीहरे हेंदंङ साते दोईमी थल्जी अप्पियुस बज़ारा रिंङ अतिर। दंङ ञेंरे रोमो हखा अच़ा इलिन, दंङ षुमु सराय शहरो ऊई न्वारे हेंदंङ साते दोईरे दंङ हेंदिंङ रोमो हखा रेंज़ा शिलिर। अपि खंड्रा पोलुसे परमेश्वरो धन्यवाद लहरी, दंङ याहब रांई।
16अपेहल ञेंरे रोम शहरंङ पिरिनि, दंङ पोलुसाबि एनोह च़ुम किराया रिंङ लेहपच़िमी इजाज़त खोकसिरी इच्च़ा सेनिका बि दोऊ रखवाली लहज़िमी हुकुम खोकसिरी।
पोलुस रोमारिंङ
17षुमु ध्याड़ो थल पोलुसे दोरकी यहुदी अगुवो तिंङ सभा ओ थल्जी बुलाती। दंङ अपेहल दोरे ठ्रोहका शुई ता दोतंङ साते कुई, “हे न्वारे, गेह घेंङौ मीहतु खिलाप छल्ले बुराई माहलग। दंङ माह ए बाह-मेमेतु रिति-रिवाज़ो खिलाप छा लहसी तातग, तांला यरूशलेम शहरंङ इच्च़ा कैदी बणेंके इलिगा, दंङ रोमी सरकारो गुहडिंङ रें च़रतिर।
18अंऊर तचेक रोमी अधिकारी तु गप्पा तोह, अपेहल दोच़ी गिऊ जांच लहरिर, दंङ दोरे गिह्बी रिहा लहज़ी जुंज़ातेर, छना कुचे दोरे समझेगी इलिर कि गेह झांह ठ्रोह छल्ले माह लग अंऊ गिह्बी सच़िमी वहज़ा शोतो।
19पर अपेहल यहुदी अगुवारे रोमी अधिकारी तु फेंसला विरोधङ गप्पा लहज़ी शुरू लहरिर, दंङ गिह्बी मज़बूर शुचि महाराजा ओ दोरच़ी जांच लहज़िमी दोहाई रंड्री लेहती, दिऊ मतलब दि माह तोहई कि गेह घेंङौ अधिकारी तु टोईच़ी छा दोष लगाच़िमी तातेग।
20झांह लेह गेह केतिंङ बुलाएक्तेग, कि केतंङ साते दोहग; दंङ गप्पा लोहग; छना कुचे इस्राएलो उम्मीदो थल्जी अंऊ कि मसीहरिंङ तोह, गेह दि षंङणी रिंङ छुहसा तोतोग।”
21दोहपल यहुदी अगुवा ज़ि कुईर, हेंदिंङ यहुदिया प्रदेशंङ ज़ि हेंदु साथी यहुदी तु पाहठी छल्ले डाक माह खोकसिरी। दोऊ अलावा, ञेंहतु अंऊ ला साथी यहुदी अंऊ यहूदिया प्रदेशो दोरच़ी देर पिच़ि इलिर, केहतु पाहठी छल्ले मदम गप्पा माह कुईरे।
22पर कनु विचार छि तोह? दिए गप्पा ञेंरे केहतु दोरच़ी रेड्री जुंज़ातंई यीशु थलेच़ि जोज़ा तु पाहठी तातंई, छना कुचे ञेंहच़ी ञेंहच़ातंई, कि भत्ते ठाहरीरिंङ दि दलो पाहठी गप्पा शुहबी लेहकी तोह।
23दोहपल दुह यहुदी ज़ि पोलुसो थल्जी इच्च़ा ध्याड़ा ठहराति। दुह ध्याड़ा महस मीहरे दोऊ ठहरि ठ्रोहका शुहचे इलिर, दंङ पोलुस मुंजे बेहच़ी योंकले तचेक परमेश्वरो राजो पाहठी गवाही रंड्री लेहती, दंङ मूसाऊ कानूने ए भविष्यवक्तातु कताबंङ ज़ि यीशु पाहठी रूठे रंङ कंड्री लेहती।
24दोहपल पोलुसे छिल्ला कुई दोऊ टोईच़ी रें मीहच़ी विशवास लहरिर, दंङ रेहज़ि विशवास माह लहरिर।
25अपेहल दोरे पोलुसो शिक्षा ओ पाहठी सहमत शुचि माहतरिर। दोतु इबिमी बे तुहई पोलुसे इच्च़ा आखरी गप्पा कुहते कि, “पवित्र आत्माज़ि यशायाह भविष्यवक्तातु दोरच़ी कनु बाह-मेमेतु हखा हेले कुहषी तते,
26‘इलजे दि मीहतंङ साते कुंई
कि रेड्रोनि ता पर समझेक्पोंई माह’
खंड्री ता तरपोंई पर सेहच़ी माहरपोंई;
27छना कुचे दि मीहतु सेहम फ्रेह्शी तोह,
दंङ दोतु रेह्ट्रा लिह शुहचे इलजी तोह, दंङ दोच़ी एनोह टिरा बन्द लहसी ततोर, झांह शुहबी मेस कि अपेहल एनोह टीरा ए खमोर,
दंङ रेह्ट्रे रेड्रोन,
दंङ सेहमे समझेक्पोन
दंङ किर्ज़ुंई,
दंङ गेह दोतिंङ ठीक लोहग।
28दिऊ थल्जी, दि ठीक तोह कि केतिंङ दि पता लेहकी योतो कि परमेश्वरो दि उद्धार हेंतेग ऊईजाति तु थल्जी ला मौजूद तोह। दोरे ला दिबी स्वीकार लोहर।”
29अपेहल दोई दि कुई ता यहुदी एनातु बिचंङ महस कुवाद लहज़ी लेहतिर दंङ दोरच़ी अच़ा इलिरे।
30दंङ पोलुस झुह्ट साल तचेक एनोह किराया ओ चुंङ बंङज़िरी,
31दंङ अंऊ दोऊ कछंङ अपातेर, दोतंङ भत्ते तंङ साते दोहा लहरी दंङ छा बेह्द ए छा रोक टोक मेह परमेश्वरो राजो पाहठी प्रचार लहज़ी लेहती दंङ प्रभु यीशु मसीहू गप्पा सिखाच़ा लहरी।
Currently Selected:
प्रेरित 28: LBFNT
Highlight
Share
Compare
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
