रोमी 13

अधिकारीनको अधिनमे बैठनो

1हर आदमी, शासन करन बारे अधिकारीनको अधिनमे रहाएं काहेकी सब अधिकार परमेश्वरके घेनसे आत हएं और जो अधिकारी हएं, बे सब परमेश्वरएसे चुनेभए हएं। 2जहेमारे जो कोइ, शासन करनको अधिकार भएबाले आदमीनको नियम पालन नाए करत हए, बो परमेश्वरके नियमके बिरोध करत हए, और बिरोध करन बारे दण्ड पामंगे।

3काहेकी अगर कोइ अच्छो काम करत हए तओ बोके सासकनसे डरानके जरुरत नाए हए। पर अगर बे खराब काम करत हएं तओ बोके डरानके चाहो। अगर तुम शासन करन बारे अधिकारीनसे डरान नाए चाँहत हओ कहेसे अच्छो काम करओ और बे तुमके सम्मान देमंगे। 4काहेकी अधिकारी आदमी तुमके मदत करनके ताहीं परमेश्वरके सेवक हएं। पर अगर तुम खराब काम करत हओ कहेसे अधिकारीनसे डराओ; काहेकी अधिकारीनको ठिन तुमए सजाय देनको अधिकार हए और बे परमेश्वरके सेवक हएं, जौनन्के जहेक ताहीं पठाए गए हएं, कि बे बेहीं आदमीनके सजाय देएं जो गलत काम कर रहे हएं। 5जहेमारे तुमके अधिकारिनको अधिनमे रहानके हए; जाके ताहीं इकल्लो नाए, कि तुम परमेश्वरको दण्डसे बच पाबओ, बल्कि जहे ताहीं फिर, कि तुमर बिबेक शुद्ध रहाबए।

6जहेमारे तुम उनके कर फिर देओ, काहेकी शासन करन बारे परमेश्वरके सेवक हएं, और अपने जिम्मेबारीके निभानके ताहीं बे अपनएके समर्पित करत हएं। 7जहेमारे जौनके तिरन हए बोके तिरओ, जोके कर पानके हए बोके कर चुकाए देओ, जोके महसुल पानके हए बोके महसुल तिरओ; अइसियए करके सबए अधिकारीनको पुरा आदर देओ।

प्रेममे लागे रहाओ

8तुमए सबके सिर्फ एक बातको कर्जीदार होनचाहो और बो जा हए, कि तुम सब एकदुस्रेसे प्रेम करओ, काहेकी दुस्रेनके प्रेम करन बारो इकल्लो मोशाको नियम कानुन पुरा करे होतहए। 9काहेकी मोशाके ब्यवस्थामे बहुत आज्ञा हएं जैसे कि “तए व्यभिचार मत् करीए, तए हत्या मत् करीए, तए चोरी मत् करीए, तए लोभ मत् करीए,” और जे आज्ञा बाहेक बाँकी औ सब आज्ञाको सारांश जहे आज्ञामे पाओ जातहए, “दुस्रेनसे फिर अपनए कता प्रेम करियओ।” 10प्रेम दुस्रेको खराबी नाए करत हए, जहेमारे अगर हम प्रेम करत हएं तओ हम मोशाको नियम कानुन पुरा करत होत हएं।

11और तुम मैसे सबके एकदुस्रेसे प्रेम करतए रहान पणो काहेकी बो समय ढिँगै हए जब परमेश्वर हमके जा खराब संसारसे बचाबैगो। जब हम पहिलो चोटी ख्रीष्टमे बिश्वास करे रहएं, बो समयसे त जा अब ढिँगै हए। जाके समझके तुमके अपनी निँधसे जगनके चाहो और साबधान रहानके चाहो। 12जा खराब संसारमे रहानके हमर समय लगभग खतम हुइगओ हए, एक रातके कता, जो लगभग खतम हुइगइ हए, और बो समय फिर ढिँगै हए जब ख्रीष्ट लौटके आबैगो; जहेमारे हमके बे चीजके बन्द करदेनके चाहो जो अंधियारोसे सम्बन्धित हएं। हमके बो हथियारको इस्तमाल करनके चाहो जोके उजियारोमे इस्तमाल करोजात हए।

13हम अन्धकारमे नाए बल्कि उजियारोमे बैठन बारे आदमी कता उचित ब्यबहार करएं। मोजमजा करनके, दारु पिनके, व्यभिचार करनके, भ्रष्टचार करनके, झगडा और ईर्ष्या करनके छोड देओ। 14बल्कि येशू ख्रीष्टके अपनो हथियार बनाओ और पापमय स्वभाबको इच्छा पुरा करनमे मतलागओ।

Currently Selected:

रोमी 13: THRNT

Highlight

Copy

Compare