उत्पत्ति 17
17
खतना आरु वाचान सोहलानी
1जोत्यार अब्राम एक कोम सोव सालोन होय गयो, ती योहोवा न ओको दर्शन दिन कयो, हांव सर्वशक्तिमान ईश्वर छे; मारी हाजरी मा चाल आरु खोरु होयतु जा। 2हांव तारे साते वायदु बान्दीस, आरु तारा ओवलीयाद क बेस वोदाड़ीस। 3ती अब्राम मुयोन भुरसे हिट पोड़्यु: आरु परमेश्वर हेना सी होसुत वात कोतु रोयु, 4देख, मारु वायदु तारा सात मा बान्दायलु रोहसे, ओतरान कोरीन तु जाती क टुळा क मुलपिता होय जाईस। 5ओतरान कोरीन हीमी गोथो तारो नाव अब्राम नी रोहसे, बाखुन तारो नाव अब्राहम होयसे; काहकी मे तुखे जातीयो क टुळा क मुलपिता बोनाय देदलु छे। (रोम. 4:17) 6हांव तुखे घोनु फलवन्त कोरीस, आरु तुसेक जाती जातीन मुल बनाय दिस, आरु तारा ओवलीयाद म राजा पोयदा होयसे। 7आरु हांव तारे पुठी, आरु तारा वाद की पीढ़ी पीढ़ी लोगुन तारा ओवलीयाद क सात वी इने आशय क जोलोम जोलोमन वायदु बान्धो, की मे तारे आरु वाद क तारा ओवलीयाद क वी परमेश्वर रोहिस। (लुका 1:55) 8आरु हांव तुखे, आरु तारा वाद तारा ओवलीयाद क वी, यो आखो कनान देश जेनामा तु हुलक्र्यु होईन रोहतलु, इने रीते आपीस की चो होमीशा–होमीशा ओकी घोरुन जागु रोहसे, आरु हांव हेन्दरु परमेश्वर रोहिस (प्रेरी. 7:5) 9ओळतेन परमेश्वर न अब्राहम सी कयो, “तु वी मारा सात बान्दली वाचा क पाळ्या कोरजी। 10मारे साते बान्दली वाचा, तेरो पाळन तुसे आरु तारा वाद क तारा ओवलीयाद क कोरनो पोड़से, ची यी छे : तुमरे मा सी एक एक मानुसक खतनो होये (रोम. 4:11, प्रेरी. 7:8) 11तुमु आपनी आपनी खालड़ी क खतनो कोराय लेजु : जु वाचा मारे आरु तुमरे वीच मा छे, तेरो यो सोहलानी होयसे। 12पीढ़ी पीढ़ी मा केवल तारा ओवलीयाद काज मानुस नी बाखुन जु तारे घोर पोयदा होयला छे, अथवा परदेशियो सी पोयस्या आपीन मुले ली लेजु। 13जु तारा घोर मा पोयदा होये, अथवा तारा पोयस्या सी मुले लेदलो रोहे, ओको खतनो वी कोरनो; ओस कोरीन मारा वायदान सोहलानी तुमरा डीलो मा रोहसे हुयो जोलोम जोलोम् रोहसे। 14जु मानुस वीगुर फातोरकाती रोहसे, अर्थात जेरी खालड़ी क खतनो नो होये, चो जीव आपना मानषो मा सी नोष्ट कोर्यो जासे, काहकी हुयो मारे पुठी वायदु बान्दला काजे तुड़ देदो।” 15ओळी परमेश्वर न अब्राहम सी कयो, “तारी जी लाड़ी सारै छे, ओको तु हिमी सारै झुण कोहे, ओको नाव सारा होयसे। 16हांव हेनीक बोरकोत आपीस, आरु तुखे ओका द्वारा एक पुर्य आपीस, आरु हांव ओको ओसो बोरकोत आपीस की हुयी जाती जातीन मुलमाता होय जासे; आरु ओका ओवलीयाद मा राज्य–राज्य क राजा पोयदा होयसे।” 17ती अब्राहम मुयोन भुरसे हुट पोड़यु आरु हासने, आरु मोनोत मोनोम कोहने लाग्यु, “काय सोव साल क मानुसक वी ओवलीयाद होयसे आरु काय सारा जी नोब्बे साल की छे पुर्य जोनसे?” 18आरु अब्राहम न परमेश्वर सी कयो, “इश्माएल तारी निगाह मा बोनलु रोहे! योत बेस छे।” 19ती परमेश्वर न कयो, “खोरी तारी लाड़ी सारा क तार सी एक पुर्य पोयदा होयसे; आरु तु ओको नाव इसहाक राखजी; आरु हांव ओका सात मा ओसी वाचा बान्धीस जी ओका वाद मा ओकी ओवलीयाद क लीय जोलोम जोलोम् की वाचा रोहसे। 20इश्माएल क वारा मा वी हांव तारी सोमवलु छे; मे ओको वी बोरकोत आपीस, आरु ओको फलवन्त कोरीस आरु घोनु वोदाड़ीस; हेना सी बारे डाहला पोयदा होयसे, आरु हांव हेना सी एक मोटली जाती बोनावीस। 21बाखुन हांव आपसी वाचा इसहाक पुठीत बान्दीस जु सारा सी अगले साल इने टेमे पोयदा होयसे।” 22ती परमेश्वर न अब्राहम सी वात कोरनो बोन्द करीयो आरु ओका चा रोईन उपोर जात रोयो। 23ती अब्राहम न आपसा पुरया इश्माएल क लीदो; आरु ओका घोर मा जोत्रा वी पोयदा होयला हुता, आरु जोतरा हेरा पोयस्या मुले लेदला हुता, अर्थात् ओका घोर मा जोत्रा मानुस हुता तेनु आखाक लीन तेने दाहड़े परमेश्वर क बुलोन ओनसारे हेन्दरी खालड़ी क खतनो करीयो। 24जोत्यार अब्राहम क खालड़ी क खतनो हुयो ती अब्राहम एक कोम सोव सालोन होतु। 25आरु जोत्यार हेरा पुर्या इश्माएल क खालड़ी क खतनो हुयो ती हुयो तेरे सालोन हुतो। 26अब्राहम आरु ओको पुर्य इश्माएल दुयो क खतनो एकज दाहड़े हुयो; 27आरु ओका घोर मा जोत्रा मानुस हुता, जे घोर मा पोयदा होयला ओळी जो पोरदेशी क हातो सी पोयस्यान मुले लेदला हुता, सब क खतनो ओकाज सात मा हुयो।
Currently Selected:
उत्पत्ति 17: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
