उत्पत्ति 14
14
अब्राहम लुत क छुड़ावनो
1शिनार ज राजा अम्रापेल, आरु एल्लासार क राजा अर्योक, आरु एलाम क राजा कदोर्लाओमेर, आरु गोयीम क राजा तिदाल क दाहड़ा मा ओसो हुयो, 2की हुये सदोम क राजा बेरा, आरु गमोरा क राजा बिर्शा, आरु अदमा क राजा शिनाब, आरु सबोयीम क राजा शमेबेर, आरु बेला जो सोअर वी कोवाये। 3ये पांचू सिद्दीम नावोन तराई मा, जो खारा ताल क धोड़े छे, एका कोर्यो। 4बारे साल लोगुन ते ये कदोर्लाओमेर क हको तळे रोया; बाखुन तेरे साल मा ओका खिलाफ वीद्रोहन काम कोर्यो। 5चोदवां साल मा कदोर्लाओमेर आरु ओका साती राजा आए, आरु अशतरोत्कनम मा रपाय क, आरु हाम मा जुजीयो क, आरु शाबे कीरयातेम मा एमियो क, 6आरु सेईर नावोन क बोयड़ा पोर होरीयो क कुटता कुटतात् तेना एल्पारान लोगुन जो जोंगोल क धड़े छे, पुग गया। 7होंया गोथा पोछा आवीन एन्मिशपात क आया, जो कादेश वी कोवाये, आरु अमालेकीयो क आखा देश क आरु तेना एमोरीया क वी जीत लीयो, जो हससोन्तामार मा रोहता हुता। 8ती सदोम, गमोरा, अदमा, सबोयीम, आरु बेला, जो सोअर वी कवाये, इन्दरु राजा निकले आरु सिद्दीम नावोन तराई मा उना सात लोड़ाय क लीय पाती बान्दया: 9अर्थात एलाम क राजा कदोर्लाओमेर, गोयीम क राजा तिदाल, शिनार क राजा अम्रापेल, आरु एल्लासार क राजा अर्योक, इनु च्यारु क वीरुद चे पांचू मेवीन पाती बान्दया। 10सिद्दिम नावोन तराई मा जा लसार धुळा क खाड़ात खाड़ा हुता; सदोम आरु गमोरा क राजा ढास ढासता तेनुमा हीट पोड़्या, आरु जे वाच्या चे बोयड़ा पोर ढास गया। 11ती चे सदोम आरु गमोरा क आखो धोन आरु खानेन सोमान क लुट लुटीन जात रोया। 12आरु अब्राम क भतीजो लुत, जो सदोम मा रोहतो हुतो, तेरो वी धोन लीन जात रोया। 13ती एक जोनु जु ढासीन वाच नीकोळ्यो हुतो हुयो जाईन इब्री अब्राम क खोबोर आप्यो; अब्राम ते एमोरी मम्रे, जो एश्कोल आरु आनेर क भाईष् हुतो, ओका बांज झाड़ क वीच मा रोहतो हुतो; आरु ये मानुस अब्राम क सात मा वायदु बांधला हुता। 14यो सोमळीन की ओको भतीजो धोराय गयो, अब्राम हेरा तीन सोव ओठारे भोनला, वार लोड़ायने मा पाका दासो क लीन जो ओको कुटुम्ब मा पोयदा हुया होता, होतीयार लीन दान लोगुन हिन्दरे पोछोळ पोड़्या; 15आरु रात क आपसा दास क आंगे आंगेय् दल बांधीन उन पोर होमलु कोरीन तेनुक मार लेदा आरु होबा लोगुन, जो दमिश्क क उत्तर की भेनी छे, तीन्दरे पोछोळ पोड़्या। 16आरु हुये आखो धन क, आरु आपसा भोतीजे लुत आरु ओको धोन क, आरु बायराक, आरु सब धोरायला क पोछा ली आया। 17जोत्यार हुये कदोर्लाओमेर आरु ओका साती राजा क जीतीन पोछा आवता हुता ती सदोम क राजा शावे नावोन तराई मा, जु राजा क तराई वी कोवायतली, तेनासी मेवने कोरीन आयो। 18ती शालेम क राजा मलीकीसिदक, जु ईश्वर क मोटलो याजक हुतो, रुटू आरु दाखमधु ली आयो। (इब्रा. 7:1-10, भजन 110:4) 19आरु हुयो अब्राम क यो बोरकोत आप्यो, “मोटला भोगवान भिनी गोथो, जु आकाश आरु कोळ क आधिकारी छे, तु सोयाव्वु होये। 20आरु सोयाव्वु छे मोटलु भोगवान, जीनासी तारा वेरी क तारा वश मा कोर देदो।” ती अब्राम ओको आखा सामानोन दशमांश आप्यो। 21ती सदोम क राजा अब्राम सी कयो, “जीवे क तो मेखे आप, आरु धोन क आपसे पास राख।” 22अब्राम सदोम क राजा सी कयो, “मोटलु भोगवान योहोवा, आकाश आरु कोळी क आधिकारी छे, 23ओकी मे शपथ खाम, की जो काय तारो छे तेना सी नी ते हांव ककय वी, आरु नी खासड़ा क बोन्दे, नी काय आरु चीज नीकावो की तु ओसु नी कोहने बाजजाय की अब्राम मारेत लारे लोगपोती होयलु छे। 24बाखुन जो काय ईनु जुवान्या खाय लेदला छे, आरु इना वाटा, जे मारे साते गोयला छे अर्थात् आनेर, एश्कोल, आरु मम्रे, हांव नी पोछु आवो, चे ते आपसु त् वाटू राख लेये तोसे।”
Currently Selected:
उत्पत्ति 14: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
