याकुब 4
4
ईनी कळी साते दुस्तीदारी नी करनु चाहजे
1हय तुंद्रे ईचमां लड़ाय-झगड़ा कां सी आय गुया? तुहुंंक जी वात मालुम नी हय काय तुंद्रा डीलेम ने मनेम मजा लेण्या छीनाळ्या वीच्यारे, भगवानेक चाहजे असली वातेन वीरुद मां लड़ाय रया। तीनु वीच्यारेन साहरे तुंद्रे ईचमां लड़ाय-झगड़ा हय र्या। 2तुहुंं हाय ते कर र्या, बाकुन ची हाय पुरी नी हवे, हेरेसी तुहुंं दीसरान खुन करने हींड रया। ने तुहुंं दीसरा पर कुहराये, बाकुन तुहुंंक काय नी जड़े हेरेसी तुहुंं लड़ाय-झगड़ु कर रया। तुहुंंक ज जड़नु चाहजे, च नी जड़तो काहाकी तुहुंं भगवान धड़े च नी मांग्ता 3तुहुंं मांगु ने जड़े नी, हेरेसी की भुंडला वीच्यार सी मांगु, काहाकी आपणे पाप-धंदाम मुजा लेणे मां उजाड़ देवु। 4सामळु हय तुहुंं, तीनी छीनाळी बायर साय छे, जी आपसा घरवाळाक छुड़ीन दीसरा पुठ्ये छीनाळो करे। तुहुंं ते छाचला भगवान काजे छुड़ीन ईनी कळीन चीजेन हेर कर रया। तुहुंंक जी वात मालुम नी हय काय? की ईनी कळीन कुहरायला माणसेन तसा कुहराय करीन तींद्रे साते दुस्ती करनु भगवान साते खार करनु छे। हेरेसी जु काहनुक जाणी बुजीन ईनी कळीम दुस्तीदार बणने हींडे, चु भगवानेन वेरी बण जाय।#1 युहन्ना 2:15,16 5चुखला सास्तुर मां सी आपणुक जी सीक जड़ली छे, की भगवान जत्यार माणसेक बणायु, तत्यार आपणा जीवो ने डीलो पुठ्ये रहणे करीन जीव-आत्मा काजे बी बठाड़्यु। हेरेसी चु आपणा जीव-आत्मान बारामां जी फीकुर करे, की आपणु जीव-आत्मा तेरे वाटे पुरो जीवणु चाहजे। चुखला सास्तुरेन ज बुल भुंडला वीच्यार सी। असा तुहुंं समजी र्या काय? 6चु भगवान ते आपणे पर बेसका दया देखाड़े। हेरेसी सास्तुर मां ज बी लिखलो छे की “भगवान मटाय करन्यान वीरुद करे, बाकुन नीचळा माणसे पर दया करे।”
7हेरेसी तुहुंं भगवानेन हक मां हय जावु, ने भुतड़ान वातेन वीरुद करता जाय्न भुतड़ा साते गड़दी जावु, ती चु तुंद्रेन्चां सी ढास जासे। 8भगवानेन्चां आवु, ती भगवान बी तुंद्रेन्चां आवसे। ए पापी माणसे। पाप करनु छुड़ देवु, ने तुंद्रा संका काजे छुड़ु, ने चुखला वीच्यार राखु।#जकर्याह 1:3; मलाकी 3:7 9दुखी हवु ने कलप्या करु, ने रड़ु। तुंद्री हासी दुख मां ने तुंद्री खुसी नुरपाणी मां बदली जासे। 10हेरेसी तुहुंं मालीक अगळ नीचळा बण जावु; ती मालीक तुहुंंक नानला सी मटा बणावसे।#भजन सहीता 147:6
भायस्यो पर गुनु लागाड़नु वारु नी हय
11ए भायस्यो ने बहणस्या! तुहुंं एक दीसरान नाव-बद्दी मां करु। भगवान आपसा कायदाम असु हुकुम आपलु छे की, तुहुंं आपसा सातेवाळाक परम करु। हेरेसी कदी तुहुंं, ईसु पर भुरसु करन्या आपसा भायस्योन नाव-बद्दी कर रया, ने तेरे पर गुनु लागाड़ रया हय, ती तुहुंं भगवानेन कायदान नाव-बद्दी कर रया, ने तेरे पर गुनु लागाड़ रया। ने कदी तुहुंं भगवानेन कायदा पर गुनु नाख रया, ती तुहुंं ते भगवानेन कायदान अनसारे चालने वाळा नी, बाकुन तेरे पर नीयाव करने वाळा बण रया। 12कायदु बणावीन आपणे वाळु ते भगवान छे; कायदान अनसारे नीयाव करन्यु बी हयुत छे। हेरेसी माणसेन नीयाव करीन तीनाक नीयाव करने वाळु, नी ते तीनाक बचाड़नेन हक बी तेरे धड़े छे। बाकुन तु कुण छे, जु आपसा सातेवाळा पर गुनु लागाड़ रयु?
मटाय करन्या काजे चेतावणी
13तुहुंं ते ज कय रया, की आज नीते वाहणे हामु काहनाक दीसरा सहर मां जाय्न, “एक साल लग काम करसु ने वेपार करीन नफु कमायसु। बाकुन मारी वात मन लागाड़ीन सामळु ते खरा।” 14तुहुंं ज नी जाणु की वाहणे काय हवसे। तुंद्री जीवाय्न काय ठीकाणो नी हय। तुंद्री जीवाय ते कुळ्ळा साय छे, जी थुड़ीक वार देखाव पड़े ने अंछाप हय जाय।#नीतीवचन 27:1 15हेरेसी तुहुंंक असो कहंणु चाहजे की कदी भगवान मालीकेन मरजी हसे, ती वाहणे बी जीवतेलो रवसु ने ज काम नी ते पलो काम करसु। 16बाकुन तुहुंं ते हय बी असा कह्ता जाय्न मटाय कर रया की हामु जु वीच्यार कर्या तसोन-तसों करसु। असी मटाय भगवानेन नींगा मां भुंडी छे।
17हेरेसी काहनुक भलाय करनु जाणीन बी भलाय नी करे, ती चु पाप कर रयु।
Currently Selected:
याकुब 4: BSP25
Highlight
Copy
Compare
Share
Want to have your highlights saved across all your devices? Sign up or sign in
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
