KIEBEXELU 6

1YI nakatebela pakaxipa Mwana a mukwakwa kilembetelu kimokimwe kia sambwali, yi nakakwombwa kipangu kimokimwe kia bipangu bia môyo binai kidi mu kutôya bea yi diyi dia dikongola, ene, Lwaka. 2Nakatebela lolo, yi mona kabala ka susu obo ; yi you akakikama kulu kwako akadl yi buta ; yi kilongo kiakamupebwa ; yi akabatuka udi mu kudika yi bumanya, yi bixedikayi bumanya.

3Yi pakaxipayi kilembetelu kiamubidi, nakakwombwa kipangu kia môyo kiamubidi kidi mu kutôya ene, Lwaka. 4Yi kamo kabala kakabatuka, kabala ka mumbidi ă maxi ; yi kudi you akaxikama kulu kwako kwakapebwa ndo kuncula polo ku loboko, yi bixexipañana bantu ; yi mwele munene ăkamupebwa.

5Yi pakaxipayi kilembetelu kiamusatu, nakakwombwa kipangu kia môyo kiamusatu kidi mu kutôya ene, Lwaka. Yi nakatebela, yi mona, kabala ka tululu ; yi you akaxikama kulu kwako akadi yi kielekyexelu mu kianca kienci. 6Yi nakakwombwa bea diyi pakacikaci pa bipangu bia môyo binai didi mu kutôya ene, Lwedi lumolumwe lwa masangu a witi ku denalio umoumwe, yi ncedi isatu ya bali ku denalio umoumwe ; mo kwoni ndo manyi ndo malufu a finyo.

7Yi pakaxipayi kilembetelu kiamunai, nakakwombwa diyi dia kipangu kia môyo kiamunai kidi mu kutôya, ene, Lwaka. 8Nakatebela lolo, yi mona, kabala ka susu mubende ; yi you akaxikama kulu kwako, dina dienci ene, Lufu ; yi Adese akalanda yinanci. Yi bumanya bwakabapebwa kulu kwa kicini kimokimwe kia bicini binai bia loboko, ndo kuxipa yi mwele, yi ncala, yi lufu, yi nyama ya bilei ya loboko.

9Yi pakaxipayi kilembetelu kiamutano, nakamona muxi mwa kilongolelu bidimu bia bantu bakaxipibwa bwalo bwa diyi dia Ncembi, yi bwalo bwa ntôbô akatôbôlabo. 10Yi bakakwamena diyi dikola ene, Kikondo kinakala beci, Mukyelengi a babala yi a sôsôlwo, kitasosambola Owe, yi kitasosombolesa bantu maxi ecu bamaxikama ku loboko ? 11Yi miembonda ya susu yakabapebwa, muntu mwoso mwombonda, muntu mwoso mwombonda ; yi bakakwambidibwa ene, bomowi kakondo kabende pôi kikondo kixekukixibwa bambai babo yi bena kwabo baxexipibwa bea biakaxipibwa bobo.

12Yi nakatebela pakaxipayi kilembetelu kiamusambomo, yi mona, loboko lwakatepa kutepa kunene ; yi diba diakapinda tululu bea luna dikutu dia nyonyi fu ; yi ngondo muncimancima akalwa luna maxi ; 13mitoto lolo ya diulu yakapona luna bielela muci ă kikuyi mamoma anci a bisusumbala papunyingixibwau yi lupepele lwa ngulu. 14Yi diulu diakancudibwa bea luna mwobotaku papubotakibwau, yi lupongo lwoso yi kisala kioso biakancudibwa ku bidi biabio. 15Yi bafumu ba loboko, yi bantu banene, yi biliaka, yi badidi, yi bena ngulu, yi bapika boso, yi bena bula boso, bakadisokoka mikyeabo mu ntuxa yi mu mabwe manene a mpongo ; 16yi bakatôyela mpongo yi mabwe manene ene, Nuponi kulu kwecu, nutusokoki ku mpala a You amaxikama ku lukwasa, yi ku bisusu bia Mwana a mukwakwa ; 17bwalo bwapulwa dituku dinene dia bisusu bienci, yi nani ubili kwemana ?

Currently Selected:

KIEBEXELU 6: Luna_NT

Highlight

Copy

Compare