FILIPI 3

1KU sula, bakunyi bamene, nuxekyeleli mu Fumu. Kunufundila bintu bebi kakusongupenyusa, mo ku bwalo bwenu kudi kunuteka ngengele ngengele. 2Nudimuki bwalo bwa yimbwa, nudimuki bwalo bwa basadi babi, nudimuki bwalo bwa bena salu.

3Bwalo butudi bena bwadi coco, bamaxingila Ncembi kudi Mwoxixi a Ncembi, bañana mwanu bwalo kwa Kalistu Yisu, yi kabasokwetabuxila munyu pô ; 4isanga meme ambeci nxeakala mikyemi yi kwetabusa anga ku bwalo bwa munyu. Aka munga muntu mwoso encenca dia kwetabuxila munyu, meme ngwadika. 5Nakakwelebwa bwadi ku diba dia yenana, nakadi muna bubila bwa Isalele, muna bulungu bwa Bencamini, muna Ebeleo a bena Ebeleo ; 6ku bwalo bwa bwadi nakadi muFalixi ; ku bwalo bwa mulukutu, nakakolomona kikokye ; ku bwalo bwa nkwami idi munda mwa bwadi, nakasañanibwa kutena bwalo bubi. 7Kate bintu bebi biakadi yinami sombo kusomboka, kabebi ndo binakabala ene, kupwekyelela, bwalo bwa Kalistu.

8Kate sôsôlwo, ngwabala bintu bioso kabidi mo kupwekyelela bwalo bwa kilubukilu kia Kalistu Yisu Fumwami ; unamapwekyelela ku bintu bioso ku mucwe ănci, yi namabibala luna mwosapu, binxeakala yi Kalistu ku kutetowa kwamene, 9yi binxesananibwa munda mwanci, kumoni yi nkwami yamene idi ya bwadi, kate yei idi ku kwetabusa kwa Kalistu, nkwami yei idi ya Ncembi pa kwetabusa ; 10binxemulubukwa yei, yi ngulu ya kwombuluka kwanci kudi bafu, yi busangilanani bwa masama anci akatatixibwayi, binxefwanixibwa lufu lwanci ; 11ndo ambeci nxepeta ku kwombuluka kudi bafu. 12Kumoni luna kutôya ene, namangata nkyekyu, ndo ene, namakuka nkyekyu, mo ngwalabela ndo ambeci nxekwata bwalo bobu bunakakwacidibwa kudi Kalistu Yisu.

13Bakunyi, kisodienca mikyemi ene, namakwata nkyekyu ; mo ngwencenca kintu kimokimwe ; ngwelelwa bintu bidi kunyuma bwilwa, yi ngwalundikila bintu bidi ku buxi, 14ngwalabela bolongya bwa ngolo, ku sayi ya kubikila koku kutwamabikidibwa kulu kudi Ncembi mu Kalistu Yisu. 15Mbwôso bungi bwecu bamakuka twakali yi lukanyi lwa noku ; yi ndo ku kintu kioso nudi yi nkanyi ibidi, Ncembi unanwebesa isanga bwalo bobu ; 16kaninga bwalo bwa lwedi lutwamafika nkyekyu, twendi pa lwedi lolu.

17Bakunyi, nwakali bokodi bamene, yi nutebeli bantu bendenda bea luna lwendo lwecu lutwakakwelekyesa kwenu. 18Bwalo bwendenda bantu bangi banamanwambila diabo matuku mangi, yi ntananwambila kabidi nkyekyu isanga yi masonci, ene, badi batandañani yi nkulusu a Kalistu ; 19badi yi kixikidilu kiabo ndo kuncimixibwa ; badi yi difu ku ncembi abo ; badi yi mwanu ăbo mu bundu bwabo ; banama bintu bia loboko.

20Bwalo butudi yi bwana bwecu bwa bula munda mwa diulu ; mutwadingidila kabidi Mupandixi, Fumu Yisu Kalistu ; 21unapilula kabidi mumbidi ă kupwexebwa kwecu, bixefwanixibwau mumbidi ă dikai dienci, bea bidi mukixilu ălubukwayi yinau kupwesa isanga bintu bioso kudiyi mikyenci.

Currently Selected:

FILIPI 3: Luna_NT

Highlight

Copy

Compare