FILIPI 2

1MBWOSO ndo kibondelu kioso kidiko munda mwa Kalistu ndo kusambanina kwoso kwa nyinga, ndo busangilañani bwoso bwa Mwoxixi, ndo mwengo mwoso yi mankangi moso, 2nwombudisi kiango kiamene ; nwakali yi lukanyi lumolumwe, yi nyinga umoumwe, yi diyi dimodimwe, bena lukanyi lumolumwe. 3Kanwenci kintu kioso ku bwalo bwa mbata ndo ku disasa, kate muntu mwoso abali yi diedya ku lukanyi ene, muna kwanci umwadika kunengela ; 4nudi mu kutebela kumoni muntu mwoso enu bintu bienci mikyenci ; kate muntu mwoso enu kabidi bintu bia banga bantu.

5Nwakali yi lukanyi lolu munda mwenu lwakadi munda mwa Kalistu Yisu. 6Yei, bwalo bwakadiyi yi mwocindu ă Ncembi, akadi kasokyeba kwakala lwedi lumolumwe yi Ncembi luna ku bwefi, 7kate akadipangulula mikyenci, yi akadiangacila mwocindu ă musadi, yi akalwa yi bufwani bwa muntu. 8Yi pa kusañanibwa yi butonga bwa bantu akadipwesa mikyenci, yi akalwa yi diedya pôi ku lufu, e, lufu lwa nkuiusu.

9Ku mucwe ou kabidi kwakamubandisa Ncembi kulu wapa, yi akamupa dina didi kulu kwa dina dioso ; 10bixekonyama kinu kioso ku dina dia Yisu, kia mu diulu, yi kia ku loboko, yi kia muxi mwa loboko ; 11yi bixesakola ludimi lwoso ene, Yisu Kalistu udi Fumu, ndo kulundisa dikai dia Ncembi Tete.

12Mbwôso banangibwi bamene, bea binwamakwedeya matuku moso, kumoni ku meso amene kutupu, kate nkyekyu nwadika kwenca nako bindi meme kunga, nusali mudimo ă kupandixibwa kwenu yi bowa yi lukomba ; 13bwalo budi you Ncembi encenca munda mwenu yi kunanga yi kwenca, bea bidi muxekyelelu ănci.

14Nwenci bintu bioso kutena mapindu yi kutena mbata ; 15binuxeakala kutena dikamu yi kutena bosaka, bana ba Ncembi kutena kantobo ka bubi, pakacikaci pa mwociya ă makoko yi ă masalu ; unwamonebwa pakacikaci pabo bea minda ku loboko ; 16nudi mu kulongola diyi dia môyo ; binxeakala yi mwanu ă kwana ku dituku dia Kalistu ; ene, nakadi kisoya mbilu kanana, yi nakadi kisokamba kanana. 17Kate ndo namapanguludibwa kabidi bea malufu kulu kwa kixipilu kia kwetabusa kwenu, yi kulu kwa mudimo ăku, ngwamona kiango yi ngwaxekyelela yinenu bungi bwenu. 18Mbwôso mo nako kabidi nonu numoni kiango yi nuxekyeleli yinami.

19Mo ngwencenca mu Fumu Yisu ene, ntumi Timoteo kunudi mankyelonkyelo, binxekolexebwa meme kabidi panalubukwa mwakadilu ěnu. 20Bwalo buntena yi munga muntu umoumwe udi yi lukanyi lwa noku, unadingila mwakadilu enu sôsôlwo. 21Bwalo bwapalala bantu boso bintu biabo mikyeabo, kumoni bintu bia Yisu Kalistu. 22Mo nonu nwalubukwa mwakakwelekyexebwayi, ene, luna mwana yi tetenci ndo biakasalayi yinami ku mudimo ă losangu lunengela. 23Mbwôso ngwencenca ene, mutumi mangwoso, panamona munakala bwalo bwamene ; 24mo namakwetabuxila Fumu ene, meme kabidi nakulwa mo nkyekyu mikyemi. 25Kaninga nakakwenca ene, kudi loko kutuma Epafalodito kunudi, udi muna kwami, yi musadisanani yinami, yi disalai yinami dia Fumu, yi mutumibwi enu, yi musadi enu bwalo bwa bokombi bwamene. 26Bwalo bwakadilayi kunumona bungi bwenu, yi akadi yi buxitu bungi bwalo bunwakakwombwa ene, yei udi yi kusama. 27Yi akadi yi kusama sôsôlwo, pepe yi lufu ; kate Ncembi akamwombwela mwengo ; yi kumoni yei mutupu kate meme kabidi, bintaxeakala yi buxitu kulu kwa buxitu.

28Mbwôso namamutuma yi mulukutu, binuxexekyelela pa kumumona kabidi, yi bixepwekyelela buxitu bwamene. 29Mbwôso numwangati mu Fumu yi kiango kioso ; yi nunemeki bena noku ; 30bwalo ku mucwe ă mudimo ă Kalistu kwakokokyelayi pepe yi lufu, kutena kwombwela môyo ănci mutete, ndo kwombudisa lwedi lwakasaka lwa mudimo ěnu ku bwalo bwamene.

Currently Selected:

FILIPI 2: Luna_NT

Highlight

Copy

Compare