YAKOBO 4

1MBITA yilolwa kupai, yi bitumba kunudi ? Ka bilolwa kunu, isanga kudi mixekyelelu yamafwilañana mu bicini bia mimbidi yenu ? 2Nudi yi xindilu ya bintu, yi kanusoakala yinabio ; nwamaxipa yi nwamakwolubila yi mietumbu, yi kanubiyi kwangata ; nwamatanda bitumba yi mbita ; kanusoangata, bwalo bunutasolomba. 3Nwamalomba yi kanusoangata, bwalo bunwalomba yi mucima mubi, binuxedya ku mixekyelelu yenu. 4Bena mendela, kanusolubukwa ene, bumbila bwa bena loboko budi nkyetekyete yi Ncembi ? Mbwôso muntu mwoso amananga kwakala kimbila kia loboko udiateka mikyenci mutandanani yi Ncembi. 5Nonu nwakanyakanya ene, mukanda ă Ncembi ămatôya kanana ? Mwoxixi amaxikikayi munda mwa micima yecu amaxindila lolo isanga ku mwokunyo ? 6Mo yei upapa lwoxixi lwamadika bungi. Ndo biatôyayi ene, Ncembi ndo atanda yi bena masasa, mo upapa bantu baiebela lwoxixi. 7Mbwôso nwedeyi Ncembi ; mo nutandi yi diabolo yi yei unacina kunudi. 8Nukokyeii pepe yi Ncembi, yi yei unakokyela pepe yinenu. Nukusuli makaci enu, boni ; yi nususuli micima yenu, bena micimbucimbu. 9Nwombwi mpeya, nudili, nunculi masonci ; tuxoko twenu tukulumunibwi ku bidilu, yi kiango kienu ku buxitu. 10Nudipwesi mikyenu ku meso a Fumu, yi yei unanubandisa.

11Kanutangolanani, bakunyi. You amatangola muna kwanci amatangola bwadi yi amabeia bwadi ; mo ndo wabela bwadi, kuna mukixi a bwadi, kate musambodi. 12Mo umoumwe mutupu udi mupi a bwadi yi musambodi ; you ubili kupandisa yi kuxipa ; mo owe udi nani wamasambola muna kwebe ?

13Nwombwi nkyekyu, nonu bamatôya ene, ndo lelo ndo mankyelo tunaya mu bula bobu, yi tunaxikama momu mbula muncimancima, yi tunaleka yi tunatetowa yi bintu ; 14nonu pako batasolubukwa bwalo bunakala mankyelo. Môyo ěnu udi beci ? Bwalo budiu lubungi, lwamamoneka kakondo kabende, yi kunyuma lwamancimina. 15Ki nuxetôya ene, Ndo Fumu ananga, tunakala yi môyo yi tunakwenca noku yi noku. 16Mo nkyekyu nudi mu kwana mu mianu yenu ; kwona kwosa kwa noku kudi bubi. 17Mbwôso you ubili mwa kwenca kunengela, yi kasokwenca, ku bwalo bwanci nako kudi kwona.

Currently Selected:

YAKOBO 4: Luna_NT

Highlight

Copy

Compare