EFESO 2

1YI nonu, bakadi bafu mu mona enu yi mu mabi enu, 2anwakakwenda munda mwao kalikali yi mwendelu ă mwociya ă loboko lolu, mwendelu ă fumu a bumanya bwa dinamu dia mwoxixi kulu, kidimu kieki kiamakwencañana nkyekyu mu bana ba ntamu. 3Yi coco kabidi bungi bwecu twakakwenda yinabo kalikali mu xindilu ya munyu ecu, twakadi mu kwenca nyinga ya munyu yi ya nkanyi ; yi ku butonga bwecu twakadi bana ba bisusu bea banga bantu.

4Mo Ncembi you, udi yi bodidi bwa mwengo, bwalo bwa nyinga yenci mingi yakatunangayi, 5isanga patwakadi bafu bwalo bwa mona ecu, amatuteka yi môyo yi Kalistu ndongo ; (nwamapandixibwa ku lwoxixi) ; 6yi amatubandisa yinanci ndongo, yi amatuxikika yinanci ndongo mu melu kulu, munda mwa Kalistu Yisu ; 7bixekwebesayi madidi amalekola bungi a lwoxixi lwanci mu mieciya yilolwa, ku bonkangi bulolwa kutudi munda mwa Kalistu Yisu. 8Bwalo bunwamapandixibwa ku lwoxixi, ku mucwe ă kwetabusa ; yi koku noku kumoni kwenu mikyenu ; kudi dilongi dia Ncembi ; 9kumoni bwalo bwa makisa, bitaxekwana muntu mwoso mwanu. 10Bwalo bututani mudimo ănci ; twamapangibwa munda mwa Kalistu Yisu bituxekwenca makisa anengela akalungika Ncembi buxi bituxekwenda munda mwao.

11Mbwôso nweli nkanyi ene, kalikali nonu nwakadi mu munyu. Nwamabikidibwa bena mientonto kudi bantu bamabikidibwa bena bwadi mu munyu, bwamakwelebwa ku makaci. 12Mbwôso ku kikondo yikia nwakadi kutena Kalistu, nwakanamunibwa kudi bubila bwa Isalele, yi nwakadi bantu babene ku bwalo bwa masambi a kilaka ; nwakadi kanuna yi mudingidilu yi kanuna yi Ncembi ku loboko. 13Mo nkyekyu, munda mwa Kalistu, nonu bakadi kulekule kalikali nwamatekyebwa pepe ku maxi a Kalistu. 14Bwalo budiyi polo ecu akateka babidi umoumwe, yi akaxipa kididi kia nkalu kiakadi pakacikaci ; 15bwalo bwakalengolayi nkyetekyete mu munyu ănci, bwadi bwa milangu ya mixiyilu yakaxiyibwa ; bixepangayi muntu umoumwe mupyamupya munda mwanci mikyenci kudi bantu babidi. Mbwôso akateka polo nako. 16Bixekwameyayi lolo bubidi bwabo mu mumbidi umoumwe kidi kimokimwe yi Ncembi, ku nkulusu ; bwalo bwakaxipayi nkyetekyete koku. 17Yi akalwa yi akakwambila losangu lunengela Iwa polo kunudi bena kulekule, yi lwa polo kudi bantu, bena pepe. 18Bwalo kudiyi ndo kutwakala bubidi bwecu yi kibwelelu kiecu kudi Mwoxixi umoumwe kia kuya kudi Tete.

19Mbwôso kanuna kabidi bantu babene yi benyambango, kate nudi bena bula bumobumwe yi bena babala, yi nudi bena nkumbu a Ncembi ; 20yi nwamakwabakibwa kulu kwa kibangolelu kia batumibwi yi badimuxi, yi Kalistu Yisu mikyenci apwakala dibwe dinene dia ku ilunga basodi. 21Munda mwanci ndo mwamasambikanana kicini kioso kia ncibo loko, kidi mu kulunda lunda ku tempelo a babala mu Fumu. 22Munda mwanci nonu kabidi nwamakwabakibwa kidi kimokimwe ndo kwakala ncibo a Ncembi kudi Mwoxixi.

Currently Selected:

EFESO 2: Luna_NT

Highlight

Copy

Compare