MAKISA 21

1PAKADI twamanamuka kudibo, twakakondela mu kibusu yi twakaxembama swi kulwa ku Koso, dimo diba ku Lodese, yi mo nako ku Patala ; 2bitwakasafiana lolo kibusu kixelekyela kuya ku Finiki, twakakondela yi twakaya. 3Patwakalwa yi Kupuloso ku meso, twakakuxiya ku kimoso yi twakafika ku Silia yi twakanamata ku Tile, bwalo buxesabulabo bintu koku bia mu kibusu. 4Yi pakadi twamapomana yi beyi twakasala koku matuku sambwali ; yi baba noku bakatôyela Paulu kudi Mwoxixi ene, kaxeximuna ku Yelusaleme. 5Mo pakadi twamamana matuku, twakancuka kuya ku lwendo Iwecu ; yi bobo bungi bwabo yi bakaxi yi bana bakatuxiya mu ncila bitwakadi kunci kwa bula ; yi twakakuma binu pa mbongo, twakalomba, 6yi twakalayisañana ; coco lolo twakakondela mu kibusu, kaninga bobo bakapinana kunci kabidi.

7Yi pakadi twamamana Iwendo lwa kibusu ku Tile, twakafika ku Tolemaisi, twakakwela bakunyi môyo ; yi twakasala yinabo dituku dimodimwe. 8Diamubidi lolo twakancuka yi twakalwa ku Kyesalia ; twakabwela mu ncibo a Filipi, mwambidi a losangu lunengela, akadi muna sambwali, yi twakasala yinanci. 9You muntu lolo akadi yi bana banai ba babakaxi, banciki, bakadimusa.

10Yi bitwakasala koku matuku mangi, muntu munga, diena dienci ene, Angabusu, mudimuxi, akapweka ku Yudiya, 11yi pakadi amalwa kutudi, akangata mwokaba ă Paulu, akadisuka mikyenci makasa anci yi bianca, yi akatôya ene, Mwoxixi a babala atôya ene, Muntu udi fumu a mwokaba ou, bena Yuda ba ku Yelusaleme banamusuka mo nako, yi banamulonga ku makaci a mabila.

12Patwakakwombwa bintu bebi, yi coco yi bena kidi kieki bakamubonda bonda kaximuni ku Yelusaleme. 13Kaninga Paulu akapingasa ene, Nwencenca kai ? nudi mu kudila yi kuxipa mucima ămene ? bwalo bunamakwetabuxila kumoni kusukibwa kutupu, kate kufwa ku Yelusaleme, ku mucwe ă dina dia Fumu Yisu. 14Yi pakadi yei kasokwetabuxixibwa, coco twakapudikila ene, Nyinga ya Fumu yencebwi.

15Kunyuma kwa matuku yia, twakalungika bintu biecu, yi twakaximuna ku Yelusaleme. 16Yi banga beyi ba ku Kyesalia bakaya yinecu, bakacwala yinabo muntu dina dienci ene, Nasono, muna Kupuloso, mweyi a kalikali utuxesala kwanci.

17Yi patwakafika ku Yelusaleme, bakunyi bakatwangata yi kiango. 18Ku diba diamubidi, Paulu akabwela yinecu kudi Yakobo, yi koku kwakalwa bungi bwa babakulu. 19Pakadi amabela môyo, akakwambila bintu ku kintu ku kintu, biakakwenca Ncembi kudi mabila ku busadi bwanci. 20Pakakwombwabo bakatumbisa Ncembi, yi bakamwambila ene, Wamona, muna kwecu, badi nkone nkone ya bena Yuda bamakwetabusa, yi batani yi mulukutu, bo-a-bwoso, ă kunama bwadi ; 21yi bamakwambidibwa ku bwalo bwebe ene, weyesa eyesa bena Yuda boso badi ku mabila bakadeyi Mosese, ene, kabedi bana babo bwadi, kabekyedi yi miesambu ya bena Yuda. 22Mbwôso beci ? Banakwombwa sôsôlwo ene, wapulwa. 23Mbwôso encapo bitukwambila. Tudi yi babalumi banai badi yi kiteyi kiamateyabo ; 24ubangati, udikusuli ymabo, ubancudili mpalata bixekuludibwabo micwe yabo ; yi bantu boso banalubukwa ene, ku bintu biamakwambidibwabo ku bwalo bwebe, kakuna sôsôlwo ; kate owe mikyebe wendenda yi nkwami, wamanama bwadi. 25Kaninga bwalo bwa bena mabila bamakwetabusa, twakafunda bitwakasambola, ene, badinamuni mikyeabo kudi bintu biamalongolebwa ngixi, yi ku maxi, yi ku nyama amafinibwa xingu, yi ku diendela. 26Yi Paulu akangata babalumi, yi ku diba diamubidi kwakabwelayi yinabo munda mwa tempelo pakadi amakusudibwa, yi akakwebesa kikondo kixepwa matuku a kukusudibwa, bixelongolebwa dilongi ku mucwe ă muntu mwoso yinabo.

27Pakadi lolo matuku sambwali adi pepe yi kupwa, bena Yuda ba mu Asia, pakamumonabo mu tempelo, bakatepesa bungi bwa kimbukuma, yi bakamubamba, 28bakakwelañana miebeki ene, Bena Isalele nutukwati ; you ndo muntu eyesa bantu boso mu bidi bioso bwalo bwa bubila bwecu, yi bwa bwadi, yi bwa kidi kieki ; amabwesa lolo bena Ngiliki munda mwa tempelo, yi amakwona kidi kieki kia babala. 29Bwalo bwakamonabo Tolofimo, muna Efeso, yinanci munda mwa bula, akakisabo ene, Paulu apumubwesa munda mwa tempelo. 30Yi bungi bwa bula bakanyingixibwa, yi bantu bakasangañana kidi kimokimwe ; yi bakakwata Paulu, bakamuputulua kunci kwa tempelo, yi mbelo ya tempelo yakancibikibwa mangwoso. 31Yi pakapalalabo kumuxipa, mwoximo ăkafika kudi kiliaka kia masalai ene, bungi bwa Yelusaleme budi muyengi mutupu ; 32yei lolo akangata yinanci masalai mangwoso yi tupalai, yi akaya kudibo lubilu. Kaninga bobo, pakamonabo kiliaka yi masalai, bakalekyela kukuma Paulu. 33Kunyuma kiliaka kiakafika yi kiakamukwata, yi kiakatôya ene, asukibwi nkanu ibidi, yi kiakakwapangusa ene, udi ñani yi apwenca kai ? 34Yi banga bakakwamena diyi dimodimwe, banga dinga, ku kimbukuma ; yi pakadi kabiyi kufika ku dicina bwalo bwa mulaku, akatôya ene, acwadibwi munda mwa lumbu lwa masalai. 35Kaninga pakafikayi pa bikyengete, akakwombuludibwa kudi masalai ku bwalo bwa bantu bwolemo bwabo ; 36bwalo bwakamulanda kimbukuma kia bantu, badi mu kwamena ene, Xakwala muntu you.

37Mo paxebwexebwa Paulu mu lumbu lwa masalai, akakwapangusa kudi kiliaka, ene, Mbekwambilapo kintu. Yei akatôya ene, Owe walubukwa luna Ngiliki ? 38Owe kuna lolo muna Ecipito you, akanyingisa bantu batomboki, yi akaxiyaxiya bantu mu mbata a kisobe buxi bwa matuku aa noku, nkone inai ya baxipañani ? 39Kaninga Paulu akatôya ene, Meme ndi muna Yuda a ku Taso mu Kilikia, muna bula butena bubende ; nkwalomba lolo ungwambidisipo bantu. 40Yi pakadi apumwetabusa, Paulu akakwemana pa bikyengete, akasongela bantu kianca kienci ; pakadi lolo bapwakala polo tebai akabambila luna Ebeleo ene,

Currently Selected:

MAKISA 21: Luna_NT

Highlight

Copy