MAKISA 20

1PAKAPWA muyengi, Paulu akabikila beyi, akababondabonda, yi akabalayisa, yi akancuka kuya ku Makyedonia. 2Pakadi amatanga mbata yei noku, yi amababondabonda bibondelu bingi, akalwa ku Ngiliki. 3Pakadi amamana ngondo isatu koku, yi bamamuladila ndambu kudi bena Yuda, paxencukayi lwa kibusu kuya ku Silia, akakwela lukanyi iwa kupinana lwa Makyedonia. 4Yi Sopata mwana a Pilo, muna Belea, akasangila yinanci pôi ku Asia ; yi bena Tesalonika, Alistako yi Sekundu ; yi Ngayo muna Debe, yi Timoteo ; yi bena Asia, Tikiko yi Tolofimo. 5Bobo bakatulwangwala yi bakatukungila ku Toloasa ; 6kaninga coco twakancuka ku Filipi lwa kibusu, kunyuma kwa matuku a mampa atena kiolubixilu, yi twakalwa kudibo ku Toloasa mu matuku atano ; kutwakasala matuku sambwali.

7Ku dituku lolo dia buxi dia lumingu, kutwakasangila kulwa nyowa dimpa, Paulu akabakwamina, uxencuka bea mankyelo ; yi akakwama dikwami pôi munda mwa butuku. 8Munda mwa ngumbu a kulu mutwakasangila mwakadi minda mingi. 9Yi dipulwa, dina dienci ene, Eutuko, akaxikama ku mbelo mubende, amayimbwela yi tulu tungi ; yi pakadi Paulu ukiakwama dikwami dingi, yei akanemenenebwa tulu, akapona paxi bu, pôi kicini kia ncibo kiamusatu kulu, yi akakwongudibwa amafwa. 10Kaninga Paulu akapweka, akamwekamina, akamupotamina, yi akatôya ene, Kanuteki mulaku, bwalo budi môyo ănci munda mwanci. 11Pakadi amabanda, amanyowa dimpa, amadya, amakwambila yinabo kikondo kingi biakakya butuku, mo nako yei akancuka. 12Yi bakacwala dipulwa Smôyo, yi bakabondebwa kibondelu ngi ku micima.

13Mo coco twakaya buxi ku kibusu yi twakaya ku Asoso kuya kondelesa Paulu koku ; bwalo bwakatôyayi noku, mikyenci ndo kuya lwa mukidi. 14Yi pakatusañanayi ku Asoso, coco twakamubwesa, yi twakalwa ku Mitilene. 15Bitwakancuka koku, twakalwa diba dia nyuma ku mpala a Kioso ; diamusatu lolo twakanamata ku Samoso, yi ku dimo diba twakalwa ku Mileto. 16Bwalo bwakakwenca Paulu kudika pa Efeso, bitaxemanayi kikondo mu Asia ; udi mu kwenda lungwoso, kuya fika ku Yelusaleme, ndo uxelubukwa kufika, ku diba dia Pentekosto.

17Ku Mileto kwakatumayi ku Efeso, yi akabikila babakulu ba kikokye. 18Yi pakafikabo kudiyi, akabambila ene, Mikyenu nwamalubukwa mwosambu unakadi yinau kwenu kikondo kincimancima, pôi dituku dia buxi dinakafika mu Asia ; 19nakasadila Fumu yi diedya dioso, yi masonci, yi mpeya yakangulula bwalo bwa ndambu ya bena Yuda ; 20muntaxitili kunusakolela diembi dioso dia loko yi kunweyesa ndo kunci ndo mu ncibo mu ncibo ; 21namatôbôlela yi bena Yuda yi bena Ngiliki dia kudibela ku bwalo bwa Ncembi, yi dia kwetabusa ku bwalo bwa Fumu Yisu Kalistu. 22Nkyekyu lolo, mona, ntanaya ku Yelusaleme, musuka ku mucima, kutena kulubukwa bintu binanguponena koku ; 23kaninga Mwoxixi a babala ungwatôbôlela ku bula bwoso, ene, nkanu yamangukungila yi maxitu. 24Kaninga kisobala môyo ămene bwalo bungi, ndo dipiko dikola kundi mikyemi, kate ngwadila kusudeya ncila amene, yi busadi bunakangata kudi Fumu Yisu, ndo kusakola losangu lunengela lwa lwoxixi lwa Ncembi. 25Nkyekyu lolo mona, ngwalubukwa ene, nonu bungi bwenu banamakwenda yinenu ndi mu kwambila bufumu, kanunamona mpala amene kabidi nyô. 26Mbwôso meme nwatôbôlela lelo, ene, namasuwa ku bwalo bwa maxi a bantu boso. 27Bwalo buntaxitili kunusakolela lukanyi lwa Ncembi luncimancima. 28Mbwôso nudidingili mikyenu, yi bungi bwa kibumbu kia mikwakwa, kinwamatekyebwa banami bakio kudi Mwoxixi a babala, nudisi kikokye kia Ncembi kiamakwolayi ku maxi a you anci mikyenci. 29Ngwalubukwa ene, kunyuma kunamancuka kunabwela ngasama ya bubi kunudi, yitasokwombwela kibumbu kia mikwakwa mwengo ; 30yi kunudi mikyenu kunakwemana bantu, banatôya malo atena yi nkwami, ndo kusalula beyi babalandi. 31Mbwôso nudingili ; nweli nkanyi ene, ku lwedi lwa mbula isatu meme kilekyeleli kudimusa muntu mwoso, yi ku butuku yi ku munyinya, yi masonci. 32Nkyekyu lolo meme nwalongola kudi Ncembi yi diyi dia lwoxixi lwanci, dialubukwa kunwabaka, yi kunupa mwokito yi bungi bwabo bamabalolebwa. 33Kikyebeli mpalata ya muntu mwoso, ndo ôlo, ndo bilamba. 34Nonu mikyenu nwamalubukwa ene, makaci aa amasadila bintu binamakwayila, yi bantu bakadi yinami. 35Namanwebesa bintu bioso mutuxekwenca noku, ndo kusadila bena mabombu, yi tuxekwela meyi a Fumu Yisu nkanyi akatôyayi mikyenci ene, Kupa kwamadika kwangata lwoxixi.

36Pakadi amatôya noku, akakuma binu paxi yi akalomba yinabo bungi bwabo. 37Yi bakadila kudila kungi yi bakapona pa xingu a Paulu, yi bakamunyita nyita, 38bakadika yi buxitu bwalo bwa diyi diakatôyayi ene, kabaxemona mpala anci kabidi. Yi bakamuxindikisa ku kibusu.

Currently Selected:

MAKISA 20: Luna_NT

Highlight

Copy