MAKISA 12
12
1KU kikondo kieki kwakaxombola Elodo fumu bianca ndo kukolomona banga bena kikokye. 2Yi akaxipa Yakobo, Yoano mukulwanci ku mwele. 3Pakamonayi lolo nako kwamaxekyelesa bena Yuda, akaya bamba Pita kabidi. Aa ndo matuku a mampa atena kiolubixilu. 4Pakadi amamukwata, akamuteka mu ncibo a lukanu, yi akamulongola kudi bibumbu binai bla masalai anai, anai, ndo kumunama ; akakwenca ndo kumubatusa kudi bantu kunyuma kwa Kidikixilu.
5Mbwôso Pita akanamibwa mu ncibo a lukanu ; kaninga ndombu yakamulombelebwa kudi Ncembi yi mulukutu, kudi kikokye. 6Yi pakakyeba Elodo kumubatusa, ku butuku bobu kwakalala Pita tulu pakacikaci pa masalai abidi, musuka yi nkanu ibidi ; yi banami ku mbelo bakanama ncibo a lukanu. 7Yi mona, mwangele a Fumu akalwa koku, yi obo akalumuka mu ncibo ; yei lolo akakuma Pita lubalu, akamubisa ene, Ombuluka mangwoso. Yi nkanu yakaxelamuka ku bianca bienci. 8Yi mwangele akamwambila ene, Lata, suka sabato yebe. Yi akakwenca nako. Akamwambila ene, Teka kinkutu kulu, ungulandudili. 9Yi akabatuka, yi akamulanda ; akadi kabiyi ene, mudi sôsôlwo mwakakwencebwa kudi mwangele, mo akakwenca ene, amamona dilu dia mu tulu. 10Pakadi bamadika kibumbu kia buxi yi kiamubidi kia masalai, bakalwa ku lukuki lwa kidimadima, lwa kuya ku bula, lwakabadipukila mikyelu ; yi bakabatuka, bakapweka pa mwolongo umoumwe, yi mwangele akamuxiya papa noku.
11Pita lolo, pakadilembetelayi, akatôya ene, Nkyekyu ngwalubukwa sôsôlwo ene, Fumu aputuma mwangele anci, apungupaula mu kianca kia Elodo, yi ku mudingidilu mwoso ă bantu ba bena Yuda. 12Pakalubukwayi loko, akalwa ku ncibo a Mali, Yoano mamanci, udi yi lukumbu ene, Maku ; kwakasangila bantu bangi, badi mu kulomba. 13Pakakwakwalayi ku lukuki lwa kibwelelu, muxika akalwa ombwa, dina dienci ene, Loda. 14Pakalembetelayi diyi dia Pita, akadi kasodipula mbelo bwalo bwa kiango, kaninga akaya munda lubilu, yi akatôya ene, Pita amakwemana ku kibwelelu. 15Yi bakamwambila ene, Wamapasuka. Kaninga yei akatôya yi ngulu ene, Kudi mo nako. Yi bobo ene, Kudi mwangele anci. 16Mo Pita akakwakwala kwakwala, yi pakadipulabo, bakamumona, yi bakakama kama. 17Kaninga yei akabasongela kianca bakali polo, yi akabambila mwakamubatusa Fumu mu ncibo a lukanu. Akatôya lolo ene, Nwambili Yakobo bintu bebi, yi bakunyi. Yi akancuka, akaya ku kinga kidi.
18Pakalwa munyinya pakadi muyengi mungi kudi masalai bwalo bwa Pita, kupai kwapuyayi. 19Pakadi Elodo amamupalala, yi kamusañanini, akakwelela banami mwoxondo, yi akatôya ene, baxipibwi. Yi akapweka ku Yudiya kuya ku Kyesalia, yi akaxikama koku.
20Yi akakwombwela bena Tile yi bena Xidono bituku bingi ; mo bakalwa kudiyi bo-a-bwoso, yi pakadi bamakwetabuxisa Balasto, munami a ntangi a fumu, bakaiomba polo, bwalo bwakadixibwa mbata abo ku mbata a fumu. 21Yi ku dituku diakatambibwa, Elodo akaiata bilatu bia bufumu, akaxikama ku nkwasa katakai, yi akabakwamina dikwami. 22Yi bantu bakakwamena ene, Diyi dia Ncembi, kumoni dia muntu. 23Yi mwangele a Fumu akamukuma mangwoso, bwalo butapelayi Ncembi lotumbu, yi akadibwa kudi miengenyi, yi akakica dvendeli.
24Kaninga diyi dia Ncembi diakalunda, diakalelañana.
25Yi Banabasa yi Saulu bakapiñana ku Yelusaleme, pakadi bamamana mudimo ăbo, bakacwala yinabo Yoano udi yi lukumbu lwanci ene, Maku.
Currently Selected:
MAKISA 12: Luna_NT
Highlight
Share
Copy
Want to have your highlights saved across all your devices? Sign up or sign in
© La Société biblique de Genève
