MAKISA 10

1KU Kyesalia kwakadi muntu, dina dienci ene, Kônelio, kapalai ka kibumbu kia masalai kiabikidibwa ene, kia Italia ; 2muna nkwami, akacina Ncembi yi bungi bwa ncibo anci, akapa bantu malongi a mwengo mangi, yi akalombela Ncembi matuku moso. 3Akamona loko mu dilu, pa ola dibwa a munyinya, mwangele a Ncembi utanabwela kudiyi, akamutôyela ene, Kônelio. 4Yei lolo akamunamacisa meso, yi akacina bowa, akatôya ene, Kiñani, Fumu ? Akamwambila, ene, Ndombu yebe yi makisa ebe a mwengo amaximuna kimonenu ku mpala a Ncembi. 5Nkyekyu lolo tuma bantu ku Yopa kuya angata Ximono, udi yi lukumbu ene, Pita. 6Udi pa kidi kia Ximono, mweni a makoba, udi yi ncibo anci ku mwanca ă mai manene. 7Pakadi mwangele amakwambila yinanci apuncuka, akabikila basadi babidi ba ncibo anci, yi disalai dia nkwami dia bantu bakamusadila matuku moso ; 8yi pakadi amăbasakolela bintu bioso, akabatuma kuya ku Yopa.

9Mankyelo lolo, pakakwendabo ku lwendo lwabo, yi bamafika pepe yi bula, Pita akabanda kulu kwa ncibo kuya lomba, pa ola amusambomo. 10Yi akakwombwa ncala, akakyeba kudya ; mo pakalambabo, yei akamona bea dilu dia tulu ; 11yi akamona diulu diamadipudibwa, yi kintu kinene kiamapweka, bea mbuxa munene, kiamapwexebwa paxi pa macu akio anai ; 12kiakadi nyama mioso munda ya mikolo inai, yi bintu bialambalala paxi, yi nyonyi ya kulu. 13Yi diyi diakalwa kudiyi ene, Emana Pita, xipa, dyaka. 14Mo Pita ene, Kañana, Fumu, bwalo buntadili kintu pô kia kanana ndo kia mbindu. 15Yi diyi diakalwa kudiyi diamubidi, ene, Bintu biamakusula Ncembi, owe kutambi ene, bia kanana. 16Nako kwakakwencebwa menca asatu, yi kintu kiakangacibwa mangwoso munda mwa diulu.

17Pakadi Pita ukielela lukanyi munda, lwa dilu dicina diadio diapumonayi, mona, bantu bakatumibwa kudi Kôneliô, bamapalala ncibo a Ximono, bakakwemana ku mbelo, 18bakakwela diyi, bakakwapangusa ndo Ximono abikidibwa ene, Pita udiko. 19Mo pakakwela Pita dilu lukanyi, Mwoxixi akamwambila ene, Mona, bantu basatu bakwapalala. 20Kate emana, pweka, sangila yinabo kutena kuxitaxita, bwalo bunapubatuma mikyemi. 21Pita lolo akapweka kudi bantu, yi akatôya ene, Mona, meme ndi you unwapalala ; bwalo bunwapulwa budi beci ? 22Yi bakatôya ene, Kônelio, kapalai, muna nkwami acina Ncembi, amatôbôlelebwa ntôbô kudi bungi bwa bubila bwa bena Yuda, akakwebexebwa kudi mwangele a babala akubikili ku ncibo anci, a-ombwi meyi kudi. 23Mbwôso akababwesa munda yi akabaladisa momu. Mankyelo akabika, akaya yinabo, yi banga bakunyi ba ku Yopa bakaya yinanci. 24Mankyelo bakabwela mu Kyesalia. Mo Kônelio akabadingidila, amabikila bilungu bienci, yi bimbila bienci. 25Pakadi Pita udi mu kubwela, Kônelio akapomana yinanci, akapona paxi, akamuxingila. 26Kaninga Pita akamwombulula ene, Emana, meme kabidi ndi muntu mikyemi. 27Akabwela lolo, udi mu kwambilañana yinanci, yi akasañana bangi bamasangila. 28Yi akabambila ene, Nonu nwalubukwa ene, kakusolelekyela yi bwadi, muna Yuda kunamatañana ndo kusangilañana yi muna bubila bunga, mo Ncembi apungwebesa meme, kibikidi muntu mwoso ene, muntu a kanana ndo a mbindu. 29Mbwôso kabidi, binapubikidibwa, napulwa kutena kwelesa mbata. Ngwapangusa lolo, kukai nwamangubikila ? 30Yi Kônelio ene, Matuku amadika anai, nakadi namancila bidya pôi ola you, yi pa ola dibwa nakadi mu kulomba mu ncibo amene ; yi mona, muntu akakwemana ku mpala amene yi mbuxa a dikai obo, 31akatôya ene, Kônelio, lulombu lwebe lwapwombwebwa, yi makisa ebe a mwengo amakwelebwa lukanyi ku mpala a Ncembi. 32Mbwôso tuma ku Yopa, kuya angata Ximono, abikidibwa ene, Pita ; axikama mu ncibo a Ximono, mweni a makoba, ku mwanca ă mai manene. 33Binakatuma kudi mangwoso, yi owe wapwenca loko bwalo bwapulwa. Mbwôso tutani kunu cu-a-bwoso ku mpala a Ncembi ndo kwombwa bintu bioso biamakutôyelebwa kudi Ncembi.

34Yi Pita akadipula musuku ăncl yi akatôya ene, Ngwalembetela sôsôlwo ene, Ncembi kiena munamuni a bantu pô, 35kate ku bubila bwoso, muntu umwacina, yi encenca yi nkwami, udi yi dikasa dinengela ku mpala anci. 36Diyi diakatumayi kudi bana ba Isalele, dia kwambila polo kudi Yisu Kalistu, (yei ndo Fumu a bantu boso),— 37nwamalubukwa bwalo bobu, bwamacakana mu bungi bwa Yudiya, bwakabanga ku Ngalili kunyuma kwa kunumeyebwa kwakakwambila Yoano ; 38bwa Yisu a Nasalete ; mwakamuxinga Ncembi yi Mwoxixi a babala yi ngulu ; akadikanana udi mu kwenca kunengela, yi kupandisa bantu boso bakafinibwa kudi diabolo ; bwalo bwakadi Ncembi yinanci. 39Coco kabidi badi batôbôdi ba ntôbô ba bintu bioso biakakisayi yi mu mbata a bena Yuda yi ku Yelusaleme ; akaxipabo kabidi, bamamukopeka kulu kwa muci. 40You, Ncembi akamubisa ku dituku diamusatu, akamupa amonebwi ku meso, 41kumoni kudi bantu boso, kate kudi bena ntôbô bakasungudibwa buxi kudi Ncembi, isanga coco, bakadya yi bakanwa yinanci kunyuma kwakakwombulukayi kudi bafu. 42Akatulanga lolo dia kwambila bantu, yi dia kutobôla ene, mikyenci ndo you akasungudibwa kudi Ncembi akali musambodi a bena môyo yi a bafu. 43Ku bwaio bwanci kwamatôbôla bungi bwa badimuxi ntôbô, ene, ku dina dienci, muntu mwoso umwetabuxila unangata kulekyelebwa kwa mabi.

44Pakadi Pita ukiatôya meyi aa, Mwoxixi a babala akapona pa bantu boso bakakwombwa diyi. 45Yi betabuxi ba bena bwadi bakakama kama, bakadi bamalwa yi Pita, bwalo bwakapanguludibwa dilongi dia Mwoxixi a babala pa mabila kabidi ; 46bwalo bwakabombwabo badi mu kutôya yi ndimi, badi mu kutumbisa Ncembi. 47Yi Pita akapingasa ene, Muntu udiko ubili kunyañana mai, baba kabanumeyebwi bapwangata Mwoxixi a babala bea coco kabidi ? 48Yi akatôya ene, banumeyebwi mu dina dia Yisu Kalistu. Kunyuma bakamulomba asali matuku mabende.

Currently Selected:

MAKISA 10: Luna_NT

Highlight

Copy