1 KOLINTI 9

1KA meme ndo muna bula ? Ka meme ndo mutumibwi ? Ka meme namamona Yisu Fumwecu ? Ka nonu nudi mudimo ămene mu Fumu ? 2Ndo kisoakala mutumibwi kudi banga bantu, ngwakala noku kunudi sôsôlwo, bwalo bunudi nonu kilembetelu kia butumibwi bwamene mu Fumu. 3Kukyata kwamene kudi bantu bangwakwakwala kudi noku, ene, 4Coco katuna yi bumanya bwa kudya yi bwa kunwa ? 5Coco katuna yi bumanya bwa kucwala mukaxi (ndo apwakala muna kwecu), bea bamo batumibwi, yi bea bana ba Fumu mamanci, yi bea Kyefasa ? 6Sungu mo meme yi Banabasa badiko batena yi bumanya bwa kulekyela kwenca mudimo ? 7Ñani uyeya ku kikondo kioso kuya tanda mbita, udiacinda mikyenci dicindu ? Ñani akuna kibidi kia finyo yi kasodya mamoma akio ? Ndo ñani anama kibumbu kia bibôbô yi kasonwa mabele a kibumbu ? 8Ngwatôya bintu bebi bea mutôyelu ă bantu ? Ki bwadi kabidi bwamatôya noku ? 9Bwalo bwakafundibwa mu bwadi bwa Mosese ene, Kusuki musuku ă ñombi panyata nyatayi miebele. Ncembi amadinyingisa mikyenci ku bwalo bwa ñombi mitupu ? 10Ki ku micwe yecu kwatôyayi noku dyendeli ? Ku micwe yecu sôsôlwo kwakafundibwa noku ; bixedima mudimi yi mudingidilu, yi bixekwesa mwexi yi mudingidilu ă kudya kunyuma.

11Coco ndo twamanukunina bintu bia Mwoxixi, kudi bwalo bunene ndo twabuka bintu bienu bia munyu ? 12Ndo banga badedya bumanya bobu kulu kwenu, ka coco tuxedika ? Kate coco twakadi katusokwenca yi bumanya bobu, kate twombombwa bintu bioso yi bwika ximbi tuxekanda losangu lunengela lwa Kalistu. 13Nonu kanusolubukwa ene, bobo basadila bintu bia babala badedya bidya bia tempelo ? Yi bobo basadila kilongolelu ka badedyañana yi kilongolelu ? 14Mo nako Fumu amalungika ene, bobo bambila losangu lunengela baxedya bidya bia losangu lunengela. 15Kaninga meme kiakisa yi kintu kimokimwe kia noku ; yi kisofunda bintu bebi bixengwencebwa noku ; bwalo bungwatunga kufwa, kumoni muntu mwoso kulengola mwanu ămene ungwañana. 16Mo ndo ngwambila losangu lunengela, kiena yi kianinu kia kwana mwanu ; bwalo bunamabambibwa dibambu ; ya, mpeya kundi ndo kisokwambila losangu lunengela. 17Ndo ngwencenca noku ku nyinga yamene mikyemi ndi yi sayi ; kate ndo yi nyinga yamene kumoni, bunkôngôlo bwamangupebwa. 18Sayi amene udi beci lolo ? Mo pa kwambila losangu lunengela, nxeteka losangu lunengela kutena diso, bintaxekwenca yi bumanya budi bwamene mu losangu lunengela. 19Isanga ndi yi bwana bwa bula bwalo bwa bantu boso, namaditeka mikyemi mupika a bantu boso, binxekwetabuxisa bantu bangi. 20Kudi bena Yuda nakalwa luna muna Yuda binxekwetabuxisa bena Yuda ; kudibo badi muxi mwa bwadi nakalwa bea muxi mwa bwadi, (isanga kiena muxi mwa bwadi mikyemi), binxekwetabuxisa bantu badi muxi mwa bwadi ; 21kudibo batena yi bwadi nakalwa bea muntu utena yi bwadi, (kumoni kwakala kutena mulangu ku mpala a Ncembi, kate ndi muxi mwa mulangu ă Kalistu), binxekwetabuxisa bantu batena yi bwadi ; 22kudi bena mabombu nakalwa bea muna bubombu, binxekwetabuxisa bena mabombu ; namalwa bintu bioso kudi bantu boso binxepandisa isanga banga bantu. 23Yi ngwencenca bintu bioso ku mucwe ă losangu lunengela binxekwabanyañana yinalu.

24Nonu kanusolubukwa ene, bobo basambolañana sambo basambola bungi bwabo ; kate umoumwe ndo angata kintu kia sambo ? Nusamboli binuxeangata. 25Yi mutandañani mwoso a bibula udi muna mulangu mu bintu bioso. Mo bobo bencenca noku ndo kwangata kilongo ku mucwe kifofwa yi kufwa ; mo coco ndo kwangata kilongo kitabiyi kufwa. 26Mbwôso meme ngwasambola, kumoni bea kuungaunga ; ngwatanda, kumoni bea muntu akuma mwoxixi kanana. 27Kate ngwapwesa mumbidi ămene, namauteka luna musungi amene, ximbi panakala namakwambila banga bantu nxenyañanibwa mikyemi.

Currently Selected:

1 KOLINTI 9: Luna_NT

Highlight

Copy

Compare