उत्पत्ति 19
19
सदोम का लोगहोन की दुष्टता
1शाम खे वे दो दूत सदोम का पास आया; अरु लूत सदोम का फाटक का पास बठ्यो थो, उन खे देखी खे उ उनसे भेट करन का लिये उठ्यो; अरु मुंडा का बल झुखी खे नमस्कार करी खे बोल्यो. 2“हे मरा प्रभु, अपना दास का घर मे आनु, अरु रात भर अराम करनु, अरु अपना पाय धोया, फिर फजर खे उठी खे अपना रस्ता पर जानु,” उनने बोल्यो, “नी; हम चौक ही मे रात बिताये.” 3अरु ओने उनसे भोत बिंनती करी खे उनने मनायो; अरु ओने उनका लिये खानो तैयार कर्यो, अरु बिना अखमीरी की रोटिहोन बनैय खे उन खे खलायो. 4उनका सौय जाना का पयले, सदोम नगर का इन्सानहोन ने, जवानहोन से लि खे बूड्डा तक, वरन चारी तरफ का इन्सानहोन अय खे उ घर खे घेरी लियो; 5अरु लूत खे फुकारी खे बोलन लग्या, “जो इन्सान आज रात खे तरा पास आया हइ वे बोल्यो हइ? उन खे हमारा पास बाहेर लि आ, कि हम उनसे भोग कर्ये.”#19:5 न्याय 19:22,24 6तब लूत उनका पास दरवाजा का बाहेर गया, अरु किवाड खे अपना पीछे बन्द करी खे बोल्यो, 7“हे मरा भैइहोन, मी तुम से बिनती करुस हइ, असी बुराइ नी करनु. 8सुन्नु, मरी दो बेटिहोन हइ जिन्हे अब तक इन्सान का मुंडो नी देख्यो, इच्छा हुये ते मी उनके खे तुम्हारा पास बाहेर ली आयु, अरु तुम खे जसो अच्छो लग्ये वसो व्यवहार उनसे करनु; पर इन इन्सानहोन से कुछ नी करनु; क्युकि ये मरी छत का निच्चे आया हइ.” 9उनने बोल्यो, “हटी जा” फिर वे बोलन लग्या, “तू एक परदेशी हुय खे यहा र्हेन का लिये आयो पर अब न्यायी भी बनी बठ्यो हइ; येकालिये अब हम उनसे भी जादा तरा साथ बुराइ कर्ये,” अरु वे उ इन्सान लूत खे भोत दबान लग्या, अरु किवाड तोडन का लिये पास मे आयो. 10तब उन मिजवानहोन ने हाथ बड्यैइ खे लूत खे अपना पास घर मे खिची लियो, अरु किवाड बन्द करी दि. 11अरु उनने का छोटा, का बडा, सब इन्सानहोन खे जो घर का दरवाजा पर था अंधा करी दिया, आखरी वे दरवाजा खे टटोलते थकी गया.#19:11 2 राजा 6:18
लूत को सदोम से बच निकलनो
12फिर उन मिजवानहोन ने लूत से पूच्छो, “यहा तरो अरु कोन-कोन हइ? जवइ, बेटा, बेटिहो, अरु नगर मे तरो कोय हो, उन सभी खे लि खे या जगा से नीकली जा. 13क्युकि या जगा खे हम खत्म करना पर हइ, येकालिये कि येकी चिल्लानो परमेश्वर का सामने सत्यानाश करन का लिये भेजी दियो हइ.” 14तब लूत ने निकली खे अपना जवइहोन खे, जेका साथ ओकी बेटिहोन की सगय हुय गय थी, समझैइ खे बोल्यो, “उठ्यो, यो जगा से निकली चलो; क्युकि परमेश्वर यो नगर खे खत्म करना पर हइ,” ओका जवइ ओको मजाक उडान लग्यो.
15जब जमीन फटन लगी, तब दूतहोन ने लूत से जल्दी करन खे बोल्यो अरु बोल्या, “उट, अपनी लगय अरु दोय बेटिहोन खे जो यहा हइ लि जा: नी ते तू भी यो नगर का अधर्म मे भस्म हुय जाये.” 16पर उ देर करतो र्हियो, ये पर उन इन्सानहोन ने ओखो अरु ओकी लगय, अरु दोय बेटिहोन का हाथ पकड्या; क्युकि परमेश्वर की दया ओ पर थी : अरु ओ खे निकली खे नगर का बाहेर करी दियो.#19:16 2पत 2:7 17अरु असो हुयो कि जब उनने उन खे बाहेर निकाल्यो, तब ओने बोल्यो, “अपनो जान लि खे भागी जा; पीछे का तरफ नी ताकनु, अरु तराइ भर मे नी ठहरानु; उ पहाड़ पर भागी जानु, नी ते तू भी भस्म हुय जाये.” 18लूत ने उनसे बोल्यो, “हे प्रभु, असो नी करनु! 19देख, तरा दास पर तरी अनुग्रह की नजर हुय हइ, अरु तोने येमे बडी कृपा दिखैइ, कि मरो जान ख बचायो हइ; पर मी पहाड़ पर भागी नी सक्या, बोल्यो असो नी, कि कोय मुशकिल मरा पर अय पड्ये, अरु मी मरी जायु. 20देख, उ नगर येत्तो पास हइ कि मी व्हा भागी सकुस हइ, अरु उ छोटो भी हइ, मे खे वहीं भागी जान दे, का उ नगर छोटो नी हइ? अरु मरो जान बची जाये.” 21ओने ओकासे बोल्यो, “देख, मेने यो बारे मे भी तरी बिंनती स्वीकार करी हइ, कि जो नगर की चर्चा तोने करी हइ, ओ खे मी खत्म नी कर्यु. 22फुर्ती से व्हा भागी जा; क्युकि जब तक तू व्हा नी पहुँच्या तब तक मी कुछ नी करी सक्यु.” यो कारण उ नगर को नाम सोअर पड्यो.
सदोम अरु अमोरा को खातमो
23लूत खे सोअर का पास पहुँचते ही सूरज धरती पर उदय हुयो. 24तब परमेश्वर ने अपना तरफ से सदोम अरु गमोरा पर आकाश से अंगार की बारीस कराइ;#19:24 मत्ती 10:15 लुका 10:12, 2 पत2:6 25अरु उन नगरहोन खे अरु पुरा तराइ खे, अरु नगरहोन का सब र्हेनअला खे, जमीन की पुरी उग्यो समेत खत्म करी दि. 26लूत की लगय ने जो ओका पीछे थी पीछे घुमी खे देख्यो, अरु उ नमक को खम्बो बनी गय.#19:26 लुका 17:32 27फजर खे अब्राहम उठी खे उ जगा खे गयो, जहाँ उ परमेश्वर का सामने खडो थो. 28अरु सदोम, अरु गमोरा, अरु वा तराइ का पुरा देश का तरफ आँख उठैइ खे का देख्यो कि उ देश मे से धधकती हुय भट्ठी का जसो धुव्वो उठी र्हो हइ. 29अरु असो हुयो कि जब परमेश्वर ने वा तराइ का नगरहोन खे, जिनमे लूत र्हेतो थो, उलट पलटी खे खत्म कर्यो, तब ओने अब्राहम खे याद करी खे लूत खे वा घटना से बचय लियो.
मोआबिहोन अरु अम्मोनिहोन को पैदाहोनो
30लूत ने सोअर खे छोडी दियो, अरु पहाड़ पर अपनी दोय बेटिहोन समेत र्हेन लग्या; क्युकि उ सोअर मे र्हेना से डरतो थो; येकालिये उ अरु ओकी दोय बेटीहोन गुफा मे र्हेन लगी. 31तब बड़ी बेटी ने छोटी से बोल्यो, “हमारो बाप शानो हइ, अरु धरती भर मे कोय असो इन्सान नी जो संसार का रीति का अनुसार हमारा पास आये. अरु बच्चा पैदा कर स खे. 32येकालिये आ, हम अपना बाप खे दाखमधु पिलैइ खे, ओका साथ सोया, जेकासे कि हम अपना बाप कुल खे बचैइ खे रख्ये.” 33आखरी उनने उय दिन-रात का टेंम अपना बाप खे दाखमधु पिलायो, तब बडी बेटी जैय खे अपना बाप का पास लेटी गय; पर ओने नी जान्यो, कि वा कब लेटी, अरु कब उठी गय. 34अरु असो हुयो कि दूसरा दिन बडी ने छोटी से बोल्यो, “देख, कल रात खे मी अपना बाप का साथ सोइ; येकालिये आज भी रात खे हम ओ खे दाखमधु पिलाया; तब तू जैय खे ओका साथ सोनु कि हम अपना बाप का वजेसे कुल पैदा कर्ये.” 35आखरी उनने उय दिन भी रात का टेंम अपना बाप खे दाखमधु पिलायो, अरु छोटी बेटी जैय खे ओका पास लेटी गय; पर ओ खे ओखा भी सोनो अरु उठना को ज्ञान नी थो. 36यो प्रकार से लूत की दोय बेटिहोन अपना बाप से पेट से हुयं. 37बडी एक बेटा खे जनन्यो अरु ओको नाम मोआब रख्यो; उ मोआब#19:37 मोआब अपने पिता से नामक जात को जो आज तक हइ मूलबाप हुयो. 38अरु छोटी ने भी एक बेटा खे पैदा कर्यो, अरु ओको नाम बेनअम्मी#19:38 बेन अम्मी-मेरे कुटुम्बी का बेटा रख्यो; उ अम्मोन कुलहोन को जो आज तक हइ मूलबाप हुयो.
Currently Selected:
उत्पत्ति 19: Gnn25
Highlight
Copy
Compare
Share
Want to have your highlights saved across all your devices? Sign up or sign in
The Gowlan Bible ©The Word for the World International and Gawlan Translation Samiti, Telkhar, Maharashtra, India, 2025.
