Matai 4

Ukugeligwa kwa Yesu mmatengele

(Mar 1.12-13; Luk 4.1-13)

1 # Hib 2.18 Popapo Yesu alinkulongosigwa na Mbepo ukubuka mmatengele, ukuti mo akageligwege numohesi. 2Bo afipikile ifyakulya amasiku amalongo mana pamusi na pakilo 40 yilinkunduma injala. 3Popapo ungeli alinkwisa kumyake alinkuyoba nagwe alinkuti, “Linga uli Mwana gwa Kyala, po ugabulege amabwe aga ukuti gipelege fyakulya.” 4#Kukumbu 8.3Umwene Yesu alinkwamula alinkuti, “Lisimbigwe ilya kuti, ‘Umundu fitikumpa ubumi fifyakulya fyene, loli ilisyulyosa ili likufuma nkanwa mwa Kyala.’ ”

5Popapo umohesi alinkumwega alinkubuka nagwe nkaya akikemo aka Yerusalemu, alinkwakumbika pamwanya pakisonge pa Nyumba ya Kyala, alinkumbula alinkuti, 6#Salimo 91.11-12“Linga uli Mwana gwa Kyala, gwitagege pasi; buno lisimbigwe ilya kuti, ‘Isakubabulaga abandumi bake, bo bisakukupimbaga mmaboko gabo, ukuti ungisakwifulasyaga ikilundi kyako pibwe.’ ” 7#Kukumbu 8.3Umwene Yesu alinkuyoba nagwe alinkuti, “Kangi lisimbigwe ilya kuti, ‘Ungangelaga uNtwa Kyala gwako.’” 8Kangi umohesi alinkubuka nagwe pakyamba ikitali fiyo, alinkunnangisya ubunyafyale bwa nkisu nubukulumba bwake; 9alinkumbula alinkuti, “Fyosa fififi fyo nikukupaga linga kubunguluka kumyangu.” 10#Kukumbu 6.13Popapo Yesu alinkumbula alinkuti, “Sokapo gwe Setano! Buno lisimbigwe ilya kuti, ‘Umbungulukilege uNtwa Kyala gwako, yo umbombelege yuyo mwene.’ ” 11Popapo umohesi alinkundeka, abandumiba Kyala balinkwisa, balinkumbombela.

Yesu ikwitugasya nkaya ka Kapernaumu nkisu kya Galilai

(Mar 1.14-15; Luk 4.14-15)

12 # Mat 14.3; Mar 6.17; Luk 3.19-20 Lelo bo Yesu apilike ukuti Yohani akoligwe, popapo alinkwepukapo alinkubuka nkisu kya Galilai. 13#Yoh 2.12Alinkusokamo nkaya ka Nazareti, alinkwakwitugasya nkaya ka Kapernaumu pambali panyanja, nkisu kya Zebuloni nikya Nafutali, 14ukuti mo simalikilege sisyo syayobeligwe munsololi Yesaya, apa atigi, 15#Yes 9.1-2“Ikisu kya Zebuloni nikisu kya Nafutali,

ifi fili panjila yakulabila ku nyanja,

isilyalilalya lusoko lwa Yordani,

ku Galilai, iki kyo kisu kya bapanja.

16Abandu aba batugesye mungisi balubwene ulumuli ulukulumba;

naba batugele nkisu namunsyungulu gwa bufwe, ulumuli lubabalile.”

17 # Mat 3.2 Ukufuma nkabalilo kalakala, Yesu alinkwanda ukulumbilila alinkuti, “Amupindukege, buno Ubutwa bwa kumwanya busegelile.”

Yesu ikubabilikila abalobi ba swi bana

(Mar 1.16-20; Luk 5.1-11; Yoh 1.35-42)

18Lelo bo Yesu ikwenda pambali pa nyanja ya Galilai, alinkubabona abanyamundu babili, Simoni uyu abilikiligwaga iya Peteri, na Andrea unnuguna, bo bikusopa ulwelo munyanja; namanga bali balobi. 19Alinkuyoba nabo alinkuti, “Isaga mungongege, nikubapelaga umwe ukuya balobi ba bandu.” 20Nakalinga itolo balinkusileka inyelo syabo, balinkunkonga.

21Lelo bo akindilepo ukufuma pala, alinkubabona abanyamundu abangi babili, Yakobu unnya Zebedai na Yohani unnuguna. Bali mwiboti, pamopene na Zebedai ugwisabo, batendekesyaga inyelo syabo; alinkubabilikila. 22Nakalinga itolo balinkulileka iliboti nugwisabo balinkunkonga Yesu.

Yesu ikumanyisya nukulumbilila kangi nukubumbulusya

(Luk 6.17-19; Yoh 1.43-51)

23 # Mat 9.35; Mar 1.39 Popapo alinkusyungutila mosa nkisu kya Galilai, alinkumanyisya nnyumba syabo syakwiputilamo, nukulumbilila Inongwa Inunu isya Butwa bwa Kyala; alinkubumbulusya imbungo syosa nubonywa bosa mbandu. 24Bunobuno ukufumuka kwake kulinkwakufika mosa nkisu kya Siria; balinkuntwalila ababine bosa, aba bakoligwe nimbungo syaluko nuluko aba batamigwaga, naba mbepo inyali, naba fisilisi, naba bukokonyale; alinkubabumbulusya. 25Ifilundilo fifingi itolo filinkunkonga ukufuma nkisu kya Galilai nikya Dekapoli ko kuti ikisu kya twaya kalongo, na nkaya ka Yerusalemu, kangi na nkisu kya Yudai, na mwisilya lila lya lusoko lwa Yordani.

Currently Selected:

Matai 4: NNBII

Highlight

Copy