Kesah Rasul 8
8
1aSaulus mahi sotuju amun kawan dulun ngompatoi Stepanus. Saulus tomasuk ico beti ingkan tonga pomimpin agama Yahudi.
Nyan Yerusalem, dulun co porocaya tonyiksa#8:1b-3 Oluco orong dulun ocop mulai porocaya ma Yesus, oko uco meleh orong dulun co aroko porocaya. Dulun co aroko porocaya monganiaya dulun co porocaya.
8:1b-3
1b-3Opah Stepanus matoi, oko pira pira beti dulun bousaha ngonyorih songan Mohotara ngolowong eh. Karas tangih doh nohuang are. Tapi nyan ondo cioh ka nyan kota Yerusalem, kawan dulun co porocaya ma Yesus molai tonyiksa. Karas lau iroh tonyiksa. Kojere Saulus ika doh dolo porocaya ma Yesus. Are tulak hia sika lopo, maksa mehen kawan dulun co porocaya ma Yesus yoh hia seper, aroh poduli bakah bawe. Jadi tului iyoh orong lau dulun porocaya buho ingkan Yerusalem. Hantin-hanoh iroh tosebar nyan derah Yudea hintang Samaria. Baya duo balas rasul leh co tatap nukui nyan Yerusalem.
Tarung Pio tintun Yesus tomomborita nyan Samaria
8:4-25
4Kawan dulun porocaya co buho ingkan Yerusalem yoh tosebar. Iroh momborita Tarung Pio hia omoh bewe koponulak doh. 5Nyan halo iroh yoh oko Pilipus. Are tulak hia ico kota nyan derah Samaria holuh momborita ma kawan dulun nyan intin. Are momborita bahawa Yesus yoh Laca Co Tomonjanji Mohotara. 6-7Pilipus pomambuh orong dulun lumpuh hintang pikak. Ingkan dulun orong tomusir eh kawan roh jahat. Samir noriak muhat kawan roh jahat taiyoh pusit. Ponduduk kota cioh ngoneh ajaran Pilipus. Iroh monyaksi orong aang co mosotahir co piai eh. Jadi, mula kuan tuu iroh ngoneh hintang momporhati anco hie eh. 8Kawan dulun nyan kota Samaria jorih jerah tului noto aang co mosotahir yoh hintang ngoneh Tarung Pio co tomomborita Pilipus.
9Nyan kota cioh oko ka dulun co karas kaji eh. Arai eh Simon. Are ocop tahi umpi kawan dulun nyan derah Samaria yoh tohurong hurong ma kaji eh. Are mahi mongaku arop eh dulun co hebat. 10Jadi sorinai Pilipus dombut, kokon dulun Samaria porocaya ma are, aroh poduli dulun biasa hintang dulun penting. Hien doh, “Dulun cotuh mula bahai kuasai ingkan Mohotara.” 11Jadi iroh porocaya ma eh, tului ocop tongkohut tahi are umpi iroh tohurong hurong ma kaji eh.
12Tapi Pilipus momborita ma iroh Tarung Pio tintun Korojaan Mohotara. Are momborita tintun kuasan Yesus sobagai Laca Co Tomonjanji Mohotara. Waktu Pilipus momborita kokon antongaiyoh, iroh porocaya ma borita co tongorapot eh yoh, aroh poduli bakah bawe. Paluh, Pilipus mombaptis iroh. 13Simon mahi porocaya holuh tomombaptis. Opah iyoh, are horoholuh ngonulu Pilipus. Are horoholuh hurong noto Pilipus umpi orong macam aang co mosotahir.
14 Lambak iyoh, kawan rasul incah oko nyan Yerusalem. Iroh ngoneh bahawa orong dulun Samaria yoh ocop porocaya ma borita ingkan Mohotara tintun Yesus. Maka tonyoruhan doh Petrus doruo Yohanes hia Samaria. 15Kotika Petrus doruo Yohanes dombut paluh iroh ruo bodoa ika kawan dulun Samaria co porocaya norima Roh Mohotara. 16Dulun porocaya taiyoh mula ocop tomombaptis ponah aran Yesus, Tuhanco bokuasa ma kokon aranaang. Tapi Roh Mohotara arinai oko nyan iroh. 17Jadi Petrus doruo Yohanes mandak silun doh nyan tungkui dulun taiyoh. Waktu iyoh ka, punai bat iroh norima Roh Mohotara.
18Simon mahi noto bahawa Roh Mohotara tomihi ma kawan dulun taiyoh molalui duo rasul co mandak silun doh nyan tungkui dulun taiyoh. Jadi, are nyau mihi duit indan doruo, 19Hie eh, “Mihibat kuasa conon indang kuh. Jadi, kotika akuh mandak silung kuh nyan ico beti dulun, maka dulun cioh mahi angar norima Roh Mohotara.”#8:18-19 Nyan jaman cioh, tukang sihir lian moli kawan mantra sihir ingkan tukang sihir co bokon. Ocop jelas, kawan rasul Yesus bokon tukang sihir, tapi oko kuasa ingkan Mohotara.
20Tapi Petrus mantun ma Simon, “Olu eh Mohotara ngolumat iko tamput duitmu non! Tului iko nyompan arop mu lian moli Roh Mohotara non ma duit. 21Aroko hak mu umba ponah polayanan cotuh, awi atoimu aroh bujur nyan ponoto Mohotara. 22Jadi iko sobulih umbot bopikir jahat isan onon. Bodoabat hia Tuhan ika kojere atoimu co jahat non boraoi tomongampun-Eh. 23Awi kitang kuh korinah kobosingon mu. Aroh liam mu lau co aroh umpi dosa.”
24Hien Simon museh, “Dohop ingkan ikan duo bodoabat ma Tuhan. Bodoa ika kokon co ohut tomantun me non aroh tojadi ma akuh.”
25Opah iyoh, rasul duo iyoh porapot borita ingkan Tuhan. Iroh momborita tintun pongalaman pribadi doh umba Yesus. Paluh, iroh hopuli hia Yerusalem. Ponah solanan doh buli, iroh momborita Tarung Pio tintun Yesus nyan kawan lowu bokon nyan derah Samaria yoh.
Pilipus monjelas Tarung Pio ma ico beti dulun ingkan Korojaan Etiopia
8:26-40
26Nyan ico kotika, Tuhan nyuhu molekat nyopopak Pilipus. Molekat cioh mantun, “Bosiap siap bat! Tulak hia horong solatan, hia calan co nosuloh ingkan Yerusalem hia Gasa.” (Calan cioh buah derah co ngolohiui). 27Jadi Pilipus bosiap siap paluh tulak. Nyan calan cioh, are noto ico beti dulun Etiopia. Dulun Etiopia cioh yoh ico beti pojabat tinggi. Are kopala bendahara co bogawi indan ratu Etiopia.#8:27 Ponah bohasa Etiopia ‘Kandake’ borati ‘Ratu’ aroh aran ratu cotuh. Niin pojabat cioh tulak sombayang hia Yerusalem, 28tapi kotika iyoh dahat ponah solanai buli bat. Are buli cakat koreta co tonarik kuda. Ponah solanai, pojabat cioh mombaca ingkan kitab Nabi Yesaya.
29Kotika Pilipus noto dulun Etiopia cioh, Roh Mohotara mantun ma are, “Ngoroni eh bat koreta conon.” 30Jadi Pilipus tongkoru ngoroni koreta cioh holuh ngoneh pojabat cioh dahat mombaca ingkan kitab Nabi Yesaya. Jadi Pilipus ngisok, “Mainboh Tuan pahampai ma maksud co tomombaca mu non?”
31Hien pojabat cioh, “Aroh bodai akuh boraoi paham amun aroko dulun co monjelas eh ma akuh.” Jadi pojabat cioh momposilahkan Pilipus cakat koreta eh paluh tuot dokin are.
32Bagian Surat Borasih co tomobaca pojabat cioh nin santuh nai eh:
“Are yoh ehen ika tongompatoi somporengu ico kontuluh domba co ehen ika tonyarak.
Tapi Dulun cioh aroh mantun ome-ome somporengu ico kontuluh domba aroh ngonciik waktu dulun monggunting buluieh.
33Are tomohina. Aroko co adil co pian doh indai.
Aroko dulun co boraoi ngesah tintun koturunai-Eh, awi Are tongompatoi.”#8:32-33 Ingkan Yesaya 53:7-8. Nabi Yesaya nyurat otuh tintun Hamba TUHAN, galar tonga indan Laca Co Tomonjanji Mohotara. Pojabat cioh arinai monau ancioh.
34Hien pojabat cioh ma Pilipus, “Nyawot dohop boh iko mara ma akuh: Coruhan Mohotara cotuh nyurat tintun ome? Main tintun arop eh atawa tintun dulun bokon?” 35Jadi, hien Pilipus monjelas eh, kawan antun nabi cioh sobujur eh tintun Yesus. Paluh, Pilipus momborita kokon Tarung Pio indai.
36Ponah solanan doh yoh, iroh nyihin ika co oko danum. Hien pojabat cioh, “Noto eh, nyan intoi oko danum. Nyawot dohop iko mombaptis akuh.”
[37Hien Pilipus, “Amun atoi Tuan porocaya ma Yesus kuan tuu, Tuan boraoi lau jah tomombaptis.”
Hien pojabat cioh, “Akuh porocaya ma Yesus yoh Laca Co Tomonjanji Mohotara. Yesus iyohco Anak Mohotara.”]
38Paluh are nyuhu polayan eh ika nondo koreta eh. Pilipus doruo pojabat cioh toka hia danum, paluh Pilipus mombaptis are. 39Hayak iroh naat danum cioh, nongkocok Roh Mohotara mehen Pilipus ingkan ika cioh. Pojabat cioh aroh kito are bat. Paluh pojabat cioh ngoholuh solanai eh paluh buli mehen kojorih atoi eh. 40Tapi Roh Mohotara mehen Pilipus hia kota co arai Asdod. Ingkan intin are nyalan hia kota Kaisarea. Are momborita Tarung Pio nyan kokon kota nyan potintai calan.
Currently Selected:
Kesah Rasul 8: TBSS
Highlight
Copy
Compare
Share
Want to have your highlights saved across all your devices? Sign up or sign in
