Наум 3
3
Нинэвээдэ эсэргүү шиидхэбэри
1Худал болон дээрмэшэлгээр дүүрэнхэй шуһата хотодо
гай тодхор буугаа! Дээрмэшэлгэ тэндэһээ һаланагүй.
2Ташуурай дуун, мөөр сахаригуудай эрьелдэхэ абяан,
моридой соёроон, дайшалхы тэргэнүүдэй түргэн дабшаха абяан дуулдана.
3Моритой зон шуумайжа, һэлмэнүүд ялалзажа, жаданууд туяарна.
Үхэгшэд олон, обоо хүбөө хүүрнүүд.
Тоо томшогүй олон хүүрнүүдтэ сэрэг бүдэржэ байна.
4Эдэ бүгэдэ Нинэвээ хотын янхан забхай ябадалһаа, эльбэ жэльбэ хэрэглэн,
арадуудые урьха зангадаа оруулжа байһанһаань болоо.
5– Үзөөрэй даа, Би шамайе хэһээхэб! – гэжэ Түмэн Сэрэгтэ Эзэн айладхана.
Хормойеш нюур хүрэтэршни шуужа, арадуудта шинии нюсэгэн бэе,
хаан түрэнүүдтэ эшхэбтэр юумыеш харуулхаб!
6Би шам руу бузар муухай юумэ шэдэн эльгэжэ, олоной шоодбори болгохоб,
жэгшүүритэй эшхэбтэр байдалда шамайе оруулхаб.
7Шамайе харамсаараа хүн бүхэн шамһаа холодон гүйжэ,
«Нинэвээ дээрмэдэ орожо хооһороо! Хэн тэрээн тушаа гашуудан байхаб?
Хэн тэрэниие аргадан тайшаруулхаб?» гэхэ.
Нинэвээ хотын эсэс
8Нинэвээ, Нил мүрэнөөр хамгаалалта хээд байгаа Но-Аммоон хотоһоо хамгаалалтам дээрэ гэжэ тоолоно гүш? 9Заха хизааргүй хүсэ шадалтай Эфиопи болон Египедые тэрэ хото зонхилон байгаа, Пүүт болон Ливи тэрэнэй туһамаршад бэлэйл. 10Теэд тэрэшье сүлэлгэ руу туугдан ошоо, баряанда ябаа. Нарай нялхануудыньшье гудамжануудай уулзуур дээрэ тэһэ биса сохюулжа алуулаа, хаанай уг удам зониинь үнэ сэн хаюулан, худалдагдаа, бүхы түшэмэлнүүдынь гэнжэлэгдээ.
11Нинэвээ, ши тон лэ тиимээр шал һогтожо, дайсанһаа яажа хоргодохоёо бэдэрхэш. 12Эдеэшэһэн жэмэстэй инжир модондол адли бүхэлэлтэнүүдшни! Халта һэгсэрхэдэ, тэдэ залгихаар бэлэн хүнэй аман руу сэхэ унахал! 13Үзөөрэй, сэрэгшэдшни һамгадтал адли, газар дайдыншни хаалганууд дайсанай урда үргэнөөр сэлигдэхэ, шэбхэнүүдшни гал дүлэндэ шатан һалаха. 14Бүһэлэлтэдэ орохоёо мэдэжэ, уһа удхан бэлдэ! Бүхэлэлтэеэ бэхижүүлэ! Шабарта ябажа, шабар зууража, хирпиисэ шатаан бүтээхэ зуухануудаа заһабарила!
15Теэд энэ ямаршье туһагүй, юуб гэхэдэ, тэндэ ши гал дүлэндэ шатахаш, һэлмэдэ сабшагдахаш, бүхы ургаса таршаа шумуулда дууһан эдигдэдэгтэл, ши оро һэегүй үгы болохош. 16Огторгойн ододһоо олон наймаашадтай болоош. Теэд тэдэ даляа дэбин бэлдээд ниидэжэ арилдаг таршаа шумуулнуудтал үгы болохо. 17Хаанта бүлын гэшүүдшни болон түшэмэлнүүдшни хүйтэн үдэр ханын забһараар шэбээлдэг таршаа шумуул мэтэ. Харин наранай гарахада, тэдэ ниидэн үгы боложо, хайшаашье ошоһыень мэдэхын арагагүй.
18Ассириин хаан! Түшэмэл, удамаршадшни мүнхэ нойроор нойрсонхой. Арад түмэншни хада уулаар таранхай, тэдэниие суглуулха хүн байхагүй. 19Шархыеш эдэгээхэ эм дом байхагүй, яра шархаш угаа үбшэнтэй. Шамтай ушарһан гай гасалан тушаа дуулаһан лэ хүн бүхэн баясажа, альгаа ташаха! Юуб гэхэдэ, шинии муу муухай хэрэгүүд бүхы зониие дайраа!
Currently Selected:
Наум 3: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
