Наум 1
1
1Элкоошой Наумай Нинэвээ тушаа буулгаһан лүндэн, үзэһэн үзэгдэлэй ном гэбэл, энэ.
Бурханай һүр жабхаланай магтаал
2Эзэн хадаа жүтөөрхэгшэ, үһөөгөө абадаг Бурхан юм.
Эзэн хадаа үһөөрхэгшэ, уур хилэнгэй Эзэн мүн.
Эзэн дайсадһаа үһөөгөө абадаг, тэдэнэйл урдаһаа хилгэнэдэг юм.
3Эзэн абаһаар уурлажа байдаггүй, тэсэбэритэй,
гэбэшье Тэрэ гэмтэдые хэһээлтэгүй оройдоошье орхидоггүй.
Тэрэ агууехэ хүсэ шадалтай.
Һалхи шуурган, хуй соогуур харгы замынь,
хүл дороһоонь үүлэн, тооһон бушаганадаг.
4Тэрэнэй зэмэлхэдэнь, далай хатадаг, бүхы голнууд шэргэдэг.
Башаан болон Кармээл хатажа эхилдэг,
Ливаанай набша намаа ганхадаг.
5Хаданууд урдань шэшэрдэг, гүбээнүүд үгы болошодог.
Газар дэлхэй Тэрэнэй урда доһолдог,
оршолон юртэмсэ ба досоонь оршон ажаһуугшад бултадаа шэшэрэлдэдэг.
6Тэрэнэй зэбүүрхэн байхада хэн амиды мэндэ байжа шадахаб?
Шатан дүрэлзэжэ байгаа уурыень хэн тэсэхэб?
Уур хилэнгынь гал мэтэ дэлгэржэ,
хада ууланууд урдань нуран унанал.
7Эзэн болбол ашата һайн.
Гай зоболоной сагта бата бүхэлэлтэ мэтээр Тэрэ зониие аршалдаг.
Өөртэнь этигэн найдадаг зондоо Тэрэ һанаагаа табин харгалзадаг.
8Халин урсаһан үерэй уһан мэтэ Тэрэ дайсадаа харанхы руу намнан, дууһан усадхаха.
Ассиридэ эсэргүү лүндэн
9Таанар Эзэнэй урдаһаа юу һэдэхэбта?
Тэрэ таанадые үгы хэхэл.
Бэшэ хэзээдэшье дахин амиды мэндэ байхагүйлта.
10Орёосолдоһон адаалхай һөөг ба хуурай һолоомо мэтэ
таанар архиншадтал шатан үхэхэт!
11Эзэнэй урдаһаа муу юумэ һэдэһэн нэгэн, зохихогүй зүблөө үгэгшэнь таанарһаа үдэн гараа. 12Эзэн иигэжэ айладхаа: «Тэдэ түгэс хүсэтэй, угаа олоншье һаа, тэдэ һандаргагдажа, үгы болохо. Минии арад түмэн, таанадые Би зобоожо байгааб. Харин саашадаа зобоохогүйб. 13Мүнөө Би таанарай хүзүүн дээрэ байгааша хөөмэгшые бута сохин эбдэхэб, таанарые хүлин байгаа аргамжануудые таһалхаб!»
14Ассири, шам тушаа Эзэн иимэ захирал буулгана: «Нэрыеш зүүхэ үри һадаһад бэшэ байхагүй. Бурхадайш гэрһээ шүтээн болон шудхамал хүрэгыеш абан хаяхаб. Би шамда хүүр булаша бэлэдхэхэб, юуб гэбэл, ши жэгшүүритэй муухайш!» 15Харыт, һайн мэдээ асардаг, амар амгаланиие соносхогшо хада уула дээрэ ерээд байнал! Оо, Иуда, найр наадануудаа тэмдэглэн, тангаригуудаа бэелүүлэ. Юуб гэбэл, зохисгүй нэгэн шамаар гаража ябахагүй – тэрэ бүримүһэн усадхагдаа.
Currently Selected:
Наум 1: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
