Михей 6
6
Израильда Эзэнэй гомдол
1Арад түмэндөө Эзэнэй айладхаһые дуулыта!
«Бодожо, хада уулануудай урда хэрэгээ мэдүүлыт!
Толгойнууд дуу хоолойетнай шагнаг лэ!» – гэжэ Тэрэ тунхаглана.
2Хада ууланууд, дэлхэйн хатуу үндэһэ һуури,
Эзэнэй зарга шүүбэри хэхые шагныта!
Эзэн арад түмэнөө шүүбэрилнэ, Израильтай Тэрэ тэмсэжэ байна.
3Эзэн иигэжэ айладхана: «Арад түмэмни!
Би таанарта юу хээбиб, яажа зобоогообиб? Харюуса Намда!
4Египедэй газар дайдаһаа, богоол байдалһаа
шамайе абаран гаргаа һэм. Шамайе дахуулан ябахыень
Моисей, Аһароон болон Мириамые эльгээгээ һэм.
5Минии арад түмэн! Моһаабай хаан Балаагай юу хэхэеэ түсэблэжэ байһые,
Бэһоорой хүбүүн Балаһаамай тэрээндэ юун гэжэ харюусаһые,
Шиттиимһээ Гилгаал хүрэтэр юун боложо байһые һаныш даа.
Минии зүб хэрэгүүдые ойлгохын тула эдэ бүгэдые һана!»
6Огторгойн Эзэн Бурхандаа мүргэхэеэ ошоходоо, Би юу абаад ошохобиб?
Түгэс шатаалта үргэл хэхэеэ нэгэ наһатай тугал абаад урдань ошохо гүб?
7Теэд Эзэндэ хэдэн мянган хуса, гол мэтэ дууһашагүй оливын тоһо абаад ошоошье һаам,
Тэрээндэ энэ һайшаагдаха гү?
Нүгэлөө наманшалхаяа ууган хүбүүгээ үргэхэ гүб?
8Үгы. Һайн хэрэг гээшэ юун бэ гэжэ Эзэн бидэндэ, зондо, иигэжэ айладхана:
«Үнэн шударга байха, саг үргэлжэ дура хайраяа элирхэйлжэ байха,
Бурханайнгаа үгэ дуулажал ябаха».
9Эзэнһээ айха гээшэ сэсэн ухаан юм.
Эзэн Иерусалимда иигэжэ хандана:
«Хотын улад зон болон Иерусалимай хүтэлбэрилэгшэд, Намайе соносогты!
10Хорон муу зоной гэрнүүдтэ буруу мүрөөр олоһон баялигынь байна.
Минии үзэн ядадаг юумэ – худал хэмжүүрнүүдые тэдэ хэрэглэнэ.
11Худал хэмжүүртэй, мэхэшэ зониие яагаад Би хүлисэхэбиб?!
12Ушар юуб гэхэдэ, хотын баяшуул хүсэрхэл хаа-хаанагүй хэрэглэнэ, ажаһуугшадынь худал хэлэнэ.
13Тиимэһээ Би һандарал, үгырэл асаран, шамайе, хото, нүгэлэйшни түлөө хэһээхэб.
14Ши эдибэшье, садахагүйш, досоошни хооһон байха.
Юумэ хадагалха гэжэ оролдобошье, хадагалжа шадахагүйш.
Хадагалһан юумыеш һэлмээр сабшан үгы хэхэб!
15Таряа тарибашье, хадахагүйш.
Оливын тоһо даран гаргабашье, хэрэглэжэ шадахагүйш.
Үзэмэй шүүһэ дарабашье, үзэмэй дараһан архи уухагүйш.
16Омрии хаанай болон Ахаабай бүлынхидэй үйлэ жэшээ даган,
зүблэлөөрнь ябанаш, тиимэһээ Би шамда гай һандарал ушаруулжа,
ажаһуугшадыеш шоодбори болгохоб.
Арад түмэнэйм жэгшүүритэй эшхэбтэр байдал таанад дээрэл бууха».
Currently Selected:
Михей 6: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024