Матвей 9

(Мк 2:1-12; Лк 5:18-26)

1Тиигээд Иисүүс онгосодо һуугаад, һөөргөө ажаһуудаг хото руугаа тамаржа ерэбэ. 2Хэдэн хүн тэрээндэ саа үбшэндэ дайруулһан нэгэ хүниие шэрдэгтэйнь тэлээд асарба. Иисүүс тэдэ зоной аргагүй ехэ этигэлтэй байһыень хараад, саа үбшэнтэндэ хандан:

– Ши, хүбүүн, зоригоо бү алда! Нүгэлнүүдшни хүлисэгдэбэ, – гэжэ хэлэбэ.

3Тиихэдэнь Хуули заадаг зарим багшанар:

– Энэшни Бурханиие доромжолжо байнал, – гээд досоогоо һанаба. 4Тэдэнэй һанал бодол мэдэжэ байһан Иисүүс хэлэбэ:

– Таанар юундэ иимэ харата һанал сэдьхэлдээ түрүүлбэт? 5«Нүгэлнүүдшни хүлисэгдэбэ» гэхэдэ гү, али «бодоод яба» гэжэ хэлэхэдэ бэлэн гү? 6Хүн түрэлхитэнэй Хүбүүнэй газар дэлхэй дээрэ нүгэл шэбэлнүүдые хүлисэхэ эрхэтэй байһые таанарай мэдэжэ байхын тула Би таанадта баталжа харуулхаб. – Тиигээд Иисүүс үбшэн хүндэ: – Хүл дээрээ бодоод, дэбисхэрээ абажа, гэртээ хари, – гэжэ хэлэбэ. 7Тиихэдэнь үнөөхи хүн бодоод, гэртээ ябаба. 8Улад зон энээниие хараад айн һүрдэбэ, хүн түрэлхитэндэ иимэ ехэ эрхэ засаг хайрлаһанайнь түлөө Бурханиие магтан алдаршуулба.

Иисүүс Матвейе шэлэжэ абаба

9Тэндэһээ саашаа ябажа ябатараа, Иисүүс Матвей гэдэг алба татагшын татабари суглуулдаг газартаа һуухые хараад:

– Хойноһоомни яба, – гэжэ хэлэбэ. Тиихэдэнь Матвей бодоод, хойноһоонь ябаба.

10Хожомынь Иисүүсэй шабинартайгаа хамта Матвейндэ хоол барижа байхадань, алба татагшад, нүгэл хэгшэд олоороо ерэжэ, тэдэнээр хамта хоол бариба. 11Зарим фарисейнүүд энээниие хараад, Иисүүсэй шабинарта:

– Юундэ танай багша алба татагшадтай, нүгэл хэгшэдтэй хамта эдинэ, ууна гээшэб? – гэбэ.

12Иисүүс тэдэнэй хэлэһые дуулаад, иигэжэ харюусаба:

– Элүүр уладта эмшэн хэрэггүй, харин үбшэн хүнүүдтэ хэрэгтэй юм. 13Таанад ошожо, «Намда тахил тахихын орондо бусад зондо үршөөл хайратай байхыетнай хүсэнэб» гэжэ Нангин Бэшэг соо хэлэгдэһэн үгын удха мэдэжэ абагты. Би үнэн сэдьхэлтэниие бэшэ, харин нүгэл хэгшэдые дуудахаяа ерээ хүнби.

Масаглаха тухай асуудал

14Иоаннай шабинарынь Иисүүстэ ерээд:

– Бидэ, мүн фарисейнүүд ходо масагладагбди, харин Танай шабинар юундэ огто масагладаггүйб? – гэжэ һураба.

15Тиихэдэнь Иисүүс тэдэндэ иигэжэ харюусаба:

– Түрэ хуримай айлшад хүрьгэн хүбүүнтэйгээ хамта байха сагтаа гуниглаха аал? Үгыл даа! Зүгөөр хүрьгэн хүбүүнтэй хахасуулха үдэрэй ерэхэдэнь, тэдэ айлшад масаглахал.

16Хэншье хуушан хубсаһанда шэнэ бүдөөр халааһа табидаггүй бшуу. Тиигэбэлнь шэнэ табиһан халааһан хуушан хубсаһые удара татажа, хахархайень улам ехэ болгохол. 17Мүн баһа һая үзэмэй дараһан архияа хуушан туламда хэдэггүйл. Тиигээ һаа, арһан тулам хахараад, үзэмэй дараһан архинь адхархал, арһан тулам хэрэгһээ гарахал. Теэд һая нэрэһэн архияа шэнэ арһан туламда хэхэдэ, алинииншье бүтэн зандаа байхал.

Наһа бараһан басаган ба үбшэн эхэнэр тухай

18Тиигэжэ хэлэжэ байтарнь, нэгэ дарга ерээд, Иисүүсэй хүлдэ мүргэжэ:

– Басагамни һаяхан наһа барашабал. Манда ерэжэ, тэрээндэмни гараараа хүрөө һаатнай, басагамни амидырхал, – гэбэ.

19Тиихэдэнь Иисүүс шабинартайгаа бодоод, тэрэ хүнтэй хамта ябаба.

20Арбан хоёр жэл соо шуһа гоожоод тогтодоггүй үбшэнгөөр зобожо байһан нэгэ эхэнэр Иисүүсэй араһаа ерэжэ, хубсаһандань халта гараараа хүрэбэ. 21Юундэ тиигээб гэхэдэ, «Хубсаһандань халта хүрөөд абаал һаа, эдэгэхэб» гэжэ тэрэ эхэнэр досоогоо этигэжэ байгаа бшуу.

22Иисүүс эрьежэ, тэрэ эхэнэрые хараад:

– Басаган, ши зоригтой бай! Этигэлшни шамайе абараа, – гэбэ. Тэрэ дороо эхэнэр эдэгэшэбэ.

23Даргын гэртэ ороод, Иисүүс наһа барагшые шаналха хүгжэмшэдэй болон улад зоной бахардан үймэлдэжэ байхые хараба.

24– Эндэһээ гарагты. Энэ басаган үхөөгүй, миил унтажа байна, – гэхэдэнь, Иисүүсые улад зон наада барин энеэлдэбэ. 25Улад зоной газаашаа гарахадань, Иисүүс басаганай хэбтэһэн таһалгада орожо, гарһаань баряад, бодоходонь туһалба. 26Энэ ушар тухай һураг суу тэрэ орон дайдаар хаа хаанагүй тараба.

Иисүүс хоёр һохор хүниие эмшэлбэ

27Иисүүсэй тэндэһээ ябажа ябахада, хойноһоонь хоёр һохор хүн дахажа:

– Давидай үри һадаһан, Иисүүс, маниие үршөөгыт! – гэжэ хашхаралдаба.

28Тиигээд Иисүүсэй гэртэ ороходонь, үнөөхи хоёр хүн тэрээндэ дүтэлбэ. Иисүүс тэдэнһээ:

– Таанарые элүүр болгохо аргатайдамни этигэнэ гүт? – гэжэ һураба. Тэдэнь:

– Тиимэ даа, Эзэн! – гэжэ харюусаба.

29Тиигэхэдэнь Иисүүс тэдэ хоёрой нюдые гараараа хүрөөд:

– Таанарай этигэһэнэй ёһоор лэ болог, – гэжэ хэлэбэ. 30Тиин тэдэ хоёрой нюдэниинь харадаг болошобо. Иисүүс тэдэ хоёрто:

– Энээн тухай хэндэшье бү хэлэгты, – гэжэ һайнаар захиба.

31Харин тэдэнь гэрһээ гараад лэ, Иисүүс тухай бүхы орон дайдаар соносхобо.

Иисүүс хэлэ амагүй хүниие эдэгээбэ

32Тэдэ хоёрой гаража байха үедэ ада шүдхэртэ барюулһан хэлэ амагүй нэгэ хүниие Иисүүстэ асарба. 33Ада шүдхэрэй гарахада, хэлэ амагүй хүн юумэ хэлэдэг болобо. Улад зон гайхалдажа:

– Израильда иимэ мэтын юумэн хэзээшье үзэгдөөгүйл, – гэлсэбэ. 34Харин фарисейнүүд:

– Энэтнай ада шүдхэрнүүдэй ноёной хүсөөр лэ ада шүдхэрнүүдые дарана, – гэбэ.

Иисүүс сугларһан уладые хайрлаба

35Иисүүс бүхы хото турануудаар, хүдөө нютагуудаар ябажа, мүргэлэй гэрнүүдтэ хүнүүдые һургаба, Бурханай хаан түрэ тухай Һайн мэдээсэл номнобо, ямаршье үбшэ хабшатай, гай ядаралтай зониие аргалан эдэгээбэ. 36Олон мянган зониие харахадаа, Иисүүс тэдэниие хайрлаба. Тэдэ зон ядаршаһан, эндэ тэндэ тарашаһан хонишонгүй хонидтол мэтэ байгаа бшуу. 37Тиимэһээ Иисүүс шабинартаа иигэжэ хэлэбэ:

– Ургаса ехэ байна, теэд тэрэниие суглуулха хүнүүдынь үсөөн лэ. 38Тиимэһээ ургасаяа суглуулха хүдэлмэрилэгшэдые ябуулхыень Ургасын Эзэндэ зальбарагты.

Currently Selected:

Матвей 9: BurBBL2024

Highlight

Copy

Compare