Матвей 22
22
(Лк 14:16-24)
1Иисүүс хүнүүдтэ баһа һургаалта үгэнүүдээр иигэжэ хэлэбэ:
2– Огторгойн хаан түрэ болбол нэгэ хаанай хүбүүндээ түрэ хуримай найр хэһэнтэй адлишуу юм. 3Хаан зарасанараа эльгээжэ, урилгатай айлшадаа түрэ хуримай найрта хүрэжэ ерэхыень дуудаба, теэд тэдэнь ерэхэ дурагүй байба. 4«Найрай хоол мүнөө бэлэн болоо; шахамалнууд гаргаатай, бүхы юумэн түхеэрээтэй байна; түрэдэ хүрэжэ ерэгты», – гэһэн мэдээсэлтэйгээр хаан дахин ондоо зарасанараа урилгатай айлшадта эльгээбэ. 5Теэд урилгатай хүнүүдынь ямаршье анхарал хандуулбагүй: зариманиинь өөһэдынгөө таряаланда гараба, нүгөөдүүлынь наймаа хэхэеэ ошобо, 6бусадынь хаанай зарасанарые барижа сохибо, тиигээд алаба. 7Хаан энээн тухай дуулахадаа уурлаад, сэрэгээ эльгээжэ, тэдэ алууршадые хюдаба, хото шэбээнүүдыень шатаажа усадхаба. 8Тиигээд хаан зарасанартаа: «Түрэ найр хэхэдэ бүхы юумэн бэлэн болоо, теэд урилгатай байһан айлшад иигэжэ хүндэлхөөр бэшэ байшаба. 9Тиимэһээ харгын бэлшэртэ гараад, дайралдаһан хүн бүхэниие түрэ найрта уригты», – гэбэ. 10Тиин зарасанар гудамжануудта гаража, дайралдаһан муушье, һайншье һанаатай зониие бултыень суглуулба; тиигээд түрэ найр боложо байһан гэр айлшадаар дүүрэшэбэ. 11Хаан айлшадые харахаяа гэртэ ороходоо, тэндэ хуримай дэгэл үмдөөгүй нэгэ хүниие хараад, 12тэрээндэ хандажа: «Нүхэр! Ши хуримай дэгэлгүйгөөр иишээ хайшан гээд орообши?» – гэжэ һураба. Теэд нүгөө хүниинь юушье дуугарбагүй. 13Хаан зарасанартаа: «Энээнэй гар хүлыень хүлеэд, газаашань харанхыда абаашажа хаягты: тэндэ хүнүүд бархиралдаха, шүдөө хабиралдаха», – гэжэ хэлэбэ. 14Уряалаар ерээшэд олоншье һаа, шэлэгдэн абтаашад үсөөн юм, – гэжэ Иисүүс хөөрөөгөө түгэсхэбэ.
Алба татабари тухай асуудал
15Тиихэдэнь фарисейнүүд суглараад, Тэрэниие үгэ алдуулжа гэмнэхэ тухай өөһэд хоорондоо хэлсэбэ. 16Фарисейнүүд өөрынгөө шабинарые Иродэй талынхидтай хамта Иисүүстэ эльгээжэ:
– Багша аа! Та үнэн сэхые хэлэдэгта, Бурханай бодото замаар ябахые һургадагта, хэнэйшье урда билдагуушалдаггүйт, юуб гэбэл, нюур харадаггүйт гэжэ бидэ мэдэнэбди. 17Тиимэһээ юун гэжэ һанажа байһанаа манда хэлэжэ үгыт: Римэй хаанда алба татабари түлэхэмнай зүб гү, али буруу гү? – гэжэ һуруулба.
18Тиихэдэнь Иисүүс тэдэнэй муу мэхые мэдэжэ байгаад:
– Хоёр нюуртан! Таанар юундэ Намайе туршанабта? 19Алба татабари түлэхэдэ хэрэглэдэг нэгэ мүнгэ Намда асаржа харуулагтыл даа, – гэхэдэнь, нүгөөдүүлынь нэгэ динари мүнгэ асаржа үгэбэ. 20Тиихэдэнь Иисүүс: – Эндэ хэнэй дүрсэ зураатай, хэнэй нэрэ бэшээтэй байнаб? – гэжэ һураба.
21– Хаанай, – гэжэ нүгөөдүүлэйнь харюусахада, Иисүүс:
– Тиимэһээ хаанай юумые хаандань, Бурханай юумые Бурханда үгэгты, – гэжэ тэдэндэ хэлэбэ. 22Иимэ харюу дуулахадаа, үнөөхи зон ехээр гайхалдажа, Иисүүсые орхёод саашалба.
Амидыралга тухай асуудал
23Хүнүүд үхөөд амидырдаггүй гэжэ тоолодог саддукейнэрэй зариманиинь тэрэл үдэр Иисүүстэ ерээд, иигэжэ асууба:
24– Багша аа! Хэрбээ һамга абаһан хүн үхи хүүгэдгүй гээгдэшоо һаа, тэрэнэй дүүнь бэлбэһэн эхэнэртэйнь һууха ёһотой, тиигээд тэдэнһээ гараһан үхибүүн нүгшэһэн ахынь үхибүүн гэжэ тоологдохо зэргэтэй гэжэ Моисей манда захяа һэн. 25Зай, долоон аха дүүнэр эндэ ажаһуугаа гэе. Тэдэнэй ахань һамга абаад, үхибүүдтэй болонгүйгөөр наһа бараа гэхэ, тиин бэлбэһэн эхэнэрынь дүүдэнь үлэбэ гэхэ; 26ахадаал тон адляар, хоёрдохишье, гурбадахишье саашалан долоодохишье дүүнь үхибүүтэй болонгүй наһанһаа нүгшөө бололтой. 27Һүүлэй һүүлдэ тэдэнэй һамганииньшье наһа бараба. 28Теэд Бурханай үхэһэн хүнүүдые амидыруулхада тэрэ эхэнэр долоон аха дүүнэрэй алинайнь һамган байхаб? Тэдэ долоон аха дүүнэр булта тэрэ эхэнэрые һамга абаа ха юм.
29Иисүүс тэдээндэ хэлэбэ:
– Таанад Нангин Бэшэгэй юун гэжэ һургадагые, Бурханай һүр хүсые мэдэдэггүй туладаа эндүүржэ байнат. 30Үхэһэн хүнүүдые Бурханай амидыруулхада, тэдэ огторгойдо оршодог Бурханай Эльгээмэлнүүдтэл адли байха, тиимэһээ һамгашье абахагүй, хадамдашье гарахагүй. 31-32Теэд үхөөшэдэй амидырха тухай Бурханай таанарта:
«Би Абраһаамай Бурхан, Исаагай Бурхан, Яковай Бурханби», – гэжэ хэлэһые уншаагүй аалта? Бурхан болбол үхэһэн хүнүүдэй бэшэ, харин амиды хүнүүдэй Бурхан юм.
33Иисүүсэй һургаалнуудые шагнажа байһан улад зон тэрээндэнь ехэл гайхалдажа байгаа.
Эгээн шухала захяа заабари
34Иисүүс саддукейнэрые абяа аниргүй болгожорхёо гэжэ фарисейнэр дуулаад, сугларба. 35Тэдэнэй дундаһаа нэгэ Хуули заадаг багша Иисүүсые туршажа:
36– Багша аа! Хуули тогтоолой ямар захяа заабаринь эгээн шухала бэ? – гэжэ һураба.
37Иисүүс тэрээндэ:
– Ши бүхы зүрхэ сэдьхэлээрээ, бүхы амин һүлдөөрөө, бүхы ухаан бодолоороо Эзэн Бурхандаа дуратай бай, – гэжэ харюусаба. 38– Энэ болбол нэгэдэхи, эгээн шухала захяа заабари мүн. 39«Өөртөө дуратай байдагтал адляар дүтынгөө хүндэ дуратай бай» гэһэн хоёрдохи шухала захяа заабари түрүүшынхидээ адлишуу юм. 40Моисейн Хуулиин бүхы зүйлнүүд, лүндэншэдэй номууд эдэ хоёр захяа заабари соо тобшологдон баталагдадаг юм.
Давидай үри һадаһан тухай асуудал
41Зарим фарисейнүүдэй суглархадань, Иисүүс тэдэнһээ:
42– Бурханай табисуурта тухай таанар юун гэжэ һананат? Тэрэ хэнэй удам байхаб? – гэжэ һураба. Тэдэнь:
– Давид хаанай үри һадаһан байха, – гэжэ харюусаба.
43Иисүүс тэдэндэ:
– Тиигэбэл, юундэ Давид хаан Арюун Һүлдын нүлөөдэ абтан Бурханай табисууртые Эзэн гэжэ нэрлээб:
44«Бузар дайсадыеш хүл дорош дэбһүүлэн табитарни
баруун гар таладам һуугаарай гэжэ
Эзэн минии Эзэндэ хэлээ» гээ юм.
45Хэрбээ Давид Бурханай табисууртые Эзэмни гэжэ нэрлэбэл, юундэ Бурханай табисуурта тэрэнэй үри болохоб?
46Тиихэдэнь хэншье Иисүүстэ харюу үгэжэ шадахагүй байба. Тэрэ үдэрһөө хойшо Тэрээнһээ юумэ һурахаяа хэншье зүрхэлбэгүй.
Currently Selected:
Матвей 22: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
