Матвей 2

(Лк 2:1-7)

Зүүн зүгэй сэсэшүүл Иисүүстэ мүргэбэ

1Иисүүс болбол Иудейн Бэтлэһээм хотодо Ирод хаанай зонхилжо байха үедэ түрэбэ. Тэрэ үедэ зүүн зүгһөө Иерусалим хотодо сэсэшүүл ерээд, 2хүнүүдһээ иигэжэ асууба:

– Иудейн хаан болохоор заяагдажа түрэһэн үхибүүн хаанаб?

Бидэ тэрээнэй одоной зүүн зүгтэ мандахые хараад,

тэрээндэ мүргэхэеэ ерээбди.

3Энээниие дуулаад, Ирод хаан, тэрээнтэй хамта бүхы Иерусалимай зон һанаата болобо. 4Тиигээд Ирод бүхы ахамад санаартаниие, Хуули заадаг багшанарые суглуулаад:

– Бурханай табисуурта Христоос хаана түрэхэ ёһотой байгааб? – гэжэ тэдэнһээ һураба. 5Тэдэнь иимэ харюу үгэбэ:

– Иудейн Бэтлэһээмдэ түрэхэ ёһотой байгаа, лүндэншын иигэжэ бэшэһэн ёһоор:

6«Иудейн орон дайдын Бэтлэһээм хото,

ши Иудын мэдэлэй бусад шухала хотонуудһаа

юугээрээшье дутанагүйш, юундэб гэхэдэ,

Минии Израилиин арад зониие хүтэлхэ

ехэ ударидагша шамһаа мүндэлэн гараха».

7Тиихэдэнь Ирод зүн зүгһөө ерэһэн сэсэшүүлые нюусаар дуудаад, одоной мандаһан саг тэдэнһээ мэдэжэ абаба. 8Тиигээд тэдэниие Бэтлэһээм эльгээхэ зуураа:

– Ошоод, тэрэ хүбүүе һайнаар бэдэрэгты. Тэрэниие олоод, намда дуулгаарайгты. Би баһа ошожо тэрээндэ мүргэхэ һанаатайб, – гэжэ хэлэбэ.

9-10Тэдэнь хаанай хэлэһэн үгэ шагнаад, замдаа мордобо. Зүүн зүгтэ хараһан одоёо дахин харахадаа тэдэнэр угаа ехээр баярлаба. Тэрэ одон тэдэниие хүтэлэн, урдань ябажа, һүүлэй һүүлдэ хүбүүнэй байһан газарта асараад тогтошобо. 11Сэсэшүүл гэртэ ороод, хүбүүнэй Мария эхэтэйгээ байхыень хараба, тиигээд газар хүрэтэр дохин Тэрээндэ мүргэбэ. Асарһан бэлэгүүдээ дэлгэжэ, хүбүүндэ алта мүнгэ, сан санзай, һайхан үнэртэй ургамалай тоһо үргэбэ.

12Тэдэ зүүдэндээ Иродтэ бусажа бү ошогты гэһэн һэргылэмжэ Бурханһаа абаһан хадаа, ондоо харгыгаар түрэл нютагаа бусаба.

Египет руу зугадаһан тухай

13Тэдэ сэсэшүүлэй ябаһан хойно Бурханай Эльгээмэл Иосифой зүүдэндэ үзэгдөөд, иигэжэ хэлэбэ:

– Ирод энэ хүбүүе алахаяа һанаашалаад, бэдэржэ орохонь. Тиимэһээ ши бушуухан бодоод, хүбүүгээ эхэтэйнь абажа, Египет руу тэрьедэ. Тиигээд минии шамда дуулгатар тэндээ байгаарай.

14Иосиф үхибүүгээ эхэтэйнь абажа, тэрэл һүниндөө Египет ябаба. 15Тэдэнэр Иродэй үхэтэрнь тэндэ байгаа. Тиигэжэл Эзэнэй лүндэншөөрөө дамжуулан: «Египедһээ Би Өөрынгөө Хүбүүе дуудааб», – гэжэ айладхаһаниинь бүтэбэ даа.

Үхибүүдые алаха тухай Иродэй үгэһэн захиралта

16Сэсэшүүлдэ мэхэлүүлһэнээ мэдэрхэдээ, Ирод аргагүй ехээр сухалдаба. Тиигээд Бэтлэһээм хото болон тэрэниие оршон тойроһон нютагуудай хоёр наһанһаа доошо хүбүүдые алагты гэһэн захиралтатайгаар сэрэгшэдээ эльгээбэ. Үхибүүнэй наһа Ирод сэсэшүүлһээ мэдэжэ абаһан сагаар багсааһан байна.

17Тиигэжэл Ерэмияа лүндэншын айладхаһан ёһоор Эзэнэй найдуулһаниинь бүтэбэ даа:

18«Угаа гашуудан уйлаха абяан

Рамаада#2:18 Вавилоон руу хүсөөр нүүлгэхын урда тээ дайсадынь еврейнүүдые Рамаа хотодо суглуулаад барижа байгаа бэлэй. Тэндэнь айхабтар ехэ гашуудал болоо һэн. Тон тиимэл гашуудал Ирод хаанай захиралтаар Бэтлэһээм хотын оршон тойрон үхибүүдые алаха үе сагта болоо бэлэй. Рахээл – Яковай эгээн хайрата һамган, мүн бүлэг израильшуудай эжы. Эхин номой айладхаһанаар (35:19), тэрэниие Бэтлэһээмһээ холо бэшэ хүдөөлүүлээ. дуулдана.

Рахээл хюдуулһан үхибүүдээ шаналан уйлана,

һанааень заһахын аргагүйл».

Египедһээ бусалга

19Иродэй үхэһэн хойно Египедтэ байһан Иосифой зүүдэндэ Бурханай Эльгээмэл үзэгдөөд:

20– Ши бодоод, хүбүүгээ эхэтэйнь абажа, Израиль нютагаа бусажа ошо. Хүбүүнэй ами хороохоёо һанагшад мүнөө хосороо, – гэжэ хэлэбэ.

21Иосиф үхибүүгээ эхэтэйнь абажа, Израиль нютагаа бусаба. 22Иродэй орондо Архелай хүбүүниинь Иудейдэ хаан болоо гэжэ дуулаад, Иосиф тиишэ ошохоёо айгаа. Харин Иосиф зүүдэндээ дахин зүблэл абаад, Галилейн можо зүглэбэ. 23Тэндэ Иосиф гэр бүлэтэйгөө Назарет хотодо түбхинэн нютагжаба. Тиигэжэл «Тэрэ Назаредэй гэжэ нэрлүүлхэ» гээд лүндэншэдэй айладхаһаниинь тудаа.

Currently Selected:

Матвей 2: BurBBL2024

Highlight

Copy

Compare