Матвей 1

(Лк 3:23-28)

1Абраһаамай үри һадаһан болохо Давидай үри һадаһан Иисүүс Христоосой уг гарбалынь иимэ:

2Абраһаам болбол Исаагай эсэгэ, Исаак – Яковай эсэгэ, Яков – Иудын ба тэрэнэй аха дүүнэрэй эсэгэ байгаа. 3Иуда болбол Тамаар гэдэг эхэнэрһээ Пээрэц Зээрах хоёр хүбүүтэй байгаа. Пээрэц – Хэцроон хүбүүтэй, Хэцроон – Араам гэдэг хүбүүтэй, 4Араам – Амминадааб хүбүүтэй, Амминадааб – Нахшоон хүбүүтэй, Нахшоон – Салмоон хүбүүтэй байгаа. 5Салмоон болбол Рахааб гэдэг эхэнэрһээ Бооһаз хүбүүтэй болоо. Бооһаз Рүүт хоёрһоо Обээд хүбүүн түрөө. Обээдһээ Ишай хүбүүн түрөө. 6-11Ишайн уг тэрэнэй хүбүүн Давид хаан залгамжалаа.

Давидай сагһаа эхилээд, Вавилоон руу сүлэгдэһэн саг хүрэтэр Иисүүсэй элинсэг үбгэ эсэгэнэрынь иимэ: Давидай уг Соломоон залгамжалаа. Соломооной эхэнь түрүүн Урияа гэдэг хүнэй һамганиинь һэн. Соломоонһоо Рэхобаам хүбүүн, Рэхобаамһаа – Абияа, Абияаһаа – Асаа, Асааһаа – Ёшапаат, Ёшапаадһаа – Иораам, Иораамһаа – Уззияа, Уззияаһаа – Ётаам, Ётаамһаа – Ахааз, Ахаазһаа – Хэзэкияа, Хэзэкияаһаа – Мэнашшээ, Мэнашшээһээ – Аммоон, Аммоонһоо – Ёшияа түрөө. Ёшияаһаа Ехонияа болон тэрэнэй аха дүүнэрынь түрэһэн юм.

12Вавилоон руу хүсөөр нүүлгэгдэһэнһэйнь хойшо Ехонияаһаа Шалтиээл гараа, Шалтиээлһээ Зэрубабээл, 13Зэрубабээлһээ – Абиһууд, Абиһуудһаа – Элиакиим, Элиакиимһаа – Азоор, 14Азоорһоо – Цадоок, Цадоокһоо – Ахиим, Ахиимһаа – Элиһүүд, 15Элиһүүдһээ – Эльазаар, Эльазаарһаа – Маттаан, Маттаанһаа – Яков, 16Яковһаа Мариятай һууһан Иосиф түрөө. Марияһаа Бурханай табисуурта гэжэ алдаршаһан Иисүүс хүбүүн түрөө. 17Иигээд, Абраһаамһаа Давид хүрэтэр арбан дүрбэн үе болоно. Мүн Давидһаа эхилээд, Вавилоондо нүүлгэгдэһэн саг болотор арбан дүрбэн үе, Вавилоондо нүүлгэгдэһэнһээ хойшо Бурханай табисууртын түрэтэр баһал арбан дүрбэн үе болоно.

Иисүүсэй түрэһэн тухай

18Бурханай табисуурта Иисүүс Христоосой түрэһэн түүхэ иимэ: Мария эжынь хадагаа табиһан Иосиф нүхэртэйгөө гэрлэхынгээ урда Арюун Һүлдэһөө хээлитэй болоһоноо мэдэрбэ. 19Мариягай Иосиф нүхэрынь үнэн шударга хүн байжа, зоной урда басаганай нэрэ муугаар хэлүүлэн бузарлахагүйн тула түрэ хуримаа шэмээгүйхэн болюулха гэжэ шиидэбэ. 20Тиигэжэ бодоод, Иосифой дууран хэбтэхэдэнь, Бурханай Эльгээмэл зүүдэндэнь үзэгдөөд, иигэжэ хэлэбэ:

– Давидай үри һадаһан Иосиф, Мариягай түрэхэ хүбүүн Арюун Һүлдэһөө бүрилдэһэн юм. Тиимэһээ ши тэрэниие һамган болгожо абахаяа бү ай. 21Тэрэшни хүбүү түрэхэ, Тэрээндэ Иисүүс#1:21 Еврей хэлэн дээрэ энэ нэрэ «Эзэн абарна» гэһэн удхатай юм. гэжэ нэрэ үгэхэш, юундэб гэбэл, Тэрэ арад зоноо нүгэл хилэнсэгһээ абарха.

22Тиигэжэл Эзэнэй лүндэншөөрөө иигэжэ дамжуулжа айладхаһаниинь бүтэбэ даа:

23«Басаган хээлитэй болоод, хүбүү түрэхэ, Тэрээниие Эммануил гэжэ нэрлэхэ», энэ нэрэнь Бурхан бидэнтэй хамта гэһэн удхатай. 24Иосиф нойрһоо һэреэд, Бурханай Эльгээмэлэй захирһан ёһоор Мариятайгаа гэрлэжэ һууба. 25Хүбүүнэйнгээ түрэтэр Иосиф һамгантайгаа хамта унтаагүй һэн. Хүбүүндээ тэрэ Иисүүс гэжэ нэрэ үгөө һэн.

Currently Selected:

Матвей 1: BurBBL2024

Highlight

Copy

Compare