Малаахи 3
3
1«Харагты, шинии ябаха харгы бэлдэхыень би уридшалан Өөрынгөө Эльгээмэлые ябуулнаб. Таанарай бэдэрдэг Эзэн гэнтэ Өөрын Һүмэдэ ерэхэ болоно. Таанарай баярлан хүлеэһэн хэлсээнэй Эльгээмэл, харагты, Тэрэ ерэжэ байна» гэжэ Түмэн Сэрэгтэ Эзэн айладажа байна. 2«Гэбэшье Тэрэнэй ерэхэ үдэр хэн тэсэжэ гарахаб? Тэрэнэй үзэгдэхэдэ хэн зогсожо шадахаб? Тэрэ арюудхагша гал мэтэ, сэбэрлэгшэ сабан шэнги юм. 3Тэрэ мүнгэ хайлуулан сэбэрлэһэн мэтэ һуужа, Левиин хүбүүдые сэбэрлэхэ болоно. Тэрэ тэдэниие алта мүнгэн хайлуулһан шэнги үнэн шударга байдалда оруулжа, Эзэндэ тахил үргэхэ болоно. 4Тиин Иудын ба Иерусалимай үргэл эртын үдэрнүүдтэ, урдын жэлнүүдтэ шэнги Эзэнэй нюдэндэ дулаан, урин болохо. 5Удаань шүүлгэ хэхэеэ Би таанарта ойртохо болоноб. Би мэргэлдэг хүнүүдтэ, садарлагшадта, хэрэг шүүлгэдэ хуурмагаар тангариглагшадта, хүлһэнэй ажалшадые луйбардагшадта, бэлбэһэн эхэнэрнүүдые ба үншэн хүүгэдые дарлагшадта, ерүүл хүнүүдые харшалагшадта болон Намһаа нарилан айдаггүй хүнүүдтэ эсэргүү гэршэ болохоб», – гэжэ Түмэн Сэрэгтэ Эзэн айладажа байна.
Зөөриингөө арбанай нэгэ хубиие Эзэндээ үргэхэеэ бү мартагты
6«Юуб гэхэдэ, хубилдаггүй Эзэнби, тиимэһээ Яковай хүбүүд һүнэхэгүй. 7Анханһаа таанад минии хуули сахяагүйт. Танай үбгэ эсэгэнэршье Минии захяа заабари сахихаяа болёо һэн. Нам тээшэ бусажа ерэгты, Бишье таанадта бусажа ерэхэб» гэжэ Түмэн Сэрэгтэ Эзэн айладажа байна. «Бидэ яажа бусан ерэхэ болонобибди?» гэжэ таанад асуужа болохот. 8Хүнүүд Бурханиие мэхэлхэ ёһогүй. Гэбэшье таанад Намайе мэхэлжэ байнат. «Яахадаа Таниие мэхэлһэн болонобибди?» гэнэт. Таанад бүхы зөөриингөө арбанай нэгэ хубиие үгэхэ, мүн Намда онсо үргэл хэхэ ёһотой байгаат. 9Тиигэжэ танай үндэһэтэн бүхэлидөө Намайе мэхэлжэ байгаа хадаа хараалда ороһон байнат. Иигэжэ Түмэн Сэрэгтэ Эзэн айладажа байна. 10«Минии үргөөдэ зөөриингөө арбанай нэгэ хубиие асаржа ерэгты. Тиигэжэ Намайе туршагты. Би таанадай түлөө тэнгэриин сонхо нээжэ, эбигээл үршөөл халитар хүртөөхэб» гэжэ Түмэн Сэрэгтэ Эзэн айладажа байна. 11«Ургасыетнай хорхой шумуул эдихээ болихо, үзэмэй модон жэмэсээ унагаахагүй» гэжэ Түмэн Сэрэгтэ Эзэн айладажа байна. 12«Нютаг оронтнай баяртай хүүртэй болохо, бүхы үндэһэ яһатан таанадые үреэлдэ хүртэһэн гэжэ дуудаха болоно» гэжэ Түмэн Сэрэгтэ Эзэн айладажа байна.
Үнэн шударга зондо шагнал
13«Таанарай үгэ Минии урдаһаа эсэргүү бардам байгаа» гэжэ Түмэн Сэрэгтэ Эзэн айладажа байна. Гэбэшье таанар «Бидэ Танда эсэргүү юу хэлээ һэмбибди?» гэнэт. 14«Бурханда үйлэ бүтээхэ гээшэ ашаггүй. Тэрэнэй һургаал сахижа, Түмэн Сэрэгтэ Эзэнэй үмэнэ гашуудан ябахань ямар ашаг үрэ үгэхэ гээшэб? 15Мүнөө ехэрхүү бардам хүнүүдые үреэлдэ хүртэһэн гэжэ хэлэнэ. Муу үйлэ хэгшэд урда гарана. Тэдэ Бурханиие туршажа, нүгэл үйлэдэнэ, харин Бурхан тэдэниие хэһээнэгүй» гэдэг. 16Бурханһаа хэмшээрхэдэг хүнүүдэй бэе бэетэйгээ хөөрэлдэхэдэ, Эзэн анхаралаа табин шагнадаг. Эзэндэ һүгэдэдэг болон Тэрэнэй нэрэ үнэлдэг хүнүүдэй түлөө дурдалгын ном Тэрэнэй урда бэшэгдээ бэлэй. 17«Өөрын эзэмшэлһэн орон байгуулхадам, тэдэ Минии байха болоно. Өөртэнь үйлэ бүтээдэг хүниие үршөөдэгтэй адли Би тэдэниие үршөөхэб» гэжэ Түмэн Сэрэгтэ Эзэн айладажа байна. 18Тиихэдэ таанар дахяад Намда ерэхэт, һайн муугай, зүб буруугай хоорондохи илгаа, Бурханда һүгэдэдэг үнэн шударга хүнэй ба нүгэл үйлэдэгшын хоорондохи илгаа ойлгохот.
Currently Selected:
Малаахи 3: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
