Ёһээл 2

Эзэнэй үдэр: барагар бүрхэг болон шэг харанхы үдэр

1Сиондо бүреэгээ үлеэжэ, Минии нангин уулада түгшүүрил зарлагты. Эзэнэй үдэр ерэжэ байһан тула хамаг зон шэшэрэгты. Үнэхөөр тэрэ үдэр дүтэлөө. 2Тэрэ бүрхэг харанхы үдэр уулын оройгоор үүрэй туяагай сасарһан мэтэ амаргүй олон ба агуу хүсэтэй арад түмэн таража байна. Тэрээнтэй тэнсэхэ юумэн урданшье байгаагүй, хойшодоошье олон үедэ байхагүй. 3Тэдэ хойноо шатаһан газар үлөөнэ. Ерэхэһээнь урид Эдээмэй сэсэрлиг шэнги байгаа һаа, арадань хооһон губи болодог. Тэдээнһээ тэрьелхэ арга огто үгы. 4Тэдэ бэеэрээ морин шэнги түхэлтэй, морин сэрэг шэнги һүрөөтэйгөөр орожо ерэдэг. 5Хадын оройгоор дайшалхы тэргэнүүд мэтэ наяраа түерөөтэйгөөр дабшана. Галда тас-няс дүрэһэн һолоомо мэтэ шууяатайгаар байлдаанда орохоор хододоо бэлэн арад бэлэй. 6Тэдэнэй урда хүнүүд шэшэрэн һалганадаг, шэг шарайнь хүхэ сагаан болодог. 7Тэдэ хүсэтэ эрэшүүл мэтэ түргэн гүйлдэн, сэрэгшэд мэтэ хана өөдэ абирдаг. Шуумгай түргэн урагшаа дабхидаг, хэнииньшье өөрын замһаа хадуурдаггүй. 8Тэдэ түлхисэлдэн дарасалданагүй, хүн бүхэниинь өөрын үүргэтэй. Нэгэнэйгээ унабал, дайшалхы жагсаалынь һандардаггүй. 9Хотодо дүтэлхэдөө, хэрэмэй ханада абиран гаража, гэрнүүдэй сонхоор хулгайшан мэтэ шурган ороно. 10Тэдэнэй урда газар хотойжо, тэнгэри һалганажа, һара наран харанхыдажа, одо мүшэнэй гэрэл бүхэнэ. 11Эзэн Өөрын сэрэгэй урда дуугаа үгэхэ. Юундэб гэхэдэ, тэрэнэй сэрэг ехэ олон, захирал бэелүүлэгшэнь аргагүй хүсэтэй бэлэй. Эзэнэй үдэр һүр ехэтэй ба аймшагтай. Хэн тэрэ үдэрые тэсэжэ шадахаб?

Гэмээ мэдэрэн наманшалхые, масаг сахихые уряална

12Эзэн айладхажа байна. «Мүнөө нүгэлтэ таанадай уйлаха саг ерээ. Масаг барижа, уйлажа, гашуудажа, бүхы зүрхэ сэдьхэлээрээ Нам тээшэ эрьегты. 13Таанад хубсаһаяа бэшэ, зүрхэ сэдьхэлээ удар татагты!» Одоол өөһэдын Эзэн Бурхан тээшэ эрьегты. Тэрэ хадаа нигүүлэсхы хайра үршөөлтэй, уурлахадаа удаан, тэсэбэритэй, муудашье зөөлэн хандадаг. 14Эзэн бодолоо хубилган, хэһээлтэ зайлуулжа магад. Тэрэ зөөлэржэ, танда үршөөл хайра хүртөөхэл. Тиихэдэнь Эзэндэ зорюулһан талхан ба ундан үргэлөө хэжэ болохот. 15Сиондо бүреэ үлеэгты. Масаг барилгын суглаа зарлагты. 16Арад түмэнөө суглуулжа, аха захатанаа уригты. Бүхы хүүгэдые, нялхануудые асаруулагты. Гэрлэхээ байһан залуушуулые унталгын үргөөһөө гаргагты. 17Эзэнэй зарасанар, санаартад Һүмын үүдэнэй танхим болон үргэлэй шэрээгэй хоорондо уйлалдаг. Тэдэ бүгэдэ зальбаран хэлэг:

– Эзэн манай, арад түмэнөө хайрлыт. Бусад угсаатанай доромжодо тэрэниие бү үгыт. Яахадаа бусад угсаатан «Эдэнэйш Бурхан хаана юун бэ? гэжэ хэлсэхэ болооб?» гэжэ хэлэг. 18Удаань Эзэн Өөрын газар тухай һанаата боложо, Өөрын арад түмэниие хайрлаха болоно.

Эзэн Өөрын арад түмэндэ дахин элбэг дэлбэг юумэ үршөөхэ

19Эзэн Өөрын арад түмэндэ хандан хэлэхэл: «Би таанарта орооһо таряа, шэнэ ургасын үзэмэй дараһан архи болон олива модоной тоһо эльгээхэ гэжэ байнаб. Таанадта хамаг юумэн элбэг болохо. Бусад үндэһэтэнэй доромжодо таанадые үгэхэгүйб. 20Хойто зүгһөө ерэһэн угсаатаниие таанадһаа холодуулхаб. Тэдэниие сүл хооһон дайда руу ябуулхаб. Заримашуулынь Дабһата далай тээшэ, нүгөөдүүлынь Дундада далай руу талииха. Эдэ зон ехэ хоро хүргөө, тииһэнэйнгээ түлөө харюусаха. Үхэһэн хүнүүдтэл тэдэ үжэжэ, үмхэй муухай үнэр гутажа захалха». 21Газар, түбэгшөөлөө орхи, баярла, сэнгэ. Ушарынь хадаа Эзэн агуу үйлэ хэһэн бэлэй. 22Талын ан гүрөөһэд, бү айгты. Бэлшээри ногооржо, олива модон үрэ жэмэсээ үгэхэ, удамбарай жэмэсэй, уһан үзэмэй модонууд ургаса асарха. 23Сионой хүбүүд, хүхюутэй байгты, танай Бурхан, Эзэн бороо үршөөбэ. Урдынхидаал адли хабаршье намаршье хура бороо асаржал байха. 24Таряа сохидог газарта орооһон обоо элбэг болохо, уһан үзэмэй торхо һабанууд шэнэ ургасын үзэмэй дараһан архяар билтарха. 25Минии эльгээһэн сэрэг – таршаа шумуулай, үтэ хорхойн болон төөлүүрэй эдижэ дууһаһан зоболонто жэлнүүдэй түлөө ашаар харюулхаб. 26Таанар эдихэ юумээр элбэг, гэдэһэ садхалан боложо, гайхамшаг ашата үйлэ бүтээһэн Эзэнэй, танай Бурханай соло дуудан магтахат. Энээнһээ хойшо Минии арад эшэгүүритэ доромжодо орохогүй. 27Иигэжэ таанад Намайе Израилиин дунда байхыем харахат, таанадай гансахан Бурхан, Эзэн мүн гэжэ ойлгохот.

Би Өөрын Һүлдөөрөө хүн бүхэниие нэбтэрүүлхэб

28Би Өөрын Һүлдөөрөө хүн бүхэниие нэбтэрүүлхэб. Таанадай хүбүүд басагад зүн бэлиг мэдэдэг болохо, үбгэд хүгшэдтнай зүүдэ зүүдэлхэ, залуушуултнай үзэгдэл үзэжэ захалха. 29Тэдэ үдэрнүүдтэ Би богоол шэбэгшые Һүлдөөрөө нэбтэрүүлхэб. 30Би тэнгэри болон газарта гайхамшагта тэмдэгүүдые – шуһа, гал дүлэ, бөөн хара утаа үзүүлхэб. 31Эзэнэй агууехэ алдарта үдэрэй ерэхын урда тээ наран балартаха, һара шуһан улаан болохо. 32Эзэнэй нэрэ дуудаһан хүн бүхэн абарагдаха. Ушарынь хадаа Сион хада дээрэ, Иерусалим хотодо абаралга бууха гэжэ Эзэн хэлэнэ. Абарагдагшадай дунда Эзэнэй дуудаһан бусадшье зон байха.

Currently Selected:

Ёһээл 2: BurBBL2024

Highlight

Copy

Compare