Һошээ 11
11
Израилиин үшөө үхибүүн байхада, Би тэрэниие хайрлан энхэрээб
1Эзэн иигэжэ айладхана:
Израилиин эдир залуу байхада Би тэрээндэ дуратай бэлэйб,
тиигээд Египедһээ Би Өөрынгөө Хүбүүе дуудааб.
2Теэд Минии дуудаха бүри
тэрэ Намһаа буруу хаража байгаа.
Минии арад түмэн Баалнуудта үргэл үргэжэ,
онгонуудта уталга ууюулжа байгаа бэлэй.
3Би Израилиин арад түмэниие Өөрын гар дээрэ абаад,
хүлдэ оруулан һургаа бэлэйб.
Теэд тэдэ Намайе арагалжа байна гэжэ ойлгоогүй.
4Хүн шэнгеэр, эелдэр зөөлэнөөр тэдээнтэй хөөрэлдэжэ,
амыень ангайлгажа, эдеэ хоол үгэдэг һэм.
5Намда бусахын орондо тэдэ Египедтэ этигэнэ, тиимэһээ мүнөө Ассири тэдэниие хааншалан байха. 6Дайн дажар хотонуудынь дайража, хаалгануудынь унагааха, муу муухай һанаатай байһанайнгаа түлөө тэдэ хосорхо. 7Тэдэ Намһаа буруу хараһан зандаа. Тэдэ шангабди гээд һанана, теэд энэнь туһагүй.
8Израиль, Би шамтай юу хэхэбиб,
яагаад шамда урбахабиб?
Адмаада яагаад хандаа һэнбиб,
Цэбоһиимдо юу хээ һэнбиб, тон тиимээр шамтай хандаха гүб?
Иимэ юумэ хэхыем сэдьхэлни тэбшээнэ,
Би тэдэниие угаа ехээр хайрланаб!
9Уур сухал дундаа иимэ юумэ хэхэгүйб,
Израилиин арад түмэниие усадхахагүйб,
юуб гэбэл, Би хүн бэшэ, таанадай дунда арюун Бурхан гээшэб!
Би хото руу орохогүйб!
10Минии арад түмэн хойноһоом дахан ябаха. Арсаландал Би архиран, дайсадынь һүрдөөхэб. Минии арад зон баруун зүгһөө шэшэрэлдэн бусаха. 11Тэдэ шубуудтал адли хөөрсэгэнэн-шэшэрэн, Египедһээ, тагтаануудтал Ассириин газарһаа бусаха. Тиихэдэнь Би тэдэниие гэр руунь оруулан һуурижуулхаб. Энэ болбол Би, Эзэн, айладхана мүн!
Эзэн Яковай, Эпрааимай болон Иудын үри һадаһадтай заргалдана
12Эзэн иигэжэ айладхана: «Израилиин улад Намайе тойруулан худал хуурмаг үгэ, мэхэ гохо дэлгэнэ. Иуда Минии, арюун Бурханай, урдаһаа һөөргэдөө.
Currently Selected:
Һошээ 11: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
