Амоос 5
5
Эзэн Израиль тушаа гашуудана
1Эдэ үгэнүүдые шагныта! Израильшууд, хүдөөлүүлгын дуу таанад дээрэ дуулан байнаб.
2Израилиин охин унагаагдаа,
өөдөө бодожо бэшэ шадахагүй.
Газар дэбисхэр дээрээ тэрэ шэдүүлээ,
хэншье тэрэниие бодхоохогүй!
3Эзэн Бурхан иигэжэ айладана:
Израилиин ямар нэгэн хото
мянган сэрэгшые байлдаанда табибал,
тэрэнэй оройдоол зууниинь һөөргөө бусаха;
зуун сэрэгшые байлдаанда табяа һаань,
арбаниинь лэ амиды бусаха!
Эзэндэ эрьегты – тиигэбэл, амиды мэндэ үлэхэт!
4Эзэн израильшуудта иигэжэ айладана:
Нам руу эрьебэл, амиды мэндэ үлэхэт!
5Бэт-Ээл руу бү эрьегты!
Гилгаал ошохо хэрэггүй.
Бэһээр-Шээбэ руу бү ошогты!
Гилгаалай улад зон баряанда туугдаха,
Бэт-Ээлдэ гай тодхор тохёолдохо!
6Эзэндэ эрьегты,
тиигэбэл, амиды мэндэ үлэхэт!
Үгы һаатнай, Тэрэ гал дүлэн мэтэ
Иосифой гэр бүлэдэ добтолхо,
иигэжэ Бэт-Ээл шатажа һалаха,
хэншье тэрэ галые унтараажа шадахагүй!
7Зүб хуулиие шаралза үбһэн болгогшо,
үнэн шударгые газардуулагша таанар!
Тэрэнэй нэрэ алдар Эзэн мүн!
8Зургаан мүшэд, Ориониие байгуулагша,
бүдэг гэрэлые үглөөнэй туяа,
үдэрые харанхы һүни болгогшо,
далайн уһанда захиран дуудажа,
бүхы дэлхэйгээр тараан урдахуулагша гэбэл, Эзэн мүн!
9Шэрүүн зоригтойдоо Тэрэ үхэл эльгэдэг,
иигэжэ хана хэрэм дотор үхэл шурган ородог.
Муу юумэ бэшэ, һайе үйлэдэгты, тиигэбэл, амиды мэндэ үлэхэт
10Шүүхын газарта гэмнэгшые тэдэ үзэн ядадаг,
үнэн зүб тунхаглаашадые тоодоггүй.
11Үгытэй ядуу зониие татабаряар зобоожо хооһоруулнат,
таряаень алба татабари гэжэ абанат.
Энээнэй түлөө таанартай юун тохёолдохоб гэбэл:
шулуу сабшан гэр барихат,
гэбэшье тэндэ ажаһуухагүйт.
Уһан үзэмэй сэсэрлиг һуулгахат,
харин үзэмэй дараһан архи уухагүйт!
12Гэмтэ хэрэг хэды олоор хэһыетнай,
нүгэл шэбэлэйтнай угаа хүндые мэдэнэм.
Зэмэгүй хүниие харшалнат, эдилгэ абанат,
ядуу зониие буруу шүүбэрилнэт.
13Тиимэһээл үнгэрхэдөө сэсэн мэргэнэйшье тээлмэрдэн,
дуугаржа шадахаяа болимоор саг ерэхэнь!
Хатуу саг эрьехэнь!
14Муу юумэ бэшэ, һайе үйлэдэгты,
тиигэбэл, амиды мэндэ үлэхэт.
Тиигэбэлтнай, Түмэн Сэрэгтэ Эзэн Бурхан
таанадай хэлээшээр, таанадтай хамта байхал!
15Муу муухайе зайлуулагты, һайнда дурлагты,
зарга шүүхэдэ зүб шударга ёһо гурим бата һуурижуулагты!
Тиигэбэлтнай, Түмэн Сэрэгтэ Эзэн Бурхан
Иосифой үри таһардаһанай үлдөөсые
хайрлан үлөөжэ магад.
16Тиимэһээ Түмэн Сэрэгтэ Эзэн Бурхан иигэжэ айладана:
Бүхы талмайнуудаар хүдөөлүүлгын гашуудал,
бүхы гудамжануудаар «гай тодхор тудалдаа!» гэһэн ёолоонууд дуулдаха.
Гашуудалай ёһололдо ажалшадые,
хүдөөлгэндэ уйлагша эхэнэрнүүдые дуудаха!
17Таанарай дундуур Минии үнгэрэн гарахада,
уһан үзэмэй сэсэрлигүүдтэ уйлаан-бархираан эхилхэ.
Эзэнэй үдэр – туяа гэрэл бэшэ, харанхы бшуу
18Эзэниие бараалхаха үдэр тухай һанаашархагшад азагүй!
Таанарта юундэ Эзэнэй үдэр хэрэгтэйб?
Тэрэ туяа гэрэл бэшэ, харанхы бшуу.
19Хүнэй арсаланһаа зугадан гүйжэ байхада
урдаһаань баабгай дайралдаһандал,
гэр руу гүйжэ ороод, ханада гараараа хүрэхэдэнь,
могой тэрэниие хадхаһандал,
20Эзэнэй үдэр тон тиимэ, тэрэ гэрэл туяа бэшэ,
харанхы, шэб харанхы мүн!
Нүгэл үйлэдэгшэдэй Бурханда мүргэлгэ Эзэндэ жэрхэдэһэтэй
21Танай һайндэрнүүдые үзэн яданаб, жэрхэнэб,
баярайтнай үргэлэй утаа үнэрдэхөө һананагүйб!
22Түгэс шатаалта үргэлнүүдые Намда үргэнэт,
теэд Би таанарай үргэл тоохогүйб.
Эрхим малаа үүсэлнэт,
теэд Би энээниие харахаашье һананагүйб.
23Дуу дуулаһан өөрын шууяанһаа Намайе зайсуулыт,
морин хуурайтнай абяа шагнахаа һананагүйб.
24Энээнэй орондо зүб хуули үргэн мүрэн мэтэ дэлгэрэг лэ,
шэргэдэггүй урасхалдал үнэн шударга урдаг лэ!
25«Израилиин арад зон, таанар дүшэн жэлэй туршада сүл губяар нүүжэ ябахадаа, амитадые гаргаад, Намда үргэл үргэдэг байгаа аалта?! 26Саккуут хаанай болон Кайбаан одон-бурханай дүрсэнүүдые өөһэдтөө дархалан абажа ябаат. 27Тиимэһээ Би таанадые Дамааскһаа сааша баряанда туун абаашахаб!» – гэжэ Түмэн Сэрэгтэ Эзэн Бурхан айладана.
Currently Selected:
Амоос 5: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
